- खालिङ राई अध्यक्षमा निर्वाचित, सात सदस्यीय कार्यसमिति गठन
काठमाडौं- गान्तोकस्थित जनर्लिस्ट युनियन अफ सिक्किम (जेयूएस) को सन् २०२६ का लागि नयाँ कार्यसमिति निर्विरोध चयन भएको छ । निर्वाचन प्रक्रियाको सबै चरण सम्पन्न भएपछि अध्यक्षसहित कार्यसमितिका सातै पदमा एक-एक जना मात्र उम्मेदवार कायम रहेकाले निर्वाचन समितिले सबै उम्मेदवारलाई निर्विरोध निर्वाचित भएको घोषणा गरेको हो ।
निर्वाचन समितिका अनुसार निर्वाचन प्रक्रिया जुलाई ३१ देखि सुरु भएको थियो । उम्मेदवारी दर्ताको निर्धारित अन्तिम दिनसम्म कार्यसमितिका सात पदका लागि आठ जनाले मनोनयन दर्ता गराएका थिए । त्यसपछि मनोनयनपत्रको परीक्षण तथा उम्मेदवारी फिर्ताको प्रक्रिया सम्पन्न गरिएपछि सात पदका लागि सात जना उम्मेदवार मात्र कायम भएका थिए ।
उपलब्ध पद सङ्ख्यासँग वैधउम्मेदवारको सङ्ख्या बराबर भएपछि निर्वाचन नगरी नै सबै उम्मेदवार निर्विरोध निर्वाचित भएको निर्वाचन समितिले जनाएको छ । निर्विरोध निर्वाचित हुनेहरूमा अध्यक्षमा प्रवीण खालिङ राई, उपाध्यक्षमा दिलीप कुमार कार्की, महासचिवमा सुरज लिम्बू, संयुक्त सचिवमा सन्दीप प्रसाद, कोषाध्यक्षमा अम्बर गुरुङ, सह-कोषाध्यक्षमा निमा ल्हामु तामाङ तथा प्रचार सचिवमा अनुशिला शर्मा रहेका छन् ।
निर्वाचन समितिले औपचारिक रूपमा निर्वाचन सम्पन्न भएको घोषणा गर्दै नवनिर्वाचित कार्यसमितिले निवर्तमान नेतृत्वबाट विधिवत् कार्यभार ग्रहण गरेपछि आफ्नो कार्यकाल सुरु गर्ने जनाएको छ । समितिले निर्वाचन प्रक्रिया शान्तिपूर्ण, पारदर्शी र सफल रूपमा सम्पन्न गर्न सहयोग गर्ने जनर्लिस्ट युनियन अफ सिक्किमका सम्पूर्ण सदस्यप्रति आभार व्यक्त गरेको छ ।
साथै निर्वाचन व्यवस्थापनका क्रममा विशेष योगदान पु¥याएकी मनिता तामाङप्रति धन्यवाद ज्ञापन गर्दै उनको आगामी कार्ययात्रा सफल रहोस् भन्ने शुभकामना पनि व्यक्त गरेको छ । निर्विरोध नेतृत्व चयनसँगै जनर्लिस्ट युनियन अफ सिक्किमले आगामी कार्यकालमा पत्रकारहरूको पेशागत हकहित संरक्षण, संगठन सुदृढीकरण तथा पत्रकारिताको व्यावसायिक विकासका क्षेत्रमा प्रभावकारी भूमिका निर्वाह गर्ने अपेक्षा गरिएको छ ।
