- गभर्नर छनोट गिजोलिएको भन्दै सिफारिस समितिका सदस्यसमेत रहेका पूर्वगभर्नर विजयनाथ भट्टराईद्वारा राजीनामा
- आफ्नैले पार्टी नेतृत्वलाई विश्वास नगरेको भन्दै प्रधानमन्त्री ओलीको गुनासो
- सरकार परिवर्तनको बाहिरी हल्लालाई बल मिल्नेगरी गभर्नर नियुक्ति प्रकरण थप गिजोलिँदै
काठमाडौं– नेपाल राष्ट्र बैंकको गभर्नर छनोटका लागि गठन भएको सिफारिस समितिका सदस्य पूर्वगभर्नर विजयनाथ भट्टराईले राजीनामा दिएका छन् । गभर्नर नियुक्तिमा अति राजनीतिकरण भएको भन्दै भट्टराईले मंगलबार समिति संयोजकसमेत रहेका उपप्रधान एवं अर्थमन्त्री विष्णु पौडेललाई राजीनामा बुझाएका हुन् ।
समिति गठन भएपछि एकपटक पनि बैठक नबसी सदस्य भट्टराई बाहिरिएका छन् । चैत ११ गतेको मन्त्रिपरिषद्ले अर्थमन्त्री पौडेलको नेतृत्वमा तीन सदस्यीय गभर्नर सिफारिस समिति गठन गरेको थियो । उक्त समितिमा योजना आयोगका पूर्वउपाध्यक्ष विश्व पौडेल अर्का सदस्य हुन् ।
भट्टराईले गभर्नर छनोट प्रक्रियामा नगएको र समितिको बैठकसमेत बस्न नसकिरहेको अवस्थामा आफू बस्न अनुकूल नभएको भन्दै राजीनामा दिएको अर्थमन्त्रीको सचिवालयले जनायो ।चैत २४ देखि नेपाल राष्ट्र बैंक नेतृत्वविहीन छ । तर सत्तारुढ दल नेपाली कांग्रेस र नेकपा एमाले यो पद आफूनिकटकालाई दिनुपर्ने भन्दै हानथापमा उत्रिएको छ ।
नेपाली कांग्रेस जसरी पनि गभर्नर आफ्नै क्यान्डिडेटलाई बनाउन चाहेको देखिन्छ । सरकारको नेतृत्व गरिरहेको दल एमाले पनि गभर्नर आफ्नै पोल्टामा राख्न चाहन्छ । यही हानथापका कारण चैत २४ देखि रिक्त गभर्नर पद सरकारले नियुक्त गर्न नसकेको हो । गभर्नरकै कारण सरकारमा हलचल आएको र दुई दलबीच दूरी बढेकोसमेत बताइन्छ ।
आफ्नो सत्ता नै धरापमा परेपछि प्रधामन्त्री केपी शर्मा ओली यसअघि गभर्नर कांग्रेसलाई दिन तयार भएको बताइएको थियो । उक्त पदमा कांग्रेस सभापति शेरबहादुर देउवाले आफूनिकट गुणाकर भट्टलाई अघि सार्ने तयारीसमेत गरेका थिए । यद्यपि छनोट प्रक्रिया नै सुरु नभई भट्टविरुद्ध सर्वोच्च अदालतमा रिट दायर भएको छ । यही मेसोमा कांग्रेस सभापति देउवा बैंकक उडेका छन् । बैंकक उड्दा कतिपयले सरकार परिवर्तनको ‘डिल’ हुने आशंका गरेका छन् । बिहीबार बसेको कांग्रेस पदाधिकारी बैठकमासमेत यो विषय उठेको थियो । देउवाले सरकार हेरफेरको कुनै शंका नगर्न पदाधिकारी तथा पूर्वपदाधिकारीलाई आश्वस्ता पारेका थिए ।
