- सिन्धुली, धादिङ, जुम्ला, दैलेखलगायतका जिल्लामा भएको दुर्घटनामा पाँच जनाको मृत्यु, दर्जनौं घाइते
- पर्वको समयमा बाढीपहिरोले क्षतिग्रस्त सडक, तीव्र गति, मापसेजस्ता कारण दुर्घटना बढेको प्रहरीको भनाइ
- हालैको वर्षाका कारण आएको बाढीपहिरोले मुख्य राजमार्गमा ठप्प भएसँगै वैकल्पिक राजमार्गमा चाप बढ्दा पनि दुर्घटना बढ्दो
काठमाडौं– दसैं मनाउन काठमाडौंलगायत सहरबाट गाउँ फर्कने क्रम बढ्दो छ । यही क्रममा दैनिक सडक दुर्घटनाको संख्या पनि बढेको छ ।मंगलबार काठमाडौंबाट सिन्धुली जाँदै गरेको बस रामेछापमा दुर्घटना हुँदा एक जनाको मृत्यु भएको छ । दुर्घटनामा परेर १६ जना घाइते भएका छन् । घाइतेमध्ये दुई जनाको अवस्था गम्भीर रहेको प्रहरीले जनाएको छ । प्रदेश–३–०१–००५ ख ९५७९ नम्बरको यात्रुवाहक बस खाँडादेवी गाउँपालिका–३ भीरपानीमा दुर्घटना भएको हो ।
जिल्ला प्रहरी कार्यालय रामेछापका डिएसपी प्रदीप सिंहका अनुसार मृत्यु हुनेमा रामेछापको सुनकोशी गाउँपालिका–६ की युनिषा श्रेष्ठ रहेकी छन् ।मदन भण्डारी राजमार्ग सिन्धुलीमा मंगलबार विभिन्न स्थानमा सडक दुर्घटना भएका छन् । उक्त राजमार्गमा कार पल्टनुका साथै सुमो र बाइक दुर्घटना भएको छ । सडक घुमाउरो भएकाले यस क्षेत्रमा दुर्घटना बढेको प्रहरीले जनाएको छ । मंगलबार नै रामेछापको मन्थलीमा सुमो पल्टिँदा यात्रुहरु घाइते भएका छन् ।
यता धादिङको परेवाटार नजिक बलेरो दुर्घटना हुँदा छ जना घाइते भएको जिल्ला प्रहरी कार्यालय धादिङले जनाएको छ ।मंगलबार नै जुम्लामा मोटरसाइकल दुर्घटना हुँदा एक जनाको मृत्युु भएको छ । तिला गाउँपालिका–३ स्थित त्रिवेणीबाट तातोपानी गाउँपालिका–७ सर्मीतर्फ जाँदै गरेको क१प १६०५ नम्बरको मोटरसाइकल दुर्घटना हुँदा तातोपानी–७ सर्मी गाउँका अन्दाजी ३१ वर्षीय हेमराज कुँवरको मृत्यु भएको जिल्ला प्रहरी कार्यालय जुम्लाका सूचना अधिकारी भानुभक्त अर्यालले जानकारी दिए ।
मोटरसाइकल सडकबाट अन्दाजी १६० मिटर तल भेरी खोलाको छेउमा खसेको जिल्ला प्रहरी कार्यालय जुम्लाले जनाएको छ । दुर्घटनामा परी हेमराजका छोरा अन्दाजी नौ वर्षीय परिश्रमको कर्णाली स्वास्थ्य विज्ञान प्रतिष्ठानमा उपचार भइरहेको जिल्ला प्रहरी कार्यालय जुम्लाले जनाएको छ । यसअघि सोमबार सिन्धुलीमा बस दुर्घटनामा परी दुई जनाको मृत्यु भएको थियो ।
काठमाडौंबाट भोजपुर जाँदै गरेको बागमती प्रदेश ०१–००६ ख ६७८५ नम्बरको बस सिन्धुलीको हरिहरपुरगढी–५ स्थित द्वार खोलाको पुलमा ठोक्किएर दुर्घटना हुँदा दुई जनाको मृत्यु भएको हो । बस दुर्घटनामा परी चालकसहित ४५ जना घाइते भए । तीमध्ये २८ जना भने उपचार भएपछि घर फर्किएको प्रहरीले जनाएको छ । अन्य घाइतेहरुको भने कपिलाकोट स्वास्थ्यचौकी, धरानको घोपा अस्पताल र जानकी हेल्थकेयरमा उपचार भइरहेको जनाइएको छ ।
सोमबार राति दैलेखमा हायस दुर्घटना हुँदा एक युवाको मृत्यु भयो । दैलेख प्रहरीका अनुसार सुर्खेतबाट चामुण्डाबिन्द्रासैनीको चाल्ने चौतारातर्फ जाँदै गरेको कर्णाली प्रदेश ९२००१ ख ०९०६ नम्बरको हायस (एसएमएल) सोमबार राति ९ बजेतिर दुर्घटना भएको हो । २३ जना यात्रु रहेको उक्त गाडीका बाँकी यात्रु भने सकुशल रहेको प्रहरीले जनाएको छ ।
पर्वको समयमा बाढीपहिरोले क्षतिग्रस्त सडक, तीव्र गति, चालकले मादक पदार्थ सेवनजस्ता कारण दुर्घटना बढेको काठमाडौं उपत्यका ट्राफिक प्रहरी कार्यालयका प्रमुख प्रहरी नायव महानिरीक्षक भरतबहादुर बोहराले बताए । उनले चाडपर्वको सुरक्षालाई लक्षित गरी ट्राफिक व्यवस्थापनलाई थप प्रभावकारी गर्ने निर्देशन दिएको जनाए ।
‘प्रभावकारी ट्राफिक व्यवस्थापन र दुर्घटना न्यूनीकरणका लागि जिम्मेवार भई सडकमा खट्न हामीले ट्राफिक प्रहरीलाई हरेक सडकमा खटाएका छौं,’ ट्राफिक महाशाखा प्रमुख बोहराले भने । हरेक जिल्लामा पनि जिल्ला ट्राफिक कार्यालयले दुर्घटना न्यूनीकरणका लागि सहजीकरण गरिरहेको उनको भनाइ थियो ।असोज १० गतेदेखि लगातार तीन दिन परेको वर्षाका कारण आएको बाढीपहिरोले मुख्य राजमार्गमा ठप्प भएसँगै वैकल्पिक राजमार्गमा चाप बढ्दा पनि दुर्घटना बढेको ट्राफिक प्रहरीको ठम्याइ छ । वर्षाका कारण आएको बाढी र पहिरोका कारण बीपी राजमार्ग अवरुद्ध छ भने वैकल्पिक राजमार्ग हुँदै दसैं मान्न गाउँ जानेको लर्को लागेको छ ।
पछिल्लो दिनहरुमा दुर्घटनाको दर घढ्दो क्रममा रहेका ट्राफिक प्रहरी कार्यालयको तथ्यांकमा उल्लेख छ । आर्थिक वर्ष २०७९/८० मा १० हजार ६७५ दुर्घटना हुँदा १८७ जनाको मृत्यु भएको थियो । अघिल्लो आर्थिक वर्षमा यो दर घटेर आठ हजार ८८१ पुगेको थियो भने १७७ जनाको मृत्यु भएको थियो । यस आर्थिक वर्षमा त्रिभुवन राजमार्गमै पहिरोमै परेर एक सय यात्रुको मृत्यु भइसकेको छ भने पछिल्लो दुर्घटना दर पनि बढ्दो छ ।
