- रुपान्तरण अभियानको पहिलो भेला जनकपुरबाट सुरु हुँदै छ । भेला तयारीका लागि संयोजक रञ्जित कर्ण जनकपुर पुगिसकेका छन् ।
- पार्टी सभापति देउवा सुस्ताए पनि जोधाहा महमन्त्री पनि कार्यसम्पादनमा पछि परेका छन्
- महाधिवेशनमा ८० प्रतिशत बढी मत ल्याएर जितेका देउवाको अहिले चर्को आलोचना सुरु भएको छ
काठमाडौं - नेपाली कांग्रेसका केन्द्रीय कार्यसमितिको बैठक बस्न अझै तय हुन सकेको छैन । वैशाख मसान्तसम्म बस्ने तयारी रहेको बैठक जेठको दोस्रो हप्ता लाग्दा पनि मितिको टुंगो नलागेको हो ।
गत भदौ ५ यता केन्द्रीय कार्यसमितिका बैठक बस्न सकेको छैन । कांग्रेस नेता एवं समाजवादी चिन्तक डा. प्रदीप गिरीको निधनपछि उक्त दिन कांग्रेसले आकस्मिक केन्द्रीय कार्यसमिति बैठक डाकेको थियो । बैठक नेता गिरीको निधनप्रति श्रद्धाञ्जली दिन केन्द्रित थियो ।
त्यसपछि निर्वाचन लाग्यो । निर्वाचनका विषयमा कांग्रेसले केन्द्रीय कार्यसम्पादन समिति र पदाधिकारी बैठकले नै विविध विषयमा निर्णय ग¥यो ।निर्वाचनपछि पुस २२ गतेका लागि डाकिएको केन्द्रीय समिति स्थगित गरी पुस २८ गतेका लागि बोलाइयो । उक्त दिनको लागि डाकिएको बैठक फेरि स्थगित गरी माघ १५ गतेका लागि सारियो ।
माघ १२ गते अर्को सूचना जारी गर्दै कांग्रेसले केन्द्रीय समितिको बैठक अनिश्चितकालका लागि स्थगित ग¥यो ।लामो समय रोकिएको केन्द्रीय समिति केन्द्रीय सदस्यहरुले विरोध गरेपछि महामन्त्रीद्वयले बैठकको तयारी गरेका थिए । ‘बैशाख २८ तिर नै केन्द्रीय समिति बैठकको तयारी थियो,’ कांग्रेसका एक पदाधिकारीले भने ।
यद्यपि जेठ दोस्रो हप्ता लाग्दा पनि केन्द्रीय समितिको टुंगो छैन । कांग्रेस केन्द्रीय सदस्य बालकृष्ण खाण नेपालीलाई भुटानी शरणार्थी बनाउने प्रकरणमा पक्राउ परेपछि केन्द्रीय समितिको तयारी अवरुद्ध बनेको बताइएको छ । केन्द्रीय समितिको तयारीपूर्व वैशाख २७ गते खाण पक्राउ परेका थिए ।
बिहीबारबाट रुपान्तरण अभियान
उपनिर्वाचनमा एक सिट गुमाएको कांग्रेसमाथि युवा वर्गले ‘सच्चिने कि सक्किने ?’ भन्दै प्रश्न थालेका थिए । सामाजिक सञ्जालदेखि विभिन्न कार्यक्रममा पार्टीमाथि प्रश्न उठेपछि केन्द्रीय समिति र नीति महाधिवेशन समयमै हुनुपर्ने माग उठ्न थालेको छ । यतिमात्र हैन कांग्रेसका कतिपय केन्द्रीय सदस्यले नीति अधिवेशनले झारा टार्नुभन्दा नेतृत्व नै परिवर्तन गर्नुपर्ने माग गरेका छन् । कांग्रेस केन्द्रीय सदस्य प्रा.डा. गोविन्द पोखरेलले विशेष अधिवेशनको माग गर्दै आएका छन् ।
यही मेसोमा संस्थापनइतरले भने भोलि बिहीबारबाट सातै प्रदेशमा रुपान्तरण अभियान सञ्चालन गर्दै छ । रुपान्तरण अभियानको पहिलो भेला जनकपुरबाट सुरु हुँदै छ । भेला तयारीका लागि संयोजक रञ्जित कर्ण जनकपुर पुगिसकेका छन् । ‘भेला तयारीका लागि म जनकपुरमा छु । मधेस प्रदेशका सबै जिल्लाका कांग्रेस नेताहरु यहाँ आउनुहुन्छ,’ कर्णले प्रभावसँग भने । भेलामा कांग्रेस सुधार्नका लागि आवश्यक सुझावहरु लिइने कर्णले बताए । पार्टी सभापति शेरबहादुर देउवा विधानअनुसार नचलेपछि अहिले कांग्रेसको गतिविधि ठप्प छन् ।
