काठमाडौं । अभिषेक घिमिरे शिक्षा अभियन्ता हुन् । बृहत राष्ट्रिय शिक्षा अभियानका संयोजक अभिषेक घिमिरेसँग लिएको हालै लिएको एक अन्तर्वार्ता सामाजिक सञ्जालमा निकै मन पराइएको छ ।
एकै दिन उनले आफ्नो फेसबुक पेजमा राखिएको भिडियो १२ लाख जनाले हेरेका छन् । उक्त भिडियो ५५ सयपटकभन्दा बढी सेयर समेत गरिएको छ ।
के छ भिडियोमा ?
साढे २१ मिनेटको यो भिडियो न त घर झगडाको हो न त कुनै भाइरल मान्छेको विवादित विषय नै । भिडियोमा दुई बालबालिकाले शिक्षा अभियन्ता घिमिरेसँग सामुदायिक शिक्षासम्बन्धी कुराकानी गरेका छन् ।
प्रस्तोता पाल्पाको दमकडा नमुना माविमा कक्षा ७ मा अध्ययनरत ओजस्वी आचार्य र कक्षा १२ का इजन श्रेष्ठ हुन् । 'बालबालिकासँग बालबालिका' रेडियो कार्यक्रमका लागि उक्त अन्तर्वार्ता चैत ४ गते विद्यालयकै स्टुडियोमा रेकर्ड गरिएको हो । उक्त कार्यक्रम सामुदायिक रेडियो मदनपोखराबाट प्रत्येक आइतबार साँझ ५.३० बजे प्रसारण हुन्छ । यही भिडियोलाई अभिषेकले आफ्नो फेसबुक एकाउन्टमा राखेका हुन् । 'कक्षा ७ मा अध्ययनरत यी नानीको बोल्ने, प्रश्न गर्ने शैली बिबिसिजस्ता ठूला मिडियाका पत्रकारको भन्दा कम छैन I विद्यालयले प्ल्याटफर्म मात्र दिने हो भने यस्ता हजारौं, लाखौँ प्रतिभाको बिस्फोट हुनेथियो I त्यसैले, अबको युगमा सिकाइलाई तीन घन्टे परीक्षाले मात्र होइन, विश्वस्तरमा बिक्ने यस्ता सीप पनि विद्यालयले प्राथमिकताका साथ सिकाउनु जरुरी छ,' घिमिरेले यही क्याप्सन राख्दै भिडियो सेयर गरेका हुन् ।
उसो त भिडियो विभिन्न पेजले फरक फरक समयमा अपलोड गरी सेयर जारी रहेको छ । यस्तो विषय सेयर हुँदा आफूलाई निकै खुसी लागेको घिमिरे बताउँछन् । 'सकारात्मक कुरा गर्दा पनि त हुने रहेछ । सुधार र निर्माणका कुरा पनि त मानिसले रुचाउने रहेछन् I आशा जगाउने कुरा पनि त मानिसले सुन्न चाहेका रहेछन,' अर्यालले भने ।
सरकारी विद्यालयहरु बिग्रेका छन् काम छैनन् भन्नेहरुका लागि यो भिडियो कन्टेन्ट बलियो उदाहरण भएको उनको भनाई छ । 'प्राय सामुदायिक विद्यालय कमजोर हुन्छन्, सामुदायिक विद्यालय बिग्रिएका मात्र छन्, सबै भताभुंग र लथालिङ्ग मात्र छन् भन्ने भ्रम चिर्दै सामुदायिक विद्यालय उत्कृष्ट बन्दैछन् , विश्व स्तरीय बन्दै छन् , प्रतिष्पर्धी बन्दै छन् भन्ने संदेश दिन यो भिडियो सफल भएको छ भन्ने मलाई लागेको छ,' उनले भने ।
दमकडा मावि पाल्पाको उत्कृष्ट सामुदायिक विद्यालयको सूचीमा पर्दै आएको छ । तानसेन नगरपालिका ९ दमकडामा रहेको दमकडा माध्यमिक विद्यालयले जिल्लामै पहिलो पटक सामुदायिक विद्यालयतर्फ ब्रिटिस काउन्सिलले प्रदान गर्ने इन्टरनेसनल स्कूल अवार्ड २०२०–२३ पाएको छ । कक्षा १ देखि नै अंग्रेजी माध्यमबाट पढाई हुने यो विद्यालयमा १ देखि १२ सम्म १०१० विद्यार्थी रहेको अध्यक्ष राजेशकुमार अर्यालले बताए ।
विद्यार्थीका लागि दमकडाले ४ वर्षअघिबाट बालबालिकासँग बालबालिका कार्यक्रम सञ्चालनमा ल्याएको थियो । अहिले दमकडा माविको आफ्नै रेकर्डिङ स्टुडियोसमेत छ । उक्त कार्यक्रम हिजोआज लुम्बिनी प्रदेशका विभिन्न रेडियो स्टेसनबाट माग आउने गरेको अध्यक्ष अर्यालले बताए । सामुदायिक विद्यालयलाई हेर्ने आम मानिसको धारणा सकारात्मक बनाउन यो भिडियोले सहयोग पुगेको अभियानका क्रिएटिभ डाइरेक्टर छेडुप लामाले बताए ।
