राबात–संयुक्तराज्य अमेरिका र उत्तर अक्रिकी मुलुक मोरक्कोबीच दश वर्षे सैन्य सहयोग सम्झौता भएको छ ।
अमेरिकी रक्षामन्त्री मार्क एस्परले मोरक्कोको दुई दिने भ्रमणका क्रममा सैन्य सहयोगसम्बन्धी उक्त सम्झौतामा हस्ताक्षर गरेको हो ।
उत्तर अफ्रिकी मुलुकको भ्रमणकै क्रममा मन्त्री एस्परले ट्युनिसियासँग पनि यस्तै सैन्य सम्झौता गरेको थियो ।
उनले यसअघि अल्जेरियाको भ्रमण गर्नु भएको थियो । सन् २००६ यता पहिलो पटक अमेरिकी रक्षामन्त्री अल्जेरियाको भ्रमणमा गएको हो ।
राष्ट्रपति र सेनापतिसँग भेटवार्ता भएपनि अल्जेरियासँग कुनै सम्झौता भएको सार्वजनिक भएको छैन ।
साहेल क्षेत्रमा उत्पन्न असुरक्षास्थितिलाई ध्यानमा राखेर सैन्य समझदारी गर्न अल्जेरियाली नेतासँग मन्त्री एस्परले प्रस्ताव राखेको थियो ।
संयुक्तराज्य अमेरिकाका लागि मोरक्को प्रमुख गैर–नेटो सदस्य राष्ट्र हो ।
अमेरिकी रक्षामन्त्री एस्परले मोरक्कोका विदेशमन्त्री नास्सेर बौरितासँग भेटवार्ता गरेको थियो ।
सैन्य सम्झौतापछि दुबै देशबीचको सहकार्यलाई थप सुदृढ गर्ने विश्वास गरिएको छ ।
मोरक्कोका लागि अमेरिका सबैभन्दा ठूलो हतियार आपूर्तिकर्ता मुलुक हो ।
मोरक्कोले हरेक वर्ष ‘अफ्रिका लायन’ नामको अमेरिकी सैन्य अभ्यास पनि आयोजना गर्दछ ।
कोरोनाभाइरसका कारण यसवर्ष उक्त अभ्यास रद्द गरिएको छ ।
