काठमाडौं - बैतडीमा पाँचदेखि १२ वर्षमुनिका ३८ हजार बालबालिकालाई कोरोनाविरूद्धको ‘फाइजर भ्याक्सिन’ दिइने भएको छ ।
स्वास्थ्य तथा जनसंख्या मन्त्रालयले सबै जिल्लामा ती उमेर समूहलाई लक्षित खोप अभियान सञ्चालन गर्न निर्देशन गरेसँगै यहाँ खोप अभियान सञ्चालनको तयारी गरिएको हो ।
स्वास्थ्य कार्यालय बैतडीका प्रमुख योगेशप्रसाद भट्टका अनुसार यही भदौ ५ देखि ९ गतेसम्म उक्त खोप अभियान सुरु हुनेछ ।
यसका लागि ५६८ खोप कार्यकर्ता र १ हजार १३६ स्वयंसेवक परिचालन गरिने जनाइएको छ । यहाँका सात स्थानीय तहमा भदौ ८ गतेसम्म र बाँकी तीन पालिकामा ९ गतेसम्म अभियान सञ्चालन हुने भएको छ ।
जिल्लाको मेलौली नगरपालिकासहित सुर्नया, शिवनाथ, पञ्चेश्वर, डिलाशैनी, सिगास र दोगडाकेदार गाउँपालिका ८ गतेसम्म सञ्चालन हुने र पाटन, पुर्चौडी, दशरथचन्द नगरपालिकामा भने ९ गतेसम्म अभियान सञ्चालन हुने जनाइएको छ ।
जिल्लामा उक्त उमेर समूहका ३८ हजार ५ बालबालिका रहेको र उनीहरूलाई विद्यालयमै खोप केन्द्र स्थापना गरेर खोप अभियान सञ्चालन भइरहेको हो ।
जिल्लाभरि पाँच सय ६२ खोपकेन्द्र स्थापना गरेर अभियान सञ्चालन हुने स्वास्थ्य कार्यालयले जनाएको छ । खोपको पहिलो मात्रा दिएको २१ दिनपछि दोस्रो मात्रा दिइनेछ ।
जिल्लामा हालसम्म एक लाख ७८ हजार बढीले कोरोनाविरूद्धको पूर्ण खोप पाएका छन् भने ९७ हजार ६१९ जनाले ‘बुस्टर डोज’ लगाएका छन् ।
कोरोनाकै कारण यहाँ १९ जनाको मृत्यु भएको स्वास्थ्य कार्यालयका सूचना अधिकारी विपिन लेखकले जानकारी दिए ।
सरकारले यसअघि खोप लगाउन छुटेको सबै नागरिकलाई खोप लगाउनसमेत अनुरोध गरेको छ ।
बैतडीमा हालसम्म एक लाख ७८ हजार बढीले कोरोनाविरूद्धको पूर्ण खोप पाएका छन् भने ९७ हजार ६१९ ले ‘बुस्टर डोज’ लगाएका छन् ।
भारतसँग सीमा जोडिएको यस जिल्लामा हालसम्म ३ हजार ४०५ जनामा कोरोना संक्रमण पुष्टि भइसकेको छ ।
प्रकाशित मिति: बुधबार, भदौ १, २०७९ ११:०८
