बिहीबार नै प्रदेशसभाका उपसभामुख सिर्जना दनुवार सवार गाडी रोकेर उदयपुरमा पहिचानवादीहरूले दुव्र्यवहार प्रयास गरेका थिए । यसअघि मुख्यमन्त्री हिक्मत कार्कीमाथि दुईपटक, सांसद पाँचकर्ण राई, निरेन राईलगायतविरुद्ध पनि पहिचानवादीहरू खनिएका थिए ।
काठमाडौं - कोशी प्रदेशमा नेकपा एमाले पहिचानवादीहरूको तारो बनेपछि अध्यक्ष केपी शर्मा ओलीले आक्रोशित हुँदै उत्तेजित अभिव्यक्ति दिएका छन् । उनले पहिचानवादीहरूलाई ‘दनक’ दिने बेला आएको बताएका हुन् । देशको पूर्वप्रधानमन्त्रीसमेत रहेका ओलीको यो अभिव्यक्तिले आन्दोलन भड्किनसक्ने भन्दै चिन्तासमेत व्यक्त हुन थालेको छ ।
आफू नेतृत्वको दल एमालेका कोशी प्रदेश सांसद राम राना सवार गाडीमा आन्दोलनरत पहिचानवादीहरूले बिहीबार इलामको सोयाकमा मोबिल छर्किदिएपछि ओलीको उत्तेजित अभिव्यक्ति आएको हो ।
पार्टी मुख्यालय च्यासलमा पार्टीका नवनियुक्त केन्द्रीय सदस्यहरूलाई शपथ ग्रहण गराएपछि बोल्दै ओलीले प्रश्न गरे, ‘मोबिल छर्केर आगो लगाउन खोज्नेसम्मको हर्कत यो राजनीति हो ? अब नेकपा एमालेले तयारीका साथ दनक दिनुपर्ने अवस्था भयो ।’
सांसद राना कोशी नामका प्रस्तावक हुन् । उनलाई यसअघि इलामकै मांसेबुङमा पनि पहिचान पक्षधरहरूले आक्रमण प्रयास गरेका थिए । ओलीविरुद्ध पनि गत वैशाखको दोस्रो साता गृहप्रदेशको झापा, इलाम, पाँचथर र तेह्रथुम पुग्दा आक्रमण प्रयास भएको थियो ।
बिहीबार नै प्रदेशसभाका उपसभामुख सिर्जना दनुवार सवार गाडी रोकेर उदयपुरमा उनीहरूले दुव्र्यवहार प्रयास गरेका थिए । यसअघि मुख्यमन्त्री हिक्मत कार्कीमाथि दुईपटक, सांसद पाँचकर्ण राई, निरेन राईलगायतविरुद्ध पनि पहिचानवादीहरू खनिएका थिए ।
यसपछि ओली आक्रोशित भएका हुन् । उनले एमाले अब चुप लागेर बस्न नसक्ने पनि चेतावनी दिए । ‘हाम्रा कार्यकर्ताहरूको रक्षा हामी आफैंले गर्नुपर्छ भने गरौंला । गुण्डा (आक्रमणकारी पहिचानवादी)हरू न नियन्त्रण गर्छ । केही गर्छ त सरकारले ? बरु, प्रचण्डको सरकारले प्रोत्साहित गरेको छ,’ उनले बिहीबार च्यासलमा भने, ‘यस कारणले गर्दा जवाफ दिनुपर्छ भन्ने अवस्था आइसकेको जस्तो लाग्छ मलाई ।’
वैशाखको दोस्रो साता ओली कोशी पुगेर पहिचानवादीहरूलाई भड्काइदिएका थिए । उनीहरू नीति तथा कार्यक्रम प्रदेश संसद्मा प्रस्तुत गरेको यही १४ जेठदेखि प्रदेश राजधानी विराटनगर केन्द्रित आन्दोलनमा छन् । आन्दोलनकै क्रममा लाजेहाङले ज्यान गुमाएका छन् । कयौं घाइते भएका छन् ।
तर, एमाले अध्यक्ष ओलीले भने लाजेहाङको हत्या पहिचान पक्षधरहरूले गरेको दाबी गरेका छन् । प्रहरीको संलग्नता नभएको उनको तर्क छ ।
१० चैतमा लाजेहाङको उपचारको क्रममा निधन भएको थियो । यसरी आन्दोलनले जनधनको क्षति बेहोरेको परिस्थितिबीच कोशी नाममै मतदान गरेको दुई दल नेपाली कांग्रेस र नेकपा माओवादी केन्द्रले प्रदेश पुनः नामकरणमा जोड दिएका छन् ।
कांग्रेसको त प्रदेशस्थित सबै जिल्लाका सभापतिहरूले विज्ञप्ति जारी गरेर प्रदेशमा शान्ति व्यवस्था कायम गर्न पनि प्रदेशको पुनः नामांकनमा गर्न सुझाएका छन् ।
१७ फागुनमा भने यी दुई दलका गरी ४२ जना सांसदले पनि कोशी नामको पक्षमा मतदान गरेका थिए । तर, एमाले भने पुनः नामांकनमा टसमस छैन । हालै मुख्यमन्त्री हिक्मत कार्कीले त चुनौतीपूर्ण भाषामा भनेका छन्, ‘अर्को निर्वाचनमा बहुमत ल्याएर प्रदेशको नाम फेर्नुहोस् । असंसदीय गतिविधिबाट नाम परिवर्तन हुँदै हुँदैन ।’
पहिचानवादीहरूले ऐतिहासिक पृष्ठभूमिको आधारमा प्रदेशको नामांकन गर्नुपर्ने बताउँदै आएका छन् । उनीहरूका अनुसार त्यहाँ किरात लिम्बुवान नाम हुनुपर्छ ।
-1745656903.jpeg)