- रविका लागि कानुनी लडाइँ लड्न रास्वपा चन्दा संकलनमा
- चन्दा ऐन २०३० अनुसार सरकारको पूर्वस्वीकृति नलिइकन चन्दा संकलन गर्नु गैरकानुनी
- रास्वपाले चन्दा संकलन गर्न सरकारसँग स्वीकृति लिएको छैन ।
काठमाडौं– प्रतिनिधिसभा सदस्यसमेत रहेका राष्ट्रिय स्वतन्त्र पार्टी (रास्वपा)का सभापति रवि लामिछाने दोषी ठहरिए पदै गुम्नेगरिको गम्भीर मुद्दा सामना गरिरहेका छन् । भैरहवा कारागारमा रहेका रविविरुद्ध काठमाडौं, कास्की, चितवन, रुपन्देही र बाँकेमा सहकारी ठगी मुद्दा छ । कास्कीमा भने सम्पत्ति शुद्धीकरण मुद्दा पनि छ ।
कुनै पनि जिल्लाको अदालतमा मुद्दाको किनारा लागेको छैन । रवि एकैसाथ पाँच जिल्ला अदालतमा मुद्दा लडिरहेका छन् । यस्तोमा रविलाई मुद्दा लड्न खर्च अभाव भएको भन्दै उनको दल रास्वपाले चन्दा संकलन गरिरहेको छ । देश विदेशबाट रविका समर्थकले चन्दा दिइरहेका छन् ।
चन्दाकै लागि यही ७ असारमा भैरहवा कारागारबाट लामिछानेको सचिवालयबाट अपिल जारी भएको थियो । अपिलमा रविले सहकारी ठगीमा आफूमाथि लागेका आरोपबारे प्रष्टीकरण दिँदै सरकारले राजनीतिक प्रतिशोधका आधारमा मुद्दा चलाएको दाबी गर्दै त्यसविरुद्ध हस्ताक्षर अभियान चलाउन पार्टी नेता कार्यकर्तालाई निर्देशन दिए ।
यसपछि रास्वपा नेता कार्यकर्ताले हस्ताक्षरसँगै चन्दा संकलन अभियान सँगसँगै सञ्चालन गरिरहेका छन् । पार्टी प्रवक्ता मनिष झाका अनुसार पार्टीको क्युआर कोड राखेर चन्दा संकलन भइरहेको छ । उनलाई चन्दा संकलन गैरकानुनी होइन भनी सोध्दा स्वेच्छिक सहयोग कानुनविपरीत नहुने बताए ।
‘हाम्रो सभापति रवि लामिछानेलाई जसरी मुद्दा चलाइयो र थुनामा पुर्याइयो यो सब राजनीतिक प्रतिशोध हो र उहाँलाई मुद्दा लड्न आर्थिक अभाव छ,’ उनले प्रभावसँग भने, ‘अभाव भएका कारण पार्टीले एउटा कोष खडा गर्ने र कोषमा जम्मा भएको पैसा मुद्दा लड्न खर्च गर्ने भनेर क्युआरमा सहयोग मागेका हौँ ।’
नेपालको कानुनअनुसार सरकारको पूर्वस्वीकृति नलिइकन कुनै पनि कामका लागि चन्दा उठाउन पाइँदैन । चन्दा ऐन २०३० ले सरकारसँग अनुमति लिएर मात्रै चन्दा संकलन गर्न पाइने स्पष्ट व्यवस्था गरेको छ । तर, चन्दा संकलनका लागि रास्वपाले अनुमति लिएको छैन ।चन्दा ऐन २०३० छ, ‘नेपाल सरकार वा प्रदेश सरकारको पूर्वस्वीकृति लिई धार्मिक, परोपकारी वा अन्य सार्वजनिक कार्यका लागि कसैले स्वेच्छाले दर नतोकी चन्दा लिन–दिनबाहेक कुनै व्यक्ति वा सरकारी वा गैरसरकारी कार्यालय वा संस्थाले कसैबाट चन्दा उठाउन वा लिन हुँदैन ।’
