- भारतस्थित नेपाली दूतावासको सहयोगमा लम्सालको शव बुधबार साँझ भैरहवा ल्याएको जानकारी
- परराष्ट्रमन्त्री डा. आरजु राणा देउवाले यस प्रकरणबारे ओडिसाका उच्च शिक्षामन्त्रीसँग गरिन् कुराकानी
- लम्सालको मृत्युको निष्पक्ष अनुसन्धान र दोषीमाथि कानुनी कारबाही गर्न आग्रह
- नेपाली विद्यार्थीहरूलाई सुरक्षित वातावरणसहित पठनपाठनको व्यवस्थाका लागि आग्रह
- १०० जनाभन्दा बढी विद्यार्थी नेपाल फर्किए
काठमाडौं– भारतको कलिंगा इन्स्टिच्युट अफ इन्डस्ट्रियल टेक्नोलोजी (किट) विश्वविद्यालयमा मृत भेटिएकी नेपाली छात्रा प्रकृति लम्सालको शव भैरहवास्थित घर ल्याइएको छ । भारतस्थित नेपाली दूतावासको सहयोगमा लम्सालको शव बुधबार साँझ भैरहवा ल्याएको रुपन्देही प्रहरी प्रवक्ता सुरज कार्कीले बताए ।उनका अनुसार प्रकृतिको शव भैरहवामा रहेको युनिभर्सल मेडिकल कलेजमा राखिएको छ । प्रकृतिको शंकास्पद मृत्यु भएको खबर आएपछि बुबा सुनिल लम्साल ओडिसा पुगेका थिए ।
मेकानिकल इञ्जिनियरिङमा स्नातक गरिरहेकी प्रकृतिको शव आइतबार साँझ विश्वविद्यालयको छात्रवासमा झुन्डिएको अवस्थामा फेला परेको थियो । रुपन्देही घर भएकी २० वर्षीया लम्साल मृत अवस्थामा भेटिएपछि त्यहाँ रहेका नेपाली विद्यार्थीले निष्पक्ष छानबिन हुनुपर्ने माग गरेका थिए । त्यसपछि विश्वविद्यालय प्रशासनले नेपाली विद्यार्थीलाई छात्रवासबाट जबरजस्ती निकालेर कट्टाकस्थित रेल स्टेसनमा छाडिदिएको थियो । प्रशासनका कर्मचारीले नेपाली विद्यार्थीलाई सित्तैमा पढाएको भन्दै दुव्र्यवहार गरेको थियो ।
लम्सालको मृत्यु र नेपाली विद्यार्थीलाई विश्वविद्यालय प्रशासनले गरेको अभद्र व्यवहारको चौतर्फी विरोध भएसँगै नेपाल सरकार र नयाँ दिल्लीस्थित भारतीय दूतावासले यसबारे चासोका साथ कूटनीतिक पहल थालेको थियो । त्यसपछि प्रशासनले दुव्र्यवहार गर्ने कर्मचारीलाई विश्वविद्यालयबाट निलम्बन गरिएको थियो । प्रशासनले नेपाली विद्यार्थीहरुसँग गरिएको दुव्र्यवहारको घटनामा माफीसमेत मागेको छ । मंगलबार एक वक्तव्य जारी गर्दै क्याम्पसका उपकुलपति प्रा. सरनजीत सिंहले विद्यार्थीहरुप्रति गरिएको व्यवहारबाट विश्वविद्यालय प्रशासन दुःखी भएको जनाएको हो ।
यस प्रकरणमा किटले विश्वविद्यालयका सुरक्षा गार्डहरूलाई पक्राउ गरी निलम्बन गरिएको जनाएको छ । त्यसैगरी पीडक भनिएका आदिक श्रीवास्तावलाई फौजदारी मुद्दा चलाएको ओडिसा प्रहरीले जनाएको छ ।परराष्ट्रमन्त्री डा. आरजु राणा देउवाले बुधबार यस प्रकरणबारे ओडिसाका उच्च शिक्षामन्त्रीसँग फोनमा कुराकानी गरेकी छन् । ओडिसाका उच्च शिक्षामन्त्री सूर्यवंशी सुरजसँग लम्सालको मृत्युको निष्पक्ष अनुसन्धान र दोषीमाथि कानुनी कारबाहीका साथै त्यहाँका नेपाली विद्यार्थीहरूलाई कलेजमा सुरक्षित वातावरणसहित पठनपाठनको व्यवस्थाका लागि आग्रह गरेको उनको निजी सचिवालयले जनाएको छ ।
विश्वविद्यालयले नेपाली विद्यार्थीलाई फोन, म्यासेज र मेलमार्फत विश्वविद्यालय फर्किन अनुरोध गर्दै आएको छ । करिब १२०० नेपाली विद्यार्थी उक्त विश्वविद्यालयमा अध्ययनरत थिए । यसमध्ये १०० जना नेपाल फर्किसकेका छन् । त्यहाँको सुरक्षा अवस्था ठीक नरहेको भन्दै नेपाली विद्यार्थी फर्कन मानिरहेका छैनन् ।
-1752335779.jpg)
