- कांग्रेस केन्द्रीय कार्यालय सानेपामा आज बिहान ११ बजे पार्टी सभापति शेरबहादुर देउवाले सम्मेलनको उद्घाटन गर्ने
- ‘अन्तर्राष्ट्रिय राजनीति र कूटनीतिमा बिपी’ शीर्षकमा पूर्वप्रधानमन्त्री डा. बाबुराम भट्टराई, प्रदीप ज्ञवालीलगायतसँग विमर्श
- अन्तिम दिन मंगलबार ‘परिवारले बुझेको बिपी’ शीर्षकमा डा. शेखर कोइराला, सुजाता कोइराला र डा. शशांक कोइरालाले अनुभव बाँड्ने
काठमाडौं– नेपाली कांग्रेसको आयोजनामा आजबाट बिपी साहित्य सम्मेलन सुरु हुँदै छ । ललितपुरको सानेपास्थित कांग्रेस केन्द्रीय कार्यालयमा बिहान ११ बजे पार्टी सभापति शेरबहादुर देउवाले सम्मेलनको उद्घाटन गर्ने कार्यक्रम छ ।
उद्घाटनअघि पत्रकार जगत नेपालले तयार पारेको ‘हाइज्याकिङ फर डेमोक्रेसी’ वृत्तचित्र प्रदर्शन हुनेछ । उद्घाटनपछि अभि सुवेदीले बिपीको साहित्य सिर्जना र जीवन दर्शन विषयमा विश्लेषण गर्नेछन् । त्यसैगरी विश्लेषकहरु सिकेलाल, कृष्ण खनाललगायतको सहभागितामा महामन्त्री ‘बिपीको दृष्टिमा बिपी’ कार्यक्रम तय भएको छ ।
महोत्सव कांग्रेस केन्द्रीय कार्यालयको आयोजना, नेपाली लेखक संघको संयोजन एवं निरन्तर शनिबार, नेपाल सांस्कृतिक संघ र फाइन आर्टको सहयोगमा हुन लागेको हो । महोत्सवको पूर्णतयारी सम्पन्न भएको महोत्सवलाई सम्पन्न गर्न गठन गरिएको मूल तयारी समितिका संयोजक एवं कांग्रेस सहमहामन्त्री बद्रीप्रसाद पाण्डेले जानकारी दिए ।
दोस्रो दिन भारतबाट आइपुगेका आनन्द कुमारसँग शंकर तिवारीले साक्षात्कार गर्नेछन् । भारतीय प्राध्यापक कार्यक्रमका लागि शुक्रबार नै काठमाडौं उत्रिसकेका छन् । उनले ‘माक्र्स, गान्धी एण्ड क्वेस्ट फर डेमोक्रेटिक सोसालिजम टुडे’ शीर्षकमा आफ्नो भनाइ राख्नेछन् । सोमबार बिपीले नपाएका १५ वर्ष शीर्षकमा हरि शर्मा, विपिन अधिकारी, अच्युत वाग्ले, मञ्चला झाले महामन्त्री गगन थापाको साथमा मन्थन गर्नेछन् ।
त्यसपछि ‘बिपीको आख्यानमा मधेस’ शीर्षकमा सनत रेग्मी, नयनराज पाण्डे र प्रा. सञ्जीता बर्माले बहस गर्ने कार्यतालिका रहेको छ । ‘अन्तराष्ट्र्रिय राजनीति र कूटनीतिमा बिपी’ शीर्षकमा पूर्वप्रधानमन्त्री डा. बाबुराम भट्टराई, प्रदीप ज्ञवालीलगायतसँग पत्रकार सुधीर शर्माले विमर्श गर्नेछन् ।
त्यसैगरी सोही दिन ‘युवा स्रस्टामा बिपी पठन’ विषयमा साहित्यकारहरु बुद्धिसागर, रामलाल जोशी, सरस्वती प्रतीक्षा र सुविन भट्टराईसँग पत्रकार बसन्त बस्नेतले बहस गर्नेछन् ।सोही दिन ३० जना कलाकारसहितको गजल साँझसमेत हुनेछ । तीन दिने कार्यक्रम भव्य हुने महामन्त्री थापाले बताए । ‘तीन दिन कविता वचन हुन्छ । गजल वाचन हुन्छ । तीन दिनसम्म भव्य चल्नेछ । बिपीलाई भेट्ने चाहना छ भने सानेपामा आउनुहोला,’ थापाले भने ।
अन्तिम दिन मंगलबार केदारभक्त माथेमाले बिपीको समाजवादी परिकल्पनामा शिक्षा विषयमा मन्तव्य दिने कार्यतालिका रहेको छ । सोही दिन परिवारले बुझेको बिपी शीर्षकमा डा. शेखर कोइराला, सुजाता कोइराला र डा. शशांक कोइरालाले अनुभव बाँड्नेछन् । कार्यक्रमको समापनमा कुटुम्ब ब्याण्डको विशेष प्रस्तुति रहनेछ ।
को हुन् बिपी, के छ साहित्यमा उनको योगदान ?
नेपालका २२औं प्रधानमन्त्री बनेका बिपी नेपाली कांग्रेसका संस्थापक नेता हुन् । नेपालको पहिलो जननिर्वाचित प्रधानमन्त्री बिपीले २०१५ देखि २०१७ सम्म नेपालको प्रधानमन्त्रीको कार्यभार सम्हालेका थिए । वि.सं. १९७१ भदौ २४ गते भारतको वनारसमा जन्मेका बिपीको २०३९ साउन ६ गते क्यान्सरबाट निधन भएको थियो ।
बिपीको राजनीतिमा जस्तै साहित्यमा पनि उत्तिकै योगदान रहेको छ । साहित्यमा उनलाई विश्वेश्वरप्रसाद कोइरालाको नामले चिनिन्छ । नेपाली आख्यान र आत्मसंस्मरण विधाबाट चर्चा कमाएका उनका कृतिहरु अहिले पनि बजारमा सर्वाधिक खोजी र पढिने विषय बनेको बताइन्छ ।
‘श्वेतभैरवी’ र ‘दोषी चश्मा’ विश्वेश्वरप्रसाद कोइरालाका कथासंग्रह हुन् । ‘नरेन्द्र दाइ’, ‘सुम्निमा’, ‘बाबु, आमा र छोरा’, ‘हिटलर र यहुदी’, ‘तीन घुम्ती’, ‘मोदि आइन’ उनका उपन्यास हुन् । कोइरालाका ‘जेल जर्नल’, ‘आफ्नो कथा’ जस्ता संस्मरणात्मक कृति प्रकाशित छन् । दोषी चश्मा धेरैले पढेको कथामा पर्ने साहित्यकारहरु बताउँछन् ।
