काठमाडौं - काठमाडौँका विभिन्न स्थानमा धर्नामा रहेका मिटरब्याजपीडितहरू घर फर्किएका छन् । मिटरब्याजको समस्या समाधानका लागि आयोग गठनको शनिबार पाँच बुँदे सहमतिसँगै विगत नौ दिनदेखि झापा, मोरङ, सुनसरी, बारा, पर्सा, सप्तरी, धनुषालगायतका जिल्लाबाट आएका मिटरब्याजपीडितहरू घर फर्किएका हुन् ।
उनीहरु ११ दिनको पैदलयात्राबाट काठमाडौँ आएका थिए । मिटरब्याजविरुद्ध सङ्घर्ष समितिका संयोजक मनोज पासवानले मिटरब्याजको समस्या सरकारले अत्यन्तै गम्भीरतापूर्वक लिएर समस्या समाधान गर्न आयोग गठन गर्ने निर्णय गरेपछि आफूहरू घर फर्किएको बताएका छन् ।
उनले सरकार समस्या समाधान गर्न गम्भीर रूपमा लागेकाले आफूहरूको समस्या समाधान हुनेमा पूर्णतः विश्वस्त रहेको बताएका छन् । उनले आयोग गठन भएसँगै प्रमुख जिल्ला अधिकारीको संयोजकत्वमा गठन हुने जिल्लास्तरीय छानबिन समितिलाई समेत आफूहरूले सक्दो सहयोग गरी समस्या समाधान गर्ने बताएका छन् ।
यसैबीचमा पूर्वी नवलपरासीका मिटरब्याजपीडित पुनः काठमाडौँ आएर धर्ना सुरु गरेका छन् । नवलपरासीबाट निर्ग नवीन, सरस्वती वाग्लेसहितको टोलीले सोमबार काठमाडौँको माइतीघर तथा प्रधानमन्त्री कार्यालयअघि धर्ना दिएर समस्या समाधान गर्न माग राखेका थिए । सरकारले उनीहरूलाई समेत आ–आफ्नो घर फर्किएर जाँचबुझ आयोग र सरकारलाई सहयोग गर्न आग्रह गरेको छ ।
मन्त्रिपरिषद्को निर्णय सार्वजनिक गर्ने क्रममा सञ्चार तथा सूचना प्रविधिमन्त्री तथा सरकारका प्रवक्ता रेखा शर्माले समस्या समाधान गर्न सरकारले आयोग गठन गरिसकेकाले काठमाडौँमा दुःख पाएर बस्नुभन्दा घर फर्किन आग्रह गरेकी छन् ।
