नवलपरासी– नवलपरासी (बर्दघाट–सुस्तापूर्व)मा पसाउने बेलाको धानमा रोगको संक्रमण देखिएको छ । जिल्लाको अधिकांश क्षेत्रमा लगाइएको धानमा ह्वाइट फ्लाई (सेतो झिंगा)को संक्रमण देखिएको कृषि ज्ञान केन्द्रले जनाएको छ ।
धान खेतीमा देखिएको सेतो झिंगाले धानको बाला चुसेर खाने गरेको गैंडाकोट नगरपालिका कृषि शाखा प्रमुख राजुप्रसाद शर्माले बताए । गैंडाकोटको धेरै ठाउँमा ह्वाइट फ्लाई संक्रमण देखिएपनि किसान चिन्तित भएका छन् ।
‘नगरभित्रका धेरै किसानले ह्वाइट फ्लाईबारे गुनासो गर्न थाल्नुभएको छ’, शाखाप्रमुख शर्माले भने, ‘कृषकको धान खेतमा गएर हेर्दा पनि पसाउने बेलाको धानमा धेरै संक्रमण देखेका छौं, यसको नियन्त्रणका लागि माथिल्लो निकायलाई जानकारी गराइसकेका छौं ।’
कृषि ज्ञान केन्द्रका सूचना अधिकारी शंकर पौडेलले ह्वाइट फ्लाई संक्रमण जिल्लाभरि नै देखिएको जानकारी दिए । जिल्लाको जम्मा कति क्षेत्रफलमा यसको संकमण देखिएको छ भनेर कार्यालयले तथ्यांक लिने काम गरिरहेको उनको भनाइ छ ।
धान खेतीमा देखिएको ह्वाइट फ्लाई थप बढ्दै गएर नियन्त्रण गर्न नसकिए धान उत्पादनमा कमी आउन सक्छ’, सूचना अधिकारी पौडेलले भने, ‘मसिनो खालको सेतो झिंगाले धानको पात चुस्ने, पसाउने बेलाको बाला चुस्ने गरेका कारण धानको बोट नै पहेँलो भएर जाने गरेको छ ।’
किराको कारणले धान पहेँलो भएका बेला किसानले धान खेतमा रासायनिक मल हाल्दा समस्या थप बढेको उनले बताए । ‘जिल्लामा लगाइएका धान खेतीमध्ये केही ठाउँमा खाद्य तत्वको कमी पनि देखिएको छ तर कृषि प्राविधिकको सल्लाहबिना युरिया मात्रै राख्दा धानलाई हरियो बनाउन सहयोग गर्छ र किरालाई थप खानेकुरा मिल्छ’, उनले भने ।
‘धान हरियो हुँदै गएपछि यसले किराको संख्या अझै बढाउने हुँदा रोगको संक्रमण सजिलै फैलिन सक्छ, त्यसैले कृषि प्राविधिकको सल्लाह लिएर मात्रै धानमा मल हाल्ने तथा उपचार गर्ने गर्नुपर्छ ।’
नवलपुरको मध्यबिन्दु, कावासोती, देवचुली, गैंडाकोट नगरपालिकासहित विनयी त्रिवेणी, हुप्सेकोट गाउँपालिकामा बर्खे धान लगाउने गरिएको छ । यस वर्ष जिल्लामा करिब १८ हजार आठ सय १६ हेक्टर जमिनमा बर्खे धान लगाइएको कृषि ज्ञान केन्द्रले जनाएको छ ।
पसाउने बेलाको धानमा रोगको संक्रमण देखिएका कारण अघिल्लो वर्षको तुलनामा यस वर्ष धानको उत्पादन घट्न सक्ने अनुमान गरिएको छ ।
