कास्की पोखरा महानगरपालिका र पोखरा बसपार्कको उत्तरी क्षेत्रमा रहेको पेट्रोलपम्प क्षेत्रका जग्गाधनीबीच बसपार्क निर्माणका लागि सहमति जुटेको छ । महानगरले उक्त क्षेत्रका संरचना हटाउने तयारी गरेपछि जग्गाधनीहरूले त्यसविरुद्ध उच्च अदालतमा रिट निवेदन दिएका थिए । उक्त रिटउपर छलफलका लागि अदालतले आजका लागि दुवै पक्षलाई बोलाएको थियो । यसअघि अदालतले संरचना नहटाउनका लागि अल्पकालीन आदेश दिएर छलफलमा बोलाएको दिनअघि नै महानगर र जग्गाधनीबीच सहमति जुटेको हो ।
महानगर प्रमुख धनराज आचार्यले उक्त क्षेत्रका जग्गाधनीहरूले महानगरपालिकाविरुद्ध उच्च अदालतमा दायर गरेको रिट निवेदन सम्पूर्ण निवेदकहरूको तर्फबाट फिर्ता लिने सहमति भएको बताए । “जग्गाधनीका तर्फबाट अदालतमा दायर गरिएको रिट फिर्ता लिएर बसपार्क निर्माणकार्यमा सहजीकरण गर्न दुवै पक्षले आवश्यक सहयोग गर्ने समझदारी जुटेको छ”, उनले भने।
सहमतिअनुसार भविष्यमा निर्माण गरिने संरचनाहरू महानगरपालिकाले तोकेको मापदण्डबमोजिम निर्माण गरिनेछ । यसैगरी, हाल सञ्चालनमा रहेका सटर कबल जेठ २५ गतेको मितिले सात दिनभित्र पूर्ण रूपमा हटाउने सहमतिसमेत भएको महानगरले जनाएको छ । यसअघि प्रस्तावित बसपार्क क्षेत्रका बनेका संरचनाहरू हटाउनका लागि पटकपटक सूचना जारी हुँदै आएको थियो । विसं २०३२ मा बसपार्कका लागि अधिग्रहण गरिएको दुई सय पाँच रोपनी जमिन हाल २६ रोपनीमा खुम्चिएको छ ।
हालसम्म विभिन्न कारणले रोकिँदै आएको सुविधासम्पन्न बसपार्क निर्माण कार्यलाई अब सहमतिमै अघि बढाइने महानगरले जनाएको छ । पछिल्लो पटक यहाँका संरचना हटाउन सोमबारसम्मको समय दिइएको थियो । यसबीचमा कतिपय जग्गाधनी र भाडामा लगाइएका सटरहरू खाली भएका छन् । बसपार्कमा रहेका सुकुम्बासी र भूमिहीनहरूले भने वैकल्पिक व्यवस्थापछि मात्र संरचना खाली गर्ने बसपार्क सरोकार समितिका संयोजक प्रेमबहादुर गुरुङले बताए । महानगरले बसपार्ककोे जग्गामा बसोबास गरिरहेका सुकुम्बासीको व्यवस्थापनका लागि जमिन खोजी समितिको सिफारिसका आधारमा ‘जमिन प्लट’ मिलान तथा अन्य पूर्वाधार अध्ययनका लागि समिति गठन गरेको छ ।
सुकुम्बासी र अव्यवस्थित बसोबासीहरूको व्यवस्थापनका लागि यसअघि गठित जग्गा व्यवस्थापन (खोजी) समितिले सिफारिस गरेका जग्गाहरूमध्ये उपयुक्त ठहरिएका जग्गामा आवश्यक प्राविधिक कार्य सम्पन्न गर्न समिति गठन गरिएको जनाइएको छ । उक्त समितिलाई सिफारिस भएका जग्गाहरूको नापजाँच गरी तोकिएको क्षेत्रफलअनुसार कित्ता छुट्याउने तथा बसोबास व्इवस्थापनका लागि विश्लेषण गरी सात दिनभित्र राय सुझावसहितको प्रतिवेदन पेस गर्ने जिम्मेवारी दिइएको महानगर प्रमुख आचार्यले जानकारी दिए।
