- परिसरबाट खटिएका प्रहरीले ६० राउण्ड गोली प्रहार गरेको प्रतिवेदन
- लुटपाट, तोडफोड र आगजानी अभियोगमा विभिन्न ठाउँबाट ६५ जना पक्राउ
- एभिन्युजका पत्रकार सुरेश रजकको शवको एक्स–रे, गोली नभेटिएसँगै पोस्टमार्टमको तयारी
काठमाडौं– चैत १५ गते दुर्गा प्रसाईंको नेतृत्वमा काठमाडौंको तीनकुनेमा भएको प्रदर्शन हिंसात्मक बन्नुलाई धेरैले सुरक्षा निकायको कमजोरीका रुपमा लिएका छन् । प्रशस्त मात्रमा प्रहरी फोर्स नखटाइएको कारण तोडफोड, व्यक्तिगत सम्पत्तिमा आगजनी भएको र धनमाल लुटपाट भएको भन्दै सुरक्षा प्रशासनको आलोचनासमेत भएको थियो ।
यद्यपि, उक्त प्रदर्शनमा प्रहरीले सक्दो बल प्रयोग गरेको खुलासा गरेको छ । जिल्ला प्रहरी परिसर काठमाडौंले उक्त घटनामा थुप्रै राउण्ड गोली चलाएको र यसको यकीन हुन अझै बाँकी रहेको जनायो । मंगलबारसम्मको प्रतिवेदनका अनुसार परिसरबाट खटिएका प्रहरीले तीनकुनेमा ६० राउण्ड गोली प्रहार गरेको खुलेको छ । जसमा ५८ राउण्ड राइफल र दुई राउण्ड पेस्तोलबाट प्रहार गरेको प्रहरी स्रोतले जनायो । भीड तितरवितर पार्न प्रहरीले ७४६ थान अश्रुग्यास प्रहार गरेको जिल्ला प्रहरी परिसर काठमाडौंले जानकारी दिएको छ ।
उक्त घटनामा परी पत्रकार सुरेश रजक र आन्दोलनमा सहभागी सविन महर्जनको मृत्यु भएको थियो । सविनलाई गोली लागेको पुष्टि भइसकेको छ भने रजकको पोस्टमार्टम हुन बाँकी नै छ । प्रदर्शनमा ५२ जना प्रदर्शनकारी घाइते भएका थिए । सुरक्षाकर्मीतर्फ ५६ जना प्रहरी घाइते भएका थिए । सरकारले चैत १५ गतेका प्रदर्शनका क्रममा घाइते भएकाकोे निःशुल्क स्वास्थ्य उपचारको व्यवस्था स्वास्थ्य तथा जनसंख्या मन्त्रालयले मिलाउने निर्णय गरेको छ । उक्त घटनाका सम्बन्धमा सत्यतथ्य छानविन गरी दोषीउपर कारबाही गर्न र आगामी दिनमा यस किसिमको घटना हुन नदिने व्यवस्था मिलाउन गृह मन्त्रालयलाई निर्देशन दिने निर्णय गरेको छ ।
यसैगरी प्रहरीले लुटपाट तथा आगजनीमा संलग्न रहेको अभियोगमा थप २४ जनालाई पक्राउ गरेको छ । यसअघि ४१ जनालाई प्रहरीले नियन्त्रमा लिइसकेको जिल्ला परिसर काठमाडौंका प्रवक्ता एवं प्रहरी उपरीक्षक बोहराले जानकारी दिए । ‘उक्त घटनामा संलग्न रहेको अभियोगमा थप २४ जना पक्राउ परेका छन्, यसअघि ४१ जनालाई पक्राउ गरी म्याद थप गरेर अनुसन्धान अघि बढाइएको छ,’ उनले भने ।
