काठमाडौं– नेपाल प्रहरीका पूर्वडिआइजी रमेश खरेलले नेपाल विद्युत् प्राधिकरणका कार्यकारी निर्देशक कुलमान घिसिङविरुद्ध अख्तियार दुरुपयोग अनुसन्धान आयोगमा उजुरी दिएका छन् । प्रहरी सेवामा बहाल छँदा श्रीमतीको नाममा सुराक भत्ता थापेर खाएको आरोपमा विवादित बनेका उनले घिसिङविरुद्ध भ्रष्टाचारको आरोप लगाउँदै उजुरी दिएका हुन् ।
राज्यलाई करोडौं रुपैयाँ घाटा हुनेगरी ऊर्जा उत्पादक कम्पनीसँग विद्युत् खरिदका लागि पिपिए गरेको उजुरीमा उल्लेख गरेका छन् । खरेलले सामाजिक सञ्जालमार्फत आफ्नो उजुरीको सबै व्यहोरा सार्वजनिक गरेका छन् । उनले ६६ वटा कम्पनीसँग कानुनविपरीत घिसिङले पिपिए गर्दा सरकारको खातामा आउने एक करोड १७ लाख २६ हजार रुपैयाँ राजस्व गुमेको उजुरीमा उल्लेख छ । घिसिङले २०७५ र २०७६ सालको विभिन्न मितिमा विभिन्न ऊर्जा उत्पादक कम्पनीहरूसँग नियमविपरीत ‘पावर पर्चेज एग्रिमेन्ट’ गरेको उनको जिकिर छ । उनले ती कम्पनीसँग विद्युत् नियमन आयोगको स्वीकृतिविना पिपिए गर्दा विद्युत् नियमन आयोगको खातामा जम्मा गर्नुपर्ने उक्त रकम गुमाउनुपरेको आरोप लगाएका हुन् ।
विद्युत् खरिद सम्झौतामा सहमति दिँदा विद्युत् नियमन आयोगले शुल्क लिनुपर्छ । उक्त रकम पाएपछि मात्र प्राधिकरणले पिपिए गर्न पाउँछ । तर, प्राधिकरणका कार्यकारी निर्देशक घिसिङले आयोग ऐन बनिसकेपछि पनि ऐनलाई नै मात खुवाउँदै आफूखुसी पिपिए गरेको खरेलले उजुरीमा उल्लेख गरेका छन् ।
आयोग ऐन बनेको एक वर्षपछि पनि प्राधिकरणले आयोगको स्वीकृतिविना नै पिपिए गरेर राज्यलाई करोडौंको नोक्सानी गराएको भनिएको छ । खरेलका अनुसार १७ मंसिर २०७४ गतेबाट विद्युत् नियमन ऐन लागू भए पनि घिसिङले ६२ वटा ऊर्जा उत्पादकसँग २०७५ मा र चारवटा ऊर्जा उत्पादकसँग २०७६ सालमा पिपिए गराएका थिए । उनले डेडिकेटेड र ट्रंकलाइनको विवादमा सरकारले गठन गरेको आयोगले तयार पारेको प्रतिवेदनको केही अंशलाई जोडेर घिसिङले तयार गरेको बिललाई फेरि हिसाब गरेर यकीन गर्न माग गरेका छन् ।
आयोगको प्रतिवेदनअनुसार छुट महसुलका लागि जुन बिल प्राधिकरणले पठाएको थियो, त्यो बिलमा उल्लेख गरिएको रकम नै झूठो भएको उनको दाबी छ । आयोगले नियमित महसुल बुझाउन बाँकी नरहेको भन्दै अतरिक्त महसुलमा विवाद भएको उल्लेख गरेको पनि उल्लेख छ । घिसिङले अर्बौं सम्पत्ति जोडेको र सम्पत्तिमाथि पनि छानबिन गर्न उजुरीमा माग गरेका छन् । खरेलले पहिल्यैदेखि नै प्राधिकरणका कार्यकारी निर्देशक घिसिङको आलोचना गर्दै आएका छन् । मंगलबार भने उनले अख्तियारमा उजुरी दायर गरेका हुन् ।
अख्तियार प्रवक्ता नरहरि घिमिरेले खरेलले घिसिङविरुद्ध उजुरी दिएको पुष्टि गरे । ‘उहाँ (खरेल)ले उजुरी दिनुभएको छ । उजुरीउपर हामी अध्ययन गर्दैछौं,’ घिमिरेले भने । केही दिनअघि प्रधानमन्त्री केपी शर्मा ओलीले घिसिङविरुद्ध अख्तियार लगाउने चर्चा चलेको थियो । नभन्दै खरेल कुलमानविरुद्ध अख्तियार गुहार्न पुगे । यसलाई कतिपयले शंकाको दृष्टिले हेरेका छन् ।
