काठमाडौं - काठमाडौंको तीनकुनेमा राजावादी समूहको शान्तिपूर्ण भनिएको प्रदर्शनमा ज्यान गुमाएका पत्रकार सुरेश रजकको पोस्टमार्टम आज हुने भएको छ । प्रदर्शनकारीले आगो लगाएको घरभित्र जलेर मृत्यु भएका रजकको शरीरमा गोली लागेको हल्लासँगै उनको पोस्टमार्टम रोकिएको थियो । शवको मंगलबार साँझ एक्स–रे गरिएसँगै आज पोस्टमार्टम हुने भएको हो ।
गत शुक्रबार दुर्गा प्रसाईं नेतृत्वको राजावादी समूहको प्रदर्शनका क्रममा रिपोर्टिङका लागि खटिएका रजकको आगलागीमा परेर मृत्यु भएको थियो । मृत्युपछि उनको शव पोस्टमार्टमका लागि त्रिवि शिक्षण अस्पताल लगिएको थियो ।
शिक्षण अस्पतालमा पुगेसँगै उनको शरीरमा गोली लागेको हल्ला फैलिएको थियो । प्रहरीले भने उक्त समाचार गलत भएको दाबी गर्दै विज्ञप्ति निकालेको थियो । ‘वास्ताविकता नबुझी सामाजिक सञ्जालमार्फत गलत एवं भ्रामक समाचार सम्प्रेषण गरी जनमानसमा नकारात्मक सन्देश प्रवाह गराउने व्यक्ति एवं संस्थालाई प्रचलित कानुन बमोजिम कानुनी दायरामा ल्याइने छ,’ आइतबार जिल्ला प्रहरी परिसर काठमाडौंका सूचना अधिकारी अपिलराज बोहराले जारी गरेको विज्ञप्तिमा उल्लेख छ । रजक
को शरीरमा गोली चलेको हल्ला चलेसँगै चिकित्सकहरु एक्सरेपछि मात्र पोस्टमार्टम गर्ने अडानमा बसे । रजकको शवको मंगलबार साँझ एक्स–रे गरिएको र आज पोस्टमार्टम गरिने तयारी रहेको त्रिवि अस्पताल स्रोतले जनायो । उनको शरीरमा गोली नभेटिएको अस्पताल स्रोतले जनाएको छ । अर्का मृतक सविन महर्जनको भने पोस्टमार्टम भइसकेको छ । उनको दायाँ हातको कुहिनो नजिकको भागबाट कोख हुँदै ढाडबाट गोली निस्केको पाइएको छ ।
यसैबीच रजक कार्यरत एभिन्युज टेलिभिजनको व्यवस्थापन र उनको परिवारले सरकारसँग तीनबुँदे माग राखेका छन् । गृहमन्त्री रमेश लेखकलाई बुझाइएको ज्ञापनपत्रमा रजकलाई निरपेक्षरुपमा सहिद घोषणा गर्नुपर्ने, जिउँदै जलाएको घटनाको उच्चस्तरीय छानबिन समिति गठन गरी घटनाको निष्पक्ष छानबिन गरी दोषीमाथि कडाभन्दा कडा कारबाहीको माग गरिएको छ ।
त्यस्तै मृतकका परिवारलाई उचित क्षतिपूर्ति दिनुपर्ने मागसमेत गरिएको छ । रजकका परिवारले प्रधानमन्त्री केपी ओलीसँग सोमबार भेटघाट गरेको थियो । आन्दोलनका प्रमुख कमाण्डर भनिएका मेडिकल व्यवसायी दुर्गा प्रसाईं भने अझै फरार छन् ।
