काठमाडौं - विदेशमा रहेका नेपालीहरूले पनिअब नागरिक एप (Nagarik App) मा सजिलै लगइन गर्न सक्ने भएका छन् । सरकारी सेवाहरू एउटै डिजिटल प्लेटफर्मबाट उपलब्ध गराउने उद्देश्यले विकसित उक्त एपमा लगइन गर्दा आवश्यक पर्ने ओटीपी (OTP) कोड अब ईमेलमार्फत पनि प्राप्त हुने व्यवस्था गरिएको हो ।
यो सुविधाले विदेशमा बस्ने नेपाली प्रयोगकर्तालाई विशेष रूपमा सहज बनाउने अपेक्षा गरिएको छ । यसअघि नागरिक एपमा लगइनका लागि आवश्यक ओटीपी कोड नेपाली मोबाइल नम्बरमै मात्र आउने व्यवस्था थियो ।
त्यसका कारण विदेशमा रहेका प्रयोगकर्ताहरूले नेपालमै हुँदा लगइन गरेर जानुपर्ने, मोबाइलमा रोमिङ सेवा सक्रिय राख्नुपर्ने वा विदेशमा लगआउट भएमा पुनः लगइन गर्न कठिनाइ हुने जस्ता समस्या झेल्नुपर्ने हुन्थ्यो । विदेशमा नयाँ मोबाइल प्रयोग गर्दा समेत एपमा लगइन गर्न नसकिने समस्या हुने गरेको थियो ।
अब भने ईमेलमार्फत ओटीपी प्राप्त हुने भएपछि विदेशमा रहेका नेपालीहरूले पनि जुनसुकै देशबाट सहज रूपमा नागरिक एप प्रयोग गर्न सक्ने भएका छन् । जसले गर्दा एपमा उपलब्ध विभिन्न सरकारी सेवा निर्बाध रूपमा उपयोग गर्न सकिने भएको छ ।तर, यो सुविधा प्रयोग गर्नका लागि प्रयोगकर्ताको ईमेल एड्रेस भने पहिले नै भेरिफाइड हुन आवश्यक छ । अर्थात्, नेपालमै हुँदा आफ्नो नागरिक एपमा ईमेल राखेर त्यसलाई भेरिफाई गरिसकेका प्रयोगकर्ताले मात्र विदेशमा जाँदा पनि सोही ईमेलमा ओटीपी कोड प्राप्त गर्न सक्नेछन् ।
नागरिक एपका अनुसार हाल विदेशबाट भने ईमेल एड्रेस भेरिफाई गर्ने सुविधा उपलब्ध छैन । त्यसैले विदेश जानुअघि आफ्नो नागरिक एपमा इमेल एड्रेस लिङ्क गरेर भेरिफाई गराउन प्रयोगकर्तालाई सुझाव दिइएको छ ।ईमेल एड्रेस थप्न वा भेरिफाई गर्न नागरिक एपको माथिल्लो बायाँ कुनामा रहेको प्रोफाइल आइकनमा गएर My Details अन्तर्गत ईमेल समावेश गर्न सकिन्छ । ईमेल सफलतापूर्वक भेरिफाई भएको अवस्थामा त्यहाँ हरियो टिक चिन्ह देखिनेछ ।
