- सरकारी ३९ र निजी क्षेत्रबाट ४८ गरी ८७ जनाको जम्बोटोली लिएर जाँदै प्रधानमन्त्री
- चीन भ्रमणको एजेण्डा मन्त्रिपरिषद्को अर्को बैठकले टुंगो लगाउने
काठमाडौं– प्रधानमन्त्री केपी शर्मा ओलीको आसन्न चीन भ्रमण मन्त्रिपरिषद्को बैठकबाट स्वीकृत भएको छ । बिहीबार सिंहदरबारमा बसेको मन्त्रिपरिषद् बैठकले प्रधानमन्त्री ओलीको नेतृत्वमा हुने चीन भ्रमणलाई स्वीकृत गरेको हो ।
संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले यही मंसिर १७ देखि २० गतेसम्म प्रधानमन्त्री ओली नेतृत्वको चीन भ्रमणलाई स्वीकृत गर्ने निर्णय गरेको बैठकपछि जानकारी दिए । प्रधानमन्त्रीको टोलीमा ८७ जना सहभागी हुने तय भएको छ । जसमा ३९ जना सरकारी टोलीमा रहने छन् भने ४८ जना निजी क्षेत्रका प्रतिनिधिहरु रहने बताइएको छ । भ्रमण स्वीकृत भए पनि सरकारले एजेण्डा भने अझै तय गर्न सकेको छैन ।
‘प्रधानमन्त्रीको चीन भ्रमणका एजेण्डाबारेमा थप छलफल जारी छ, एजेण्डा तय भइसकेको छैन, भ्रमण दल र प्रधानमन्त्रीको भ्रमण स्वीकृत भएको छ,’ मन्त्री पाण्डेले भने । भ्रमणमा निजी क्षेत्रको ठूलो उपस्थिति रहेको र उनीहरु आफ्नै खर्चमा जाने उनले बताए । ‘निजी क्षेत्र आफ्नै खर्चमा जाने हो, सरकारलाई आर्थिक दायित्व पर्दैन, टोलीमा केही जरुरी व्यक्तिŒवहरु मात्रै हुनुहुन्छ,’ मन्त्री पाण्डेले भने ।
प्रधानमन्त्री ओलीको चीन भ्रमणको एजेण्डा मन्त्रिपरिषद्को अर्को बैठकले टुंगो लगाउने उनको भनाइ थियो । मन्त्री पाण्डेले मन्त्रिपरिषद्मा अन्य विषयका बारेमा छलफल भए पनि निर्णय नभएको बताए ।प्रधानमन्त्रीको भ्रमण टोलीमा प्रधानमन्त्री पत्नी राधिका शाक्य, परराष्ट्रमन्त्री आरजु राणा देउवा, प्रधानमन्त्रीका मुख्य सल्लाहकार विष्णु रिमाल, आर्थिक सल्लाहकार युवराज खतिवडा अटेका छन् ।
यसैगरी कांग्रेसदेखि अरु पार्टीका सांसदहरु पनि यो टोलीमा अटाइएको छ । सांसद अर्जुन नरसिंह केसी, श्यामकुमार घिमिरे, लिलानाथ श्रेष्ठ, बिजुला रायमाझी, रेखा शर्मा, वीरेन्द्रप्रसाद महतो, दीपक कार्की, सर्वेन्द्रनाथ शुक्ला, रञ्जिता श्रेष्ठ, मुख्यसचिव एकनारायण अर्याल, सचिवहरू रामप्रसाद घिमिरे, अमृतबहादुर राई (परराष्ट्र कामु सचिव) पनि टोलीमा छन् ।
यसैगरी लगानी बोर्डका प्रमुख कार्यकारी अधिकृत सुशील ज्ञवाली, मदन भण्डारी विज्ञान तथा प्रविधि विश्वविद्यालयका सहप्राध्यापक पद्मसुन्दर जोशी, प्रधानमन्त्रीका निजी चिकित्सक दिव्यासिंह शाह, प्रमुख स्वकीय सचिव राजेश बज्राचार्यसहित अन्य सरकारी अधिकारीहरू कृष्णप्रसाद ढकाल, विष्णुप्रसाद गौतम, मणिरत्न शर्मा, उदय पोखरेल, कमल रावल, ऋचा भट्टराई, जानकी ओझा, सुजन लामिछाने, विनोद खनाल, जयश्री शाक्य र अनिता सिंह रहने छन् ।
