- हाइड्रोजन ग्यास भरिएको बेलुन विष्फोट हुँदा अर्थमन्त्री विष्णु पौडेल र पोखराका मेयर धनराज आचार्य जलेर घाइते
- कीर्तिपुरस्थित बर्न अस्पतालको सघन कक्षमा उपचार जारी
- दुवैको अनुहारमा पाँच–छ प्रतिशत जलन भएको अस्पतालको भनाइ
काठमाडौं– हाइड्रोजन ग्यास भरिएको बेलुन पड्किँदा उपप्रधान तथा अर्थमन्त्री विष्णु पौडेल र पोखराका मेयर धनराज आचार्य घाइते भएका छन् । ‘पोखरा भ्रमण वर्ष २०२५’ को उद्घाटन गर्नेक्रममा शनिबार बेलुनको झुप्पा उडाउन लाग्दा फायर क्यान्डिल (स्पाकर्लर्स)बाट निस्किएको झिल्कामा परेर विष्फोट भएको थियो । विष्फोटपछि निस्किएको आगोको ज्वालाले मन्त्री पौडेल र मेयर आचार्यको अनुहार जलेको हो ।
उनीहरु दुवैको काठमाडौंको कीर्तिपुरस्थित बर्न अस्पतालको सघन कक्षमा उपचार भइरहेको छ । अर्थमन्त्री पौडेलका स्वकीय सचिव याम पाण्डेका अनुसार पौडेलको घाँटीको पछाडिको भाग, हात र ओठमा जलनको असर देखिएको छ ।बेलुन पड्किएर ठूलो आगो बलेपछि अर्थमन्त्री पौडेल मञ्चतर्फ दौडिएका थिए । सुरक्षाकर्मीले तत्कालै आगोको झिल्का छ कि भनेर टकटक्याएका थिए । बेलुन पड्केर ठूलो आगो बलेपछि मेयर आचार्य मञ्चको तलतर्फ हामफालेका थिए । आगोको लप्कोले मेयर आचार्यको गाला र कानमा असर गरेको पोखराकी उपमेयर मञ्जु गुरुङले बताइन् ।
अस्पतालले शनिबार साँझ विज्ञप्ति जारी गर्दै दुवै जना खतरामुक्त रहेको जनाएको छ । ‘उहाँहरूको प्रारम्भिक मूल्यांकनअनुसार पाँच–छ प्रतिशत जलेको तर अनुहारमा जलन भएकोले श्वास नली र फोक्सोमा असर पर्न सक्ने सम्भावना रहेकोले उच्च निगरानीमा उपचार गर्नुपर्ने आवश्यकता देखिन्छ,’ अस्पतालले जारी गरेको विज्ञप्तिमा छ । हाइड्रोजन ग्यासलाई निकै ज्वलनशील मानिन्छ । हाइड्रोजन भरिएका बेलुन आगो (झिल्को आइरहेको स्पाकर्लर्स) नजिक लैजाँदा दुर्घटना भएको ठानिएको छ । पोखरा भ्रमण वर्ष उद्घाटनको क्रममा सामान्य सावधानीसमेत नअपनाउँदा दुर्घटना भएको प्रहरीले जनाएको छ ।
हाइड्रोजन ग्यास अत्यन्त प्रज्वलनशील पदार्थ भएको र हलुका हुने भएकोले बेलुन उढाउन त्यसको प्रयोग गर्ने गरिन्छ । हलुका हुने भएका कारण बेलुन आकाशमा उडाउन नेपालमा हाइड्रोजन भर्ने अभ्यास रहेको छ । आकाशमा उडाइने बेलुनमा हिलियम ग्यासको प्रयोग सुरक्षित मानिन्छ । हिलियम भने महँगो पर्ने भएका कारण बेलुन भर्ने ठाउँहरूमा हाइड्रोजनको प्रयोग गर्ने गरिएको छ । जबकि, मुखले फुलेर बनाइएका बेलुन भए दुर्घटनाको जोखिम नहुने विज्ञहरू बताउँछन् । तर, पोखरामा भने हाइड्रोजन ग्यास भरिएको दीप प्रज्वलित बेलुन उडाउनका लागि प्रयोग गरिएको थियो, जुन विष्फोट भयो, अर्थमन्त्री पौडेल र मेयर आचार्य घाइते भए ।
उनीहरूको उपचारका लागि कीर्तिपुर ल्याइएपछि पोखरा भ्रमण वर्ष उद्घाटनमा संस्कृति, पर्यटन तथा नागरिक उड्डयनमन्त्री बद्री पाण्डे, गण्डकीका मुख्यमन्त्री सुरेन्द्रराज पाण्डेलगायत मात्रै रहे ।
