सरकार निरंकुशतातर्फ उन्मुख छ । कानुनी राज्यको विरोधमा सरकार लागेको छ । यस्तो प्रवृत्तिको विरुद्ध हामी उभिन्छौं ।
डा. प्रकाशशरण महत
प्रवक्ता, नेपाली कांग्रेस
काठमाडौं– नेपाली कांग्रेसका केन्द्रीय सदस्यहरुले सदनमा कांग्रेसको प्रस्तुति निकै कमजोर भएको भन्दै प्रश्न उठाएका छन् । बुधबार केन्द्रीय कार्यालय सानेपामा बसेको केन्द्रीय समिति र संसदीय दलको बैठकमा केन्द्रीय सदस्यहरुले यस्तो प्रश्न उठाएका हुन् ।
सहकारीको रकम अपचलनमा उपप्रधान तथा गृहमन्त्री रवि लामिछाने संलग्न रहेको पर्याप्त प्रमाण हुँदाहुँदै कांग्रेस सांसदहरुले सदनमा कुनै भूमिका खेल्न नसकेको आरोप लगाएका हुन् । ‘नीति तथा कार्यक्रम पनि सजिलै आयो, गृहमन्त्री रवि लामिछानेले बोल्ने मौका पनि पाए, हुुँदाहुँदा प्रधानमन्त्री पुष्पकमल दाहालले विश्वासको मत पनि लिन भ्याए,’ बैठकपछि एक केन्द्रीय सदस्यले भने, ‘संसदीय छानबिन समिति बनाउँछु भनेर प्रधानमन्त्रीले कांग्रेसलाई फस्ल्याङफुस्लुङ पारे ।’
नेपाली कांग्रेसका सभापति शेरबहादुर देउवा प्रतिनिधिसभामा संसदीय दलका नेता हुन् । कांग्रेस ८८ सांसदसहित प्रतिनिधिसभाको पहिलो दल हो । सहकारीको रकम ठगी प्रकरणमा कांग्रेसले दुई महिनादेखि संसदीय छानबिन समिति गठनको माग गर्दै सदन अवरोध पार्दै आएको थियो । प्रधानमन्त्री दाहाल पनि कांग्रेसको मागमा सकारात्मक देखिए । समिति गठनका लागि कानुनमन्त्री पदम गिरीको संयोजकत्वमा कार्यदल पनि बन्यो । तर कार्यादेश (टिओआर)मा कुरा नमिल्दा अझै पनि सहमति जुट्न सकेको छैन ।
कांग्रेसले समितिमा सहमहामन्त्री जीवन परियारलाई खटाएको छ । परियारले अडान राख्न नसक्दा कार्यदलमा कांग्रेसको प्रस्तुति कमजोर भएकोसमेत ती केन्द्रीय सदस्यको दाबी रह्यो । कांग्रेसको अवरोधका बीच सरकारले जेठ १ गते सरकारको नीति तथा कार्यक्रम प्रस्तुत गरिसकेको छ । यहीबीचमा जेठ ६ गते कांग्रेसले गृहमन्त्री लामिछानेलाई सदनमा बोल्ने मौका दियो । भोलिपल्टै प्रधानमन्त्री दाहालले विश्वासको मत लिए ।
तेस्रो दिन कांग्रेसको अवरोधका बीच गृहमन्त्री लामिछानेले राजनीतिक दलसम्बन्धी विधेयक फिर्ता लिए । यसरी सदनमा कमजोर भएकै कारण अब कांग्रेस सडकमा उत्रिनुपर्ने भएको ती केन्द्रीय सदस्यको दाबी थियो ।
आइतबार काठमाडौंमा प्रदर्शन
