काठमाडाैं - पर्वतीय पर्यटन राष्ट्रका एकमात्र मौलिक उद्योग रहेको जसबाट राज्यलाई राजश्व संकलनमा टेवा पुर्याएको नेपाल पर्वतारोहण संघका अध्यक्ष निमा नुरु शेर्पाले बताएका छन् ।मंगलबार काठमाडाैंकाे एलिस रिसेप्सनमा संघको ३४ औं केन्द्रीय वार्षिक साधारण सभा उनले साे बताएका हुन् ।
सरकार र सराेकारवालासँग ५७ वटा हिमालहरुको खोल्नको लागि सिफारिस गरेकाे उनले बताए । 'आलु मात्र फल्ने क्षेत्रमा बसोबास गर्ने मानिसहरुको जनजिविका चलाउन सहज भएको छ । सामान्य कर्मचारीहरु हिमाल आरोहणको लागि सम्पर्क अधिकृत भएर जान पाउने अवसर पनि प्राप्त भएको छ । तसर्थ पर्वतीय पर्यटन बचाउनको लागि नेपाल पर्वतारोहण संघ बच्न जरुरी रहेकाे उनकाे जिकिर छ ' उनले भने ।
नेपालको एक मात्र अल्पाइन क्लवको रुपमा रहेको यस संघले पर्यटन ऐन २०३५ मा व्यवस्था बमोजिम ५८०० मि– ६५००० मि सम्मका विभिन्न हिमालहरुको आरोहण अनुमति व्यवस्थापन गर्दै आएकाे छ ।
नेपाल पर्वतारोहण संघले मिति २०३४।१०।५ को मन्त्रिपरिषदको निर्णयानुसार १८ वटा हिमचुलीहरुको आरोहण अनुमति व्यवस्थापन गर्दै आइरहेकोमा नेपाल सरकारले यस संघलाई पर्वतीय क्षेत्रमा अझ बढी कार्य गर्न सकोस् भन्ने उद्देश्यले मिति २०५९।५।३१ को मन्त्रिपरिषदको निर्णयानुसार थप १५ वटा चुलीहरुको आरोहण अनुमति व्यवस्थापन गर्ने अख्तियार प्रत्येक ५ वर्षमा नविकरण गर्नु पर्ने गरी प्रदान गरेकाे थियाे । तसर्थ जम्मा ३३ वटा हिमालहरुको आरोहण अनुमति व्यवस्थापन गर्दै आइरहेकाे छ ।
नेपाल सरकारले ५५०० मि. भन्दा मुनिका हिमचुलीहरुलाई पर्वतारोहण तथा पदयात्रा चुली बाट हटाउने निर्णय गरेपछि संघको व्यवस्थापकीय जिम्मामा हाल २७ वटा हिमचुलीहरु रहेका छन् ।
अध्यक्ष शेर्पाले भने,' नेपाल पर्वतारोहण संघ स्थापना भएको ५० वर्ष पुरा भएको उपलक्ष्यमा गत वर्ष एसियाली पर्वतारोहण महासंघको वार्षिक साधारण सभा काठमाडौंमा सफलतापूर्वक आयोजना गरेका छौँ । २० वटा एसियाली देशका ३० जना प्रतिनिधिहरु उपस्थितभै पर्वतीय वातावरण, पर्वतीय पर्यटनका सम्वन्धमा छलफल भएको उक्त सम्मेलन नेपालमा आयोजना हुनु हाम्रो लागि ठूलो उपलब्धी भएको महसुस हामीले गरेका छौँ । ' कार्यक्रममा उनले नेपाल पर्वतारोहण संघ संस्कृति, पर्यटन तथा नागरिक उड्डयन मन्त्रालयको निर्देशानुसार कामहरु अगाडी बढाउन हर समय तयार रहने प्रतिबद्वता व्यक्त गरेका छन् ।
उक्त कार्यक्रममा विशेष अतिथिमा संस्कृति, पर्यटन तथा नागरिक उड्डयन राज्यमन्त्री–अरुणकुमार चौधरी , सविच डा.गणेशप्रसाद पाण्डेय, सचिव, पर्यटन तथा नागरिक उड्डयन मन्त्रालय,पर्यटन विभागका महानिर्देशक डा. नारायण प्रसाद रेग्मी,संघका प्रमुख सल्लाहाकार तथा सल्लाहाकारहरु,पूर्व पर्यटन मन्त्रीहरु,प्रतिनिधि सभाका माननीय सदस्यहरु, संस्कृति, पर्यटन तथा नागरिक उड्डयन मन्त्रालयका उच्च पदस्थ कर्मचारीहरु
साधारण सदस्यहरु,पत्रकारहरुकाे उपस्थिति रहेकाे थियाे ।