रास्वपाले भने यो कानुनी प्रावधानलाई कुल्चिँदै चन्दा संकलन गरिरहेको हो । चन्दा ऐनमा चन्दा उठाउने व्यक्तिले चन्दा उठाउँदा चन्दादाताले दिएको चन्दाको रकमको अंक, अक्षर वा नाप, तौल, आश्वयकताअनुसार स्पष्ट खुलाइ तीनप्रति रसिदमा लेखी दस्तखत गर्नुपर्छ । तर, सिसाकलम वा अरु उड्ने मसीबाट लेख्न र दस्तखत गर्न हुँदैन । रास्वपाले डिजिटल भुक्तानी प्रणाली क्युआरमार्फत् चन्दा संकलन गरिरहेको छ । यसले गर्दा कानुनविपरीतको माध्यमबाट रास्वपाले चन्दा संकलन गरेको पनि फेला परेको हो । यसप्रति प्रश्न उठेको छ । साथै संकलित रकम कहाँ र कसरी खर्च गर्ने भन्ने प्रष्ट छैन ।
हाल रास्वपाले ‘लिगल डिभेन्स फण्ड’ बनाएको छ । पार्टी प्रवक्ता झाका अनुसार पार्टीका नेताहरूलाई आवश्यक परेका बेला कानुनी सहयोग गरिने छ । तर, कोष खडा गर्न कार्यविधि पनि बनाएको छैन । यसको जिम्मा सहकोषाध्यक्ष दीपक बोहरालाई दिइएको प्रवक्ता झाले बताए । बोहरा रविको पक्षमा हस्ताक्षर संकलन अभियानका संयोजकसमेत हुन् । उनले पार्टीको उपखाताका रूपमा ग्लोबल आईएमई बैंकमा खाता खोलिएको बताए । खातामा हस्ताक्षर भने कोषाध्यक्ष लिमा अधिकारी र सहकोषाध्यक्ष बोहोराको हस्ताक्षर चल्नेगरी बनाइएको जानकारी दिए ।
रवि भने सहकारी ठगी प्रकरणमा गत चैत २२ गते उच्च अदालत तुलसीपुरको बुटवल इजलासको थुनामा पठाउने आदेशपछि भैरहवा कारागारमा छन् । उनी केन्द्रीय कारागार डिल्लीबजार आउन चाहन्छन् । यसअघि उनले सरकारसँग याचना पनि गरे । तर, रास्वपाले भिजिट भिसा प्रकरणलाई लिएर गृहमन्त्री रमेश लेखकको राजीनामा मागेका छन् । बहालवाला न्यायाधीशको संयोजकतत्वमा छानबिन समिति गठनको माग गरेको छ । संसद्मा एक महिनादेखि अवरोध गर्दै आएको छ । यस्तोमा गृहमन्त्री लेखक आफूविरुद्ध रास्वपा लगातार संसदमा प्रस्तुत भइरहेपछि सोही दलका सभापति लामिछानेलाई अड्डासार गर्न सकारात्मक भएनन् ।
उच्च अदालत तुलसीपुरको बुटवल इजलासका न्यायाधीशद्वय रमेश ढकाल र स्वीकृति पराजुलीको संयुक्त इजलासले जिल्ला अदालत रुपन्देहीले धरौटीमा छाड्न भनेर दिएको आदेश बदर गर्दै रविलाई थुनामा पठाउने आदेश जारी गरेको थियोे । सोही आदेशअनुसार रवि थुनामा पुगेका हुन् । यसअघि रुपन्देहीको बुटवलस्थित सुप्रिम सहकारी ठगी र संगठित अपराधको मुद्दामा रुपन्देही अदालतले रविलाई एक करोड धरौटीमा छाड्न आदेश दिएको थियो । सुप्रिममा रवि, छविलाल जोशी र जीबी राईसहित ४२ जनालाई प्रतिवादी बनाइएको थियो ।
