उहाँ (कर्ण थापा) आफ्नो ग्रुपमा जानुहुन्छ, यहाँनिर बोल्नु आवश्यक छैन, उहाँले ‘कन्भिन्स’ गर्ने मलाई नै हो । उहाँ र म तीन घण्टा बसेको अस्ति राति ।
केपी शर्मा ओली
अध्यक्ष, नेकपा एमाले
काठमाडौं- प्रधानमन्त्रीसमेत रहेका नेकपा एमालेका अध्यक्ष केपी शर्मा ओलीको तुलना ‘स्टालिन’सँग हुने गरेको छ । पछिल्लो केन्द्रीय कमिटी बैठकपछि पार्टी उपाध्यक्ष सुरेन्द्र पाण्डे बारम्बार ओलीलाई स्टालिनसँग दाँज्छन् ।
स्टालिन तत्कालीन सोभियत संघका सर्वोच्च नेता हुन् । उनले पार्टीका १३९ सदस्यमध्ये आफ्ना विरोध गर्ने ९३ जनाको हत्या गराएका थिए । उनै क्रुर, निरंकुश र तानाशाही प्रवृत्तिका शासक स्टालिनसँग ओलीको तुलना हुने गरेको छ । खासगरी पूर्वराष्ट्रपति विद्यादेवी भण्डारीका लागि पार्टी राजनीतिमा ढोका बन्द गरेपछि यति चर्को टिप्पणी भएको हो । ओलीलाई पार्टीमा फरक मत राख्ने र उनको कार्यशैलीलाई लिएर आलोचना गर्ने जो कोही नेताको राजनीति नै समाप्त पार्ने गरेको आरोप छ । विरोधीको जरै उखेल्ने प्रवृत्ति ओलीमा देखिन्छ ।
कम्युनिस्ट पार्टीमा फरक मतलाई स्थान दिइन्छ, बर्जित गरिँदैन । त्यसका लागि पुष्पलाल श्रेष्ठ, डा. केशरजंग रायमाझी, तुलसीलाल, मनमोहन अधिकारीको फरक राजनीतिक प्रस्ताव हेरे पुग्छ । तर अहिले एमालेमा त रोकेको देख्छु, बरु लोकतन्त्र नै छैन भने भयो नि !
प्रा.डा. लोकराज बराल
राजनीतिशास्त्री
ललितपुरको गोदावरीस्थित सन्राइज हलमा जारी विधान महाधिवेशनमा पनि स्थायी कमिटी सदस्य कर्ण थापाको फरक मतलाई ओलीले निषेध गरिदिएका छन् । कार्यसूचीबाटै थापाको फरक मतलाई ओलीले हटाइदिए । जबकि, फरक मत राख्न थापा ३० मिनेटसम्म हलमा उभिए । यसअघि ३२ पृष्ठ लामो उनको फरक मत केन्द्रीय कार्यालयमा दर्ता गरिएको थियो, जहाँ पूर्वराष्ट्रपति भण्डारीलाई राजनीतिमा आउन प्रतिबन्ध गरे पार्टीका लागि प्रत्युत्पादक हुने थापाको निष्कर्ष थियो । पार्टीभित्रको आन्तरिक लोकतन्त्र कमजोर भएको उल्लेख थियो । सोही फरक मतलाई ओलीले जारी विधान महाधिवेशनमा बन्देज लगाएका हुन् ।
ओलीले भने थापाले आफूलाई ‘कन्भिन्स’ गर्न नसकेको बताएका छन् । थापासँग तीन घण्टा छलफलसमेत बसेको भन्दै अब समूहगत छलफलमा फरक मत लैजान भनिएको बताए । ओलीको भनाइ उद्धृत गर्दै महाधिवेशनमा सहभागी एक नेताले प्रभावसँग भने, ‘उहाँ (थापा) आफ्नो ग्रुपमा जानुहुन्छ, यहाँनिर बोल्नु आवश्यक छैन, उहाँले कन्भिन्स गर्ने मलाई नै हो । उहाँ र म तीन घण्टा बसेको अस्ति राति ।’
पूर्वराष्ट्रपति भण्डारीको पक्षबाट वरिष्ठ उपाध्यक्ष ईश्वर पोखरेलले तयार गरेको राजनीतिक प्रस्तावलाई पनि ओलीले बन्देज गरेका थिए । महासचिव शंकर पोखरेलमार्फत भण्डारीको पक्षमा वकालत नगर्न महाधिवेशन प्रतिनिधिहरूलाई निर्देशन दिएका थिए । उसो त विगत हेर्दा ओली पार्टीभित्रका आफ्ना आलोचकलाई निमिट्यान्न पार्न चाहन्छन् । त्यस्तै परे पार्टीबाटै हटाइदिन्छन् । उनले आफूसँग अध्यक्षमा प्रतिस्पर्धा गर्ने पूर्वउपाध्यक्ष भीम रावललाई पार्टीबाट हटाइदिए । पार्टी निर्णयविपरीत बोलेको भन्दै विन्दा पाण्डे, उषाकिरण तिमल्सिेना लगायतमाथि कारबाहीको डण्डा चलाए । कतिपय नेतालाई भूमिकाविहीन बनाए । यी घटनाक्रमले एमालेमा फरक मतलाई पूर्णतः निषेध गरिएको पुष्टि गर्छ ।
