ललितपुर- ललितपुरको बागमती गाउँपालिका वडा-४ स्थित प्युटारमा ताम्बा (म्रावाइसिंगे) प्रशिक्षण तथा अन्तरक्रिया कार्यक्रम सुरु भएको छ । बागमती गाउँपालिकाले आयोजना गरेको कार्यक्रम बिहीबारबाट शुरु भएको हो ।
तीन दिन चल्ने प्रशिक्षणमा पालिका भित्रको सात वटै वडाहरुको ताम्बा सहभागी भएका छन् । बागमती गाउँपालिकामा रहेको तामाङ समुदायको संस्कृति जगेर्ना गर्ने उद्देश्यसहित ताम्बा संस्कार प्रशिक्षण सञ्चालनमा ल्याएको गाउँपालिकाले जनाएको छ । नयाँ पुस्तामा संस्कृति हस्तान्तरण गर्ने उद्देश्यअनुरुप प्रशिक्षण कार्यक्रम राखिएको वडा नम्बर ४ का अध्यक्ष रामकुमार लामाले बताए । लामाले तामाङ भाषा र संस्कृतिको पहिचान जोगाउन यस्ता कार्यक्रमले महत्वपूर्ण भूमिका खेल्ने विश्वास व्यक्त गरे ।
कार्यक्रमको दोस्रो दिन पालिकाका सातै वडाबाट तीन–तीन जना ताम्बाहरूको सहभागितामा बन्द सत्र सञ्चालन गरिने छ । सहभागीलाई डम्फु वितरण गरिने कार्यक्रमसमेत रहेको छ । बन्द सत्रमा संस्कृति संरक्षण, भाषाको प्रवर्द्धन, तथा ताम्बा परम्पराको निरन्तरताबारे गहन छलफल हुने आयोजकले जनायो ।
कार्यक्रमका प्रमुख अतिथि गाउँपालिका अध्यक्ष वीरबहादुर लोप्चनले ताम्बाहरूबीचको घमण्ड र एकरूपताको कमीका कारण तामाङ समुदाय पछाडि परेको बताए । उनले समुदायको एकता र संस्कृतिको संरक्षणका लागि बागमती गाउँपालिकाले यस किसिमको कार्यक्रम आयोजना गरिएको बताए ।
कार्यक्रममार्फत ताम्बा संस्कार र ज्ञानको आदान–प्रदानले समुदायमा नयाँ ऊर्जा र तामाङ समुदायको भाषा संस्कृति संरक्षणमा टेवा पुग्ने उनको भनाइ थियो । तीन दिनसम्म चल्ने अन्तरक्रियाबाट तम्बासम्बन्धी प्रशिक्षण‚ ज्ञान‚ सीपसम्बन्धी दस्तावेज तयार हुने आशा आफूले गरेको अध्यक्ष लोप्चनले बताए । 
विषेश अतिथि तामाङ संघका पूर्व केन्द्रीय अध्यक्ष तथा तामाङ घेदुङको सल्लाहकार कवेलबहादुर लामाले कार्यक्रमलाई सम्बोधन गर्दै तामाङ मात्र नभई खस आर्य समुदायको पनि मौलिक संस्कृति हराउँदै गएकोप्रति चिन्ता व्यक्त गरे । उनले सम्पूर्ण जातजातिको मौलिक संस्कृति जोगाउन सबै नेपालीको साझा जिम्मेवारी भएको कुरामा जोड दिए ।
कार्यक्रममा विशिष्ट अतिथि प्रमुख प्रशासकीय अधिकृत बालकृष्ण थापा तथा अथितिहरु वडा अध्यक्ष ज्ञ्यानबहादुर लो, नारायण भोम्जन, होमप्रसाद बजगाईंलगायत तामाङ भाषा र संस्कृतिसम्बन्धी जानकारी राख्ने व्यक्तिहरुको उपस्थिति रहेको थियो । ‘ताम्बा’ तामाङ समाजको परम्परागत संस्था हो । ताम्बालाई तामाङ समाजको प्रवक्ताको र तामाङ इतिहासकारका रूपमा हेरिन्छ । ताम्बाको अहम् भूमिका मूलतः विवाहमा प्रदर्शित हुन्छ ।
-1745656903.jpeg)