उपप्रमुखले नगरपालिकाको डोजर र ट्रिपरको चाबी खोसेर लगे । फिर्ता लिन प्रहरी पठाउँदा पनि फोन उठाएनन् । यसरी नगरको सम्पत्तिमा हस्तक्षेप गर्नु मिल्दैन ।
हर्क साम्पाङ
प्रमुख, धरान उपमहानगरपालिका
काठमाडौं– स्वतन्त्र प्रमुख भएको धरान उपमहानगरपालिका विवादको केन्द्र बनेको छ । प्रमुख हर्क साम्पाङ र उपप्रमुख अइन्द्रविक्रम बेघा पक्षबीच विवाद चर्किंदै गएको हो । दुई पक्षबीचको विवादले मंगलबार तनावग्रस्त स्थिति निम्तियो ।श्रमदान अभियानको पारदर्शिता, चन्दा संकलन, नगरको सम्पत्तिको प्रयोग र समन्वय अभावका कारण साम्पाङ र बेघा पक्षबीच विवाद भएको हो । यसअघि सोमबार धरान उपमहानगर परिसरमा नेकपा माओवादी केन्द्रनिकट एक समूहले प्रमुख साम्पाङको कार्यशैलीमाथि प्रश्न उठाउँदै नाराबाजी गरेको थियो । उक्त समूहमा सहभागीले ‘हर्क साम्पाङ मुर्दावाद’, ‘दादागिरी चल्दैन’ लगायतका नारा लगाएका थिए । श्रमदानको नाममा योजनाबाहिरको बिल पास नहुने भन्दै नाराबाजी भएको थियो ।
प्रमुख साम्पाङले हालै श्रमदानमार्फत निर्माण गरिएका संरचनामा प्रयोग भएका फलामका जालीहरूको भुक्तानी प्रक्रिया अघि बढाउन उपप्रमुख बेघालाई निर्देशन दिएका थिए । तर, उपप्रमुख बेघाले अस्वीकार गरे । उनले श्रमदानको नाममा गरिएका कार्य विधिसम्मत नभएको भन्दै भुक्तानीका लागि असहमति जनाएका हुन् । उपप्रमुखले हस्ताक्षर गर्न अस्वीकार गरेपछि प्रमुख साम्पाङले आफूलाई कार्यकक्षमा बोलाएर सामूहिक घेराउ गरेको उपप्रमुख बेघाको आरोप छ ।
‘श्रमदान भन्दै गरिएको कामको स्रोत स्पष्ट छैन । बजेटबाट हो कि बाह्य सहयोगबाट भन्ने थाहा छैन । यस्तो अपारदर्शी अवस्थामा म जिम्मेवारी लिन सक्दिनँ,’ उनले प्रभावसँग भने, ‘श्रमदानको नाममा नगरको सम्पत्ति मनोमानी ढंगले प्रयोग भइरहेको छ ।’उपप्रमुख बेघा पक्षले पालिकाको डोजर, स्काभेटरको चाबी प्रमुख साम्पाङ र उनका कार्यकर्ताले जथाभावी प्रयोग गर्न थालेको आरोप लगाएका छन् । दुरुपयोग रोक्न केही दिनदेखि आफूसँग भएको र कार्यालयको चाबी कसैलाई दिन रोक लगाएको बेघाले बताए ।
श्रमदान भन्दै गरिएको कामको स्रोत स्पष्ट छैन । बजेटबाट हो कि बाह्य सहयोगबाट भन्ने थाहा छैन । यस्तो अपारदर्शी अवस्थामा म जिम्मेवारी लिन सक्दिनँ ।
अइन्द्रविक्रम बेघा
उपप्रमुख, धरान उपमहानगरपालिका
उपप्रमुखमाथि प्रमुख पक्षधरले घेराउ गरेपछि सोही दिन उपप्रमुखनिकटहरूले प्रमुख साम्पाङको कार्यशैलीमाथि प्रश्न उठाएका थिए । उनीहरूले विरोध पनि जनाएका थिए । प्रमुख साम्पाङले जनश्रमदानको नाममा बिल भुक्तानी गर्न भन्दै उपप्रमुख बेघालाई हस्ताक्षर गराउन खोजेको र बेघाले हस्ताक्षर नगरेपछि साम्पाङ पक्षधरहरूले घेराउ गरेका थिए ।