अभियान सातै प्रदेशमा पुग्ने र सुझाव संकलनपछि थप कार्यक्रमहरु ल्याउने रुपान्तरण अभियानका बागमती संयोजक मधु आचार्यले बताए । अभियानको दोस्रो कार्यक्रम बागमतीको काठमाडौंमा जेठ १६ गते हुनेछ । त्यस्तै, जेठ २० गते गण्डकीको पोखरा, लुम्बिनीको दाङमा जेठ २२ गते, कर्णालीको सुर्खेतमा जेठ २४ गते, सुदुरपश्चिमको धनगढीमा जेठ २६ गते र कोशीको इटहरीमा जेठ २९ गते आयोजना हुनेछ । विश्वभर छरिएर रहेका ‘डायस्पोरा’बिच भने जेठ ३१ जुम मिटिङ हुनेछ ।
शीर्ष पदाधिकारीको खोजी
कांग्रेसमा पछिल्लो समय केन्द्रीय समितिमात्र हैन पार्टीका विभिन्न गतिविधि ठप्प छन् । पार्टीले १८ महिनाअघि २०७८ मंसिरमा भएको १४ औं महाधिवेशनमा विविध कारण देखाउँदै कांग्रेसले नीति तय गर्न सकेन । त्यतिबेला महाधिवेशन नेतृत्व चयनमा केन्द्रित भयो । आउने नयाँ कार्यसमितिले नीति अधिवेशन गर्ने गरी नेताहरु सहमतिमा पुगेका थिए । देउवाको नेतृत्वमा नयाँ कार्यसमिति आयो । देउवाको पहिलो कार्यकाल जस्तै कांग्रेस फेरि सुस्ताउन थालेको छ ।
देउवा सरकारमा छँदै गठबन्धनमा निर्वाचनमा गएको कांग्रेसले नतिजा ९२ क्षेत्रमा उम्मेदबार उठाउँदा ५७ मा मात्र जित निकाल्यो । यो जितलाई कांग्रेसले ठूलै सफलता मान्यो किनकि अघिल्लो निर्वाचनमा कांग्रेसले २३ सिट मुस्किलले जितेको थियो । निर्वाचनमा जितेपछि ढुक्कले सरकारको नेतृत्व ताकेको कांग्रेसले आफ्नो कोषाध्यक्षसमेत छान्न सकेको छैन । कांग्रेस अहिले सरकारमा सहभागी भएका कारण पनि पार्टीको काममा सुस्त हुन थालेको बताइन्छ ।
कांग्रेसबाट सरकारमा ९ जना सहभागी छन् । पार्टीका उपसभाति पूर्णबहादुर खड्का र प्रवक्ता डा प्रकाशशरण महतले महत्वपूर्ण मन्त्रालय सम्हालेयता पार्टीको गतिविधि ठप्प छ ।पार्टी सभापति देउवा सुस्ताए पनि जोधाहा महमन्त्री पनि कार्यसम्पादनमा पछि परेका छन् । पार्टीको विधानअनुसार विभाग गठनदेखि पार्टीको विभिन्न कार्यक्रम तयको जिम्मेबारी महामन्त्रीको काँधमा हुन्छ ।
तर, महामन्त्री गगन थापा र विश्वप्रकाश शर्मासमेतले यी विषयमा उदासीनता देखाउन थालेका छन् । संसद्मा देखिए पनि पार्टी महामन्त्री पार्टीका कार्यसम्पादनमा देखिएका छैनन् । ‘पार्टीका विभागहरु गठनको जिम्मेवारीदेखि भ्रातृ संगठनको महाधिवेशन तोक्ने काम महामन्त्रीकै हो, तर दुवै महामन्त्री यो काममा उदासीन देखिन्छन्,’ कांग्रेसका एक नेताले भने ।
महामन्त्रीद्वयलाई पार्टी सभापति देउवाले चुनावी संकल्पपत्र बनाउने जिम्मेबारीसमेत सुम्पेका थिए । यद्यपि, महाधिवेशनमा ८० प्रतिशत बढी मत ल्याएर जितेका देउवाको अहिले चर्को आलोचना सुरु भएको छ । पार्टी नेतृत्वको चर्को आलोचना भइरहेको देउवाको शैलीमाथि मौन बनेपछि कांग्रेस वृत्तमा दुई महामन्त्रीको खोजी सुरु भएको हो ।
-1745656903.jpeg)