- सुनकाण्डमा पूर्वउपराष्ट्रपतिका छोरा दीपेश पुनसँग सिआइबीको बयान
- पूर्वसभामुख कृष्णबहादुर महराका छोरा राहुल सिआइबीको नियन्त्रणमा
- नक्कली भुटानी शरणार्थी प्रकरणमा मुछिएका नेकपा एमालेका तत्कालीन सचिव टोपबहादुर रायमाझीका छोरा सन्दीप र पूर्वसभासद डा. इन्द्रजित राईका छोरा निरज पुुर्पक्षका लागि थुनामा, सोही प्रकरणमा मुछिएका पूर्वगृहमन्त्री रामबहादुर थापाका छोरा प्रतीक फरार
- एमाले उपाध्यक्ष विष्णु पौडेलका छोरा नवीन ललिता निवास र वरिष्ठ नेता ईश्वर पोखरेलका छोरा स्वराज ६० किलो सुनकाण्डमा मुछिए
काठमाडौं– तस्करीको ६० किलो सुनकाण्डमा तस्करसँग सम्बन्ध देखिएपछि नेपाल प्रहरीको केन्द्रीय अनुसन्धान ब्युरो (सिआइबी)ले पूर्वउपराष्ट्रपति नन्दबहादुर पुनका छोरा दीपेशसँग बयान लिएको छ । सिआइबी प्रवक्ता नवराज अधिकारीका अनुसार दीपेशसँग मंगलबार करिब तीन घण्टा बयान लिएको हो । बयानमा दीपेशले के भने ? अनुसन्धानकै क्रममा रहेको भन्दै अधिकारीले खुलाउन चाहेनन् ।
‘अनुसन्धानको क्रममा छ । अहिले बयानमा भनिएको कुरा सार्वजनिक गर्न मिल्दैन,’ अधिकारीले प्रभावसँग भने ।६० किलो सुन प्रकरणमा पुनको पनि संलग्नता रहेको भन्ने आशंकामा प्रहरीले उनीसँग बयान लिएको हो । उनको तस्कर दावा छिरिङसँगको सम्बन्ध रहेका कारण यसमा जोडिएको हुनसक्ने प्रहरीको बुझाइ छ ।पुन माओवादीको विद्यार्थी संगठन अनेरास्ववियु (क्रान्तिकारी) का महासचिवसमेत हुन् । अहिलेसम्म प्रहरीले सुनकाण्डमा २७ जनालाई पक्राउ गरेको छ । अझै केही फरार छन् ।
नेताका छोरा पक्राउ परे दबाबमा छुुट्न सक्छन् । छुट्छन् पनि । यसले आपराधिक कार्यमा संलग्न हुन उनीहरूमा बल मिल्छ । अहिले भएको त्यस्तै हो ।
हेमन्त मल्ल ठकुरी
पूर्वप्रहरी नायव महानिरीक्षक
गणतन्त्र नेपालको दोस्रो उपराष्ट्रपतिका छोरा दीपेशको तस्करसँग सम्बन्ध खुलेपछि उनको आलोचना भइरहेको छ । उनी सुनकाण्डमा संलग्न हुन् कि होइनन् ? सिआइबीले तथ्यसहित सार्वजनिक गर्न भने बाँकी छ । तर, बुबाको राजनीतिक हैसियतले प्राप्त शक्तिको आडमा दीपेश सुनकाण्डमा मुछिएको हुन सक्ने प्रहरीको आशंका छ ।
यसअघि नौ किलो तस्करीको सुनकाण्डमा माओवादीकै उपाध्यक्षसमेत रहेका पूर्वसभामुख कृष्णबहादुर महराका छोरा राहुलको बयान सिआइबीले लिएको छ । उनी सिआइबीकै नियन्त्रणमा छन् । उनले सुन तस्करहरूसँग टेलिफोन संवाद गरेको विवरणहरू सार्वजनिक भइरहेका छन् । त्रिभुवन अन्तर्राष्ट्रिय विमानस्थल भन्सार कार्यालयले जफत गरेको इलेक्ट्रिक सिगरेट (भेप) साटेर सुन बेचबिखन गर्ने समूहसँग साँठगाँठ महराको रहेको सिआइबीको दाबी छ ।