उपप्रमुख बेघाले सार्वजनिक स्रोत र पारदर्शिताको अभाव औंल्याउँदै हस्ताक्षर गर्न अस्वीकार गरेपछि प्रमुख साम्पाङले आफ्ना श्रमदाताहरू बोलाएर कार्यकक्षबाहिर दबाब सिर्जना गरेको आरोप लागेको छ । सोही कारण मंगलबारसमेत उपमहानगर परिसर तनावपूर्ण बनेको हो । मंगलबार प्रमुख साम्पाङले पत्रकार सम्मेलन गर्दै उपप्रमुख राजनीतिक उक्साहवटमा लागेको बताए । उपप्रमुखले काममा सहयोग नगरेको, अवरोध गरेको र नगरको सम्पत्तिमा अनधिकृत हस्तक्षेप गरेको साम्पाङको आरोप छ ।
उनले पत्रकार सम्मेलनमा भने, ‘उपप्रमुखले नगरपालिकाको डोजर र ट्रिपरको चाबी खोसेर लगे । फिर्ता लिन प्रहरी पठाउँदा पनि फोन उठाएनन् । यसरी नगर सम्पत्तिमा हस्तक्षेप गर्नु मिल्दैन ।’धरानमा प्रमुख र उपप्रमुखबीचको लफडा यसपटक मात्रै होइन, पटक–पटक हुँदै आएको छ । कतिसम्म भने कार्यपालिका बैठक, नगरसभासमेत अनिर्णयको बन्दी बनेको विगत छ, सोही कारण कयौं योजनाहरू अलपत्रजस्तै छन् ।
उपप्रमुख बेघाले प्रमुख राई समन्वय गर्नै नचाहने हुँदा समस्या निम्तिएको बताउँछन् । उनका अनुसार गत १६ जेठमा विपद् व्यवस्थापनका लागि बोलाइएको बैठकमा समन्वय भएन । बेघाले त सात दिनसम्म प्रमुखसँग सम्पर्क गर्न खोज्दा कुनै प्रतिक्रिया नआएको दाबी पनि गरेका छन् । प्रमुख साम्पाङले भने विपद् व्यवस्थापनमा आफू एक्लै लागिरहेको र उपप्रमुख निरीक्षणका लागि टिमसहित पुगे पनि सहयोग नगरेको आरोप लगाए ।
यहीबीच पछिल्लोपटक श्रमदान विवादमा आएको हो । साम्पाङले अघि सारेको श्रमदान मोडेल जनस्तरमा लोकप्रिय देखिएको छ । सडक, ढल, र खुला दिसामुक्त धरानजस्ता श्रमदान अभियानमा जनताको उल्लेख्य साथ थियो । तर, यतिबेला भने डोर हाजिरी गराएर श्रमदानमा सहभागीलाई ज्याला दिने तयारी गरिएपछि बेघा पक्षले विरोध गरेको हो । बेघाका अनुसार श्रमदानको नाममा संकलन गरिएको रकम, स्रोत तथा खर्च सार्वजनिक नगरिएको, कामको मूल्यांकन नगरिएको र संस्थागत अनुमोदनविना काम गराइएका छन् ।
यस्तै, प्रमुख साम्पाङको अगुवाइमा हुने श्रमदानमा सरकारी उपकरण प्रयोग गरेको आरोप पनि लागेको छ । श्रमदान अभियानमार्फत सडक सुधार, नाली निर्माण, फलामे जाली जडानजस्ता काममा नगरका उपकरणहरू प्रयोग गरिएको छ । तर, ती उपकरणका लागि तेल, चालक, मर्मत र अन्य खर्चहरू कहाँबाट बेहोरिएको हो भन्ने विषयमा स्पष्ट विवरण साम्पाङले सार्वजनिक गरेका छैनन् ।
