काठमाडौं - हनी ट्रयापमा संलग्न भएका दुई जनालाई प्रहरीले पक्राउ गरेकाे छ । उपत्यकाको विभिन्न स्थानहरुमा आपराधिक लाभ लिने उद्देश्यले योजनाबद्ध तवरले केटीहरुको समूहलाई सामाजिक संजालमार्फत हनी ट्रयापमा पारि रकम असुलउपरमा संलग्न दुई जनालाई प्रहरीले पक्राउ गरेकाे हाे ।
अनुसन्धान गर्न खटिएको विशेष टोलिले मगंलबार दाेलखा जिल्लाकाे भिमेश्वर घर भई हाल काठमाडौंको तारकेश्वर बस्ने राजु खत्रीलाई र सिन्धुलीका कमलामाई घर भई हाल भक्तपुर बुस्ने आयुष्मा भन्ने आसिका रजल मगरलाई पक्राउ गरेकाे हाे ।
केटीहरुको समूहलाई सामाजिक संजालमार्फत परिचालन गरेर फोनको आदान-प्रदान गरी सम्पर्क समन्वय गराई केही पुरुष व्यक्तीहरुलाई प्रत्यक्ष भेटघाट गरेर रकम असुल गरेकाे पिडितले बताएकाे प्रहरीले जनाएकाे छ ।
प्रहरीका अनुसार पिडितलाई झुठ्ठा मुद्दा लगाई फसाई दिने भन्दै दवाबमुलक ढंगले डर, धम्की तथा त्रास देखाई मोलमोलाई गरी विभिन्न मितिमा ४० लाख बराबरको रकम उल्लेख भएका ८ थान चेक काट्न लगाई रकम असुल गरेको छ ।
उनीहरुलाई आपराधिक लाभ लिन नहुने कसुरमा थप अनुसन्धानको लागी जिल्ला प्रहरी परिसर, भक्तपुर पठाईएको र सो सम्बन्धमा थप अनुसन्धान जारी रहेको प्रहरीले जनाएकाे छ ।