यद्यपि भट्टराईको राजीनामासँगै बाहिरी आशंकालाई बल मिल्नेगरी गभर्नर नियुक्त थप गिजोलिएको छ । ६५ वर्षे उमेर हद हटाइएको मापदण्ड तत्काल कार्यान्वयन नगर्न सर्वोच्चको अल्पकालीन आदेश दिएसँगै गभर्नरको रेसमा रहेका रवीन्द्र पाण्डे, पूर्वमुख्यसचिव राजेन्द्रकिशोर क्षेत्री आउट भइसकेको छन् । गभर्नरको मापदण्डमा ३० वर्ष र कार्यकारी प्रमुखबाहेक अन्य पदाधिकारी र सदस्यको हकमा ३५ वर्ष उमेर पूरा भई ६५ वर्ष ननाघेको हुनुपर्ने व्यवस्था छ ।
ओलीको गुनासो– आफ्नैले विश्वास गर्न छाडे
सोमबारमात्र शिक्षामन्त्री विद्या भट्टराईले मन्त्री पदबाट राजीनामा दिएकी थिइन् । भट्टराईले पद छाडेपछि प्रधानमन्त्री ओलीको चौतर्फी विरोध भयो । यद्यपि यो विषयमा ओलीले आफैंले बनाएको मन्त्री हटाउँदा विरोध गर्ने कसैलाई अधिकार नभएको शैलीमा जवाफ फर्काए ।
‘एउटा मन्त्रीले राजीनामा दियो भनेर खुब प्रचार भयो । किन दिनुभयो भन्दा प्रधानमन्त्रीले बसी खान दिएन रे । मैले बनाएको मन्त्री, मैले काम लगाइराखेको छु । सहयोग गरिराछु, सिकाइराछु,’ नेकपा स्थापना दिवसमा काठमाडौंको प्रज्ञा भवनमा आयोजित कार्यक्रममा ओलीले भने ।
स्वास्थ्यका कारणले काम गर्न नसकेपछि राजीनामा दिँदा सबैले आफूविरुद्ध दुश्मनी साँधेको ओलीको गुनासो थियो । ‘तर, सबैका हेडलाइन मेराविरुद्ध । अनौठो आश्चर्य लाग्छ, यस्तो दुश्मनी के कारणले ? सबैले एकै ठाउँमा सल्लाह गरेर लेखेजस्तो । योजनाबद्ध ढंगले लेखेजस्तो,’ उनले भने ।
शिक्षकहरु २१औं दिनदेखि काठमाडौंमा आन्दोलनमा छन् । शिक्षकहरु शिक्षा ऐन नलिइ नफर्कने र परीक्षामा पनि सहभागी नहुने अडानमा रहेपछि प्रधानमन्त्री ओली जसरी बिहीबारबाट परीक्षा सञ्चालन गर्ने तयारीमा थिए । यद्यपि उनी अहिले शिक्षकसँग पनि झुकेर परीक्षा १० दिनपछिबाट सुरु हुनेगरी सारेका छन् ।
यस्तो अवस्थामा आफ्नै दलका नेताहरुले आफूलाई विश्वास गर्न छाडेको हो कि भन्दै ओलीले गुनासोसमेत गरे । ‘साथीहरुमा अलिकति आत्मविश्वासको कमी भएको हो कि ? एकताको भावनामा हामी कहाँ छौ ? के गर्दै छौं भन्ने बिर्सन खोजेको हो कि ? हाम्रो भाव र उद्देश्य बिर्सन खोजेको हो कि ? साथीहरुलाई लिडरसिपप्रति विश्वासको कमी आएको हो कि ?’ आफ्नै दलका नेताहरुलाई ओलीले प्रश्न गरे ।
देउवा उपचारका लागि स्वास्थ्य परीक्षणका लागि बैंकक पुगेकाले यसमा कुनै शंका गर्न नपर्ने ओलीको भनाइ थियो । ‘अनि शेरबहादुरजीले कांग्रेस र एमाले मिल्नु हुँदैन भनेर भन्ने मान्छे खोज्न जानुभएको हो बैंकक ?,’ प्रधानमन्त्री ओलीले माओवादी अध्यक्ष पुष्पकमल दाहाल लक्षित प्रश्न गरे, ‘त्यस्तो मान्छे यहाँ भेट्टाएको छैन ? यहाँ सुन्या छैन त्यस्तो कुरा ?’ दाहालले प्राय दैनिकजसो ओली सरकार चाँडै ढल्ने प्रतिक्रिया दिँदै आएका छन् ।
-1745656903.jpeg)