कांग्रेसले जेठ १३ गते आइतबार उपत्यका केन्द्रित प्रदर्शन गर्ने भएको छ । सहकारीको रकम अपचलन गरेको आरोप लागेका गृहमन्त्री लामिछानेमाथि अनुसन्धान गर्न दबाब बढाउन कांग्रेसले आन्दोलन गर्न लागेको हो । बुधबार सानेपास्थित केन्द्रीय कार्यालयमा बसेको केन्द्रीय समिति र संसदीय दलको बैठकले उक्त निर्णय गरेको कांग्रेस प्रवक्ता डा. प्रकाशशरण महतले बताए ।
‘सरकार निरंकुशतातर्फ उन्मुख छ । कानुनी राज्यको विरोधमा सरकार लागेको छ । यस्तो प्रवृत्तिको विरुद्ध हामी उभिन्छौं,’ कांग्रेस प्रवक्ता डा. महतले भने ।कांग्रेसले आवश्यक तयारीका लागि बुधबारको बैठकमा उपत्यकाका तीनै जिल्लाका पार्टी सभापति, भ्रातृ संगठनका प्रमुखहरुलाई आमन्त्रण गरेको थियो । प्रवक्ता महतले सरकार नै जनतालाई ठगी गर्ने, अपराधीलाई संरक्षण गर्ने, संविधान, लोकतन्त्र र लोकतान्त्रिक मूल्य मान्यतामा आक्रमण गर्दै निरंकुशतातर्फ उन्मुख रहेको आरोप लगाए । बैठकले देशभरका सहकारीपीडितलाई न्याय दिलाउन माग गरेको छ । सहकारी ठगी प्रकरणमा आरोपित गृहमन्त्री लामिछानेमाथि संसदीय छानबिनसहित ठगीमा संलग्नहरुलाई पक्राउ गरी कारबाहीको दायरामा ल्याउन कांग्रेसले माग गरेको छ ।
प्रवक्ता महतले सरकारले मिडियामाथि नियन्त्रण गर्ने, पत्रकारलाई त्रासमा राख्ने र प्रेस स्वतन्त्रतामाथि आक्रमण गर्न उद्दत देखिएको बताए । ‘कान्तिपुर मिडिया ग्रुपका अध्यक्ष कैलाश सिरोहियाविरुद्ध गृह प्रशासन जसरी प्रस्तुत भयो । त्यो प्रतिशोधपूर्ण छ भन्ने हाम्रो ठहर छ । पछिल्लो समयमा निरन्तर रुपमा कान्तिपुरले गृहमन्त्री स्वयम्ले सहकारी ठगी गरेको विषयलाई प्रस्तुत गरेकै आधारमा कान्तिपुरका अध्यक्ष सिरोहियालाई प्रतिशोधपूर्ण ढंगले पक्राउ गरिएकोप्रति हाम्रो आपत्ति छ । मिडियालाई नियन्त्रणमा लिने, त्रासमा राख्ने सरकारको नियत देखिएको छ,’ उनले भने ।
गृहमन्त्रीमाथि छानबिन गर्न राप्रपाको माग
राष्ट्रिय प्रजातन्त्र पार्टी (राप्रपा) ले उपप्रधान तथा गृहमन्त्री रवि लामिछानेमाथि छानबिन गर्न माग गरेको छ । धुम्बाराहीमा बुधबार बसेको केन्द्रीय कार्यसम्पादन समिति बैठकले गृहमन्त्री लामिछानेमाथि लागेका आरोपमाथि छानबिनको माग गरेको प्रवक्ता मोहन श्रेष्ठले जानकारी दिए ।
‘राप्रपा जुनसुकै ओहोदामा रहेका जोसुकै व्यक्तिले कानुनविपरीत गरेका कामको निष्पक्ष र न्यायिक छानबिन हुनुपर्दछ भन्नेमा प्रस्ट छ,’ राप्रपाको निर्णयमा उल्लेख छ, ‘नागरिकता प्रकरणमा जुन ढंगबाट कैलाश सिरोहियामाथि छानबिन सुरू भएको छ, त्यसैगरी गृहमन्त्री रवि लामिछानेमाथि लागेका आरोपमाथि पनि छानबिन गरिनुपर्छ भन्ने राप्रपाको धारणा रहेको छ ।’