अर्को चर्चित नक्कली भुटानी शरणार्थी काण्डमा पूर्वगृहमन्त्री तथा एमाले उपाध्यक्ष रामबहादुर थापाका छोरा प्रतीक मुछिएका छन् । उनी हाल फरार छन् । उनको संलग्नता सुन काण्डमा देखिएको सिआइबीले जनाएको छ । सुरुमा त उनले आरोप खण्डन गरेका थिए । यतिसम्मकी प्रहरीलाई अनुसन्धानमा सहयोग गर्ने पनि उनको वचन थियो । तर उनी फरार भएका छन् । गम्भीर प्रकृतिको फौजदारी कसूरअन्तर्गत संगठित ठगी अपराधमा संलग्नता खुलेको उनी पनि बुबाले राजनीतिमा आर्जन गरेको शक्तिको आडमा गैरकानुनी कार्यको मुद्दामा मुछिएका हुन् ।
यस्तै, नक्कली भुटानी शरणार्थी प्रकरणमा नेकपा एमालेका तत्कालीन सचिव टोपबहादुर रायमाझीका छोरा सन्दीप मुछिएका छन् । उनी हाल पुुर्पक्षका लागि थुनामा छन् । राज्यसत्ताको वरिपरि बसेर नेपालीलाई शरणार्थी बनाई ठगी गर्ने काण्डमा उनको संलग्नता खुलेको छ । प्रहरीले बुुझाएको अनुसन्धान प्रतिवेदनका आधारमा जिल्ला सरकारी वकिल कार्यालय काठमाडौंले जिल्ला अदालत काठमाडौंमा मुद्दाको अभियोजन गरिसकेको छ । बुबाको राजनीतिक आडमा सन्दीप गैरकानुनी गतिविधिमा संलग्न भएको अनुसन्धान अधिकारीहरूको भनाइ छ ।
अर्को चर्चित काण्ड ललिता निवासको सरकारी जग्गा हिनामिना प्रकरणमा एमाले उपाध्यक्ष विष्णु पौडेलका छोरा नवीनको संलग्नता खुलेको थियो । जग्गा सरकारलाई नै फिर्ता गरेपछि उनीविरुद्ध मुद्दा अघि बढेन । तर, सरकारी जग्गा हिनामिनाजस्तो काण्डमा उनको संलग्नता देखिएको थियो । अख्तियारले विशेष अदालतमा मुद्दा दायर गर्न सक्ने डरले हतारहतार उनले जग्गा फिर्ता गरेका थिए ।
एमालेकै वरिष्ठ नेता ईश्वर पोखरेलका छोरा स्वराज पनि ६० किलो सुनकाण्डमा जोडिएको दाबी प्रहरीको छ । तर, समाचार तयार गर्दासम्म स्वराजलाई नियन्त्रणमा लिएर सिआइबीले बयान लिएको छैन । उनका बुुबा ईश्वरले भने यसअघि नै स्वराजको सम्भावित संलग्नताबारे खण्डन गरिसकेका छन् । सिआइबीका अनुसार एमालेकै नेता तथा पूर्वसभासद डा. इन्द्रजित राईका छोरा निरजको संलग्नता नक्कली भुटानी शरणार्थी प्रकरणमा खुल्यो । काण्डमा संलग्न भएको पुुष्टि गर्ने खालका प्रमाणहरू फेला परेपछि अदालतको आदेशअनुसार उनी पनि पुर्पक्षका लागि हिरासतमा छन् ।
नेपाल प्रहरीका पूर्वप्रहरी नायव महानिरीक्षक हेमन्त मल्ल पञ्चायतकालदेखिकै अधिकांश नेताका छोराछोरी कुनै न कुनै अपराधमा संलग्न हुने गरेको बताउँछन् । उनका अनुसार बुबाले संरक्षण गर्ने आडमा धेरैजसो छोराहरू आपराधिक गतिविधिमा संलग्न हुने गर्छन् । ‘नेताका छोरा पक्राउ परे बुबाको दबाबमा छुुट्न सक्छन्,’ उनले प्रभावसँग भने, ‘छुट्छन् पनि । यसले आपराधिक कार्यमा संलग्न हुन उनीहरूमा बल मिल्छ । अहिले भएको त्यस्तै हो ।’मल्ल राजनीतिमा आपराधीकरण र अपराधमा राजनीतिकरण हुँदै गएको बताउँछन् । यसले राज्यव्यवस्थामा अराजकता सिर्जना गर्ने उनको भनाइ छ ।
