टोकियो– जापानको सत्तारुढ दल लिबरल डेमोक्र्याटिक पार्टीका प्रमुख योशिहिदे सुगा प्रधानमन्त्रीमा निर्वाचित भएको छ ।
जापानको संसद्मा बुधबार भएको निर्वाचनमा उनी अत्यधिक मतका साथ प्रधानमन्त्रीमा निर्वाचित भएको हो ।
जापानको संसद्मा अहिले सुगाले नेतृत्व गरेको पार्टीको बहुमत रहेकाले पनि उनले संसदमा भएको निर्वाचनमा अत्यधिक मत पाएको हो ।
किसानको छोरा सुगा अहिले
७१ वर्षको भएको छ ।
उनी सन् १९९१ मा प्रधानमन्त्री बनेका किचि मियाजावापछि सवैभन्दा पाको उमेरको प्रधानमन्त्री भएको छ ।
प्रधानमन्त्रीका रूपमा निर्वाचित भएपछि उनले देश र जनताको लागि काम गर्न आफू सधैँ प्रतिबद्ध रहेको बताएको छ ।
‘मेरो लगाव सबै देश र जनताका लागि हुनेछ, म त्यसैका लागि काम गर्नेछु,’ उनले भने ।
उनले आफुले सबैभन्दा बढी प्राथमिकता कोरोनाविरुद्धको लडाइँमा दिने र जापानी अर्थतन्त्रलाई पुरानै अवस्थामा फर्काउने बताएको छ ।
त्यसका लागि सबैको तर्फबाट सहयोग प्राप्त हुने विश्वास पनि उनले व्यक्त गरे ।
उनको मन्त्रिपरिषद्मा पूर्व अर्थमन्त्री तारो असो र विदेश मन्त्री तोशिमित्सु मोतेगी दोहोरिने सम्भावना देखिएको छ ।
सुगाले यसअघि लिएको मन्त्रिपरिषद्को मुख्य सचिवको जिम्मेबारी भने तत्कालीन स्वास्थ्यमन्त्री कत्सुनोबु कातोले पाउने अपेक्षा गरिएको छ ।
निवर्तमान प्रधानमन्त्री सिन्जो आबेको अति निकटस्थ पात्रका रूपमा रहेका सुगालाई यसअघि गत सोमबार उनी पार्टीको प्रमुखमा निर्वाचित गराइएको थियो ।
सुगाले आबे नेतृत्वको सरकार रहेका बेलामा सरकारको मुख्य प्रवक्ता र मन्त्रिपरिषद्को मुख्य सचिवका रूपमा जिम्मेबारी निर्वाह गरेको थियो ।
गत सोमबार भएको पार्टीभित्रको निर्वाचनमा उनले
३७७ मत प्राप्त गरेको थियो।
उनीसँग प्रतिस्पर्धा गरेका पूर्व
विदेशमन्त्री फुमिओ किशिदाले ८९ र
पूर्व रक्षामन्त्री शिगेरु इशिबाले ६८ मत मात्रै प्राप्त गरेका थिए ।
निवर्तमान प्रधानमन्त्री आबेले केही दिन अगाडि अस्वस्थताको कारण देखाउँदै प्रधानमन्त्री पद त्यागको घोषणा गरेको थियो ।
उनी शुरुमा सन्
२००६ देखि २००७ सम्म पहिलो पटक प्रधानमन्त्री भएका थिए ।
त्यतिबेला पनि अस्वस्थतालाई कारण देखाउँदै पद त्याग गर्नुभएका आबे स्वास्थ्यमा सुधार आएपछि सन्
२०१२ मा फेरि प्रधानमन्त्रीमा निर्वाचत भएको थियो ।
त्यसपछि केही दिन अगाडिसम्म उनी लगातार प्रधानमन्त्री भएका थिए ।
जापानमा सबैभन्दा लामो समयसम्म प्रधानमन्त्री बनेको नेताका रूपमा रहेका
६५ वर्षीय आवेले आफ्नो कार्यकाल अझै झण्डै एक वर्ष बाँकी रहेकै बेलामा राजीनामा दिएको हो ।
उनले सरकारको नेतृत्व गरेका बेलामा सुगाले अति निकट भएर उनीसँग काम गरेको थियो ।
जापानमा अहिले पनि आबेलाई अति लोकप्रिय नेताका रूपमा लिइने र पार्टीभित्र पनि उनको प्रभाव अत्यधिक धेरै भएको छ ।