नेतृत्वमा प्रतिस्पर्धीविहीनजस्तै देखिएका ओली तेस्रोपटक अध्यक्ष बन्ने बाटोमा छन् । जारी विधान महाधिवेशनले उनलाई फेरि अध्यक्ष हुन मार्गप्रशस्त गर्दै छ । त्यसका लागि उपाध्यक्ष विष्णु पौडेलले शनिबार विधान संशोधन प्रस्ताव पेस गरेको छ, जहाँ अध्यक्षका लागि उमेर हद हटाइएको छ । दुई कार्यकालको प्रावधान पनि संशोधन विधानको प्रस्तावमा छ । विधान महाधिवेशनमा सहभागी पोलिटब्युरो सदस्य महेश बस्नेतले भनेका छन्, ‘७० वर्षको उमेर हद हटाइयो । यसअघि विधानमा रहेको तर कार्यान्वयन नभएको प्रावधान पूर्णरूपमा खारेज ।’ एमालेमा ओली सर्वेसर्वा छन् । महाधिवेशन भए चुनौती दिन सक्ने भनेकै पूर्वराष्ट्रपति भण्डारीलाई हेरिएको थियो । तर, पछिल्लो केन्द्रीय कमिटी बैठकमार्फत उनलाई एमाले राजनीतिमा प्रतिबन्ध लगाइदिए । अब, पार्टी महाधिवेशन हुँदा उनीसँग अध्यक्षमा भिड्ने नेताका रूपमा वरिष्ठ उपाध्यक्ष पोखरेललाई हेरिएको छ । भण्डारीको कित्तामा उभिएर उनले ओलीका पछिल्ला हरेक कदमको आलोचना गर्दै आएका छन् । यो ओलीलाई मन परेको छैन । त्यसको छाया विधानमासमेत देखिने भएको छ ।
विधानमा अबदेखि ‘वरिष्ठ उपाध्यक्ष’ नै नराखिने भएको छ । विधान महाधिवेशनमा सहभागी एक नेताका अनुसार पोखरेल खरो विरोधी बनेर आएपछि ओलीले उनको पद नै हटाइदिन लागेका हुन् । उपाध्यक्षहरू युवराज ज्ञवाली, सुरेन्द्र पाण्डे, अष्टलक्ष्मी शाक्य पनि ओलीका कार्यशैलीको समर्थनमा छैनन् । उनीहरू ओलीका आलोचक नै हुन् । पूर्वराष्ट्रपति भण्डारीमाथि पार्टी राजनीतिमा गरिएको प्रतिबन्धप्रति अर्का उपाध्यक्ष रामबहादुर थापा पनि असन्तुष्ट देखिएका छन् । यसरी बहुसंख्यक उपाध्यक्ष आफ्नो कदमको विरुद्धमा उभिएपछि ओली विधानमै तीन उपाध्यक्ष राख्ने मनस्थितिमा छन् । सोहीअनुसार उपाध्यक्ष विष्णु पौडेलले उपाध्यक्षको संख्या जारी विधान महाधिवेशनमा प्रस्ताव गरेका छन् । यी आधारमा ओली विरोधीलाई तह लगाउने र आफूअनुकूल विधान बनाउने क्रममा छन् । यसलाई लिएर एमालेमा आन्तरिक लोकतन्त्र गम्भीर संकटमा परेको राजनीतिशास्त्री प्रा.डा. लोकराज बरालको विश्लेषण छ । उनी भन्छन्, ‘कम्युनिस्ट पार्टीमा फरक मतलाई स्थान दिइन्छ, बर्जित गरिँदैन । वैचारिक मतभेदलाई स्वीकारिन्छ र त्यसका लागि पुष्पलाल श्रेष्ठ, डा. केशरजंग रायमाझी, तुलसीलाल, मनमोहन अधिकारीको फरक राजनीतिक प्रस्ताव हेरे पुग्छ तर अहिले एमालेमा त रोकेको देख्छु, यसे त लोकतन्त्र नै छैन भने भयो नि !’
यसअघि ओलीले माधवकुमार नेपाल, झलनाथ खनाललगायतका नेतालाई एमालेबाट बाहिरिन बाध्य पारेको आरोप लाग्दै आएको छ । सोही कारण ओलीलाई विरोधी नेताहरूको राजनीतिक ‘सफाया’ गर्ने नेतृत्वका रूपमासमेत टिप्पणी गरिँदै आएको छ ।
