- कुन सहकारीको मुद्दामा कति बिगो ?
- सानो पाइला सहकारी, पर्सा– ५ करोड ७४ लाख
- स्वर्णलक्ष्मी सहकारी, काठमाडौं– ५ करोड ७८ लाख
- सुप्रिम सहकारी, रुपन्देही– ४ करोड १५ लाख
- सूर्यदर्शन सहकारी, कास्की– ३ करोड ३७ लाख
- सहारा सहकारी, चितवन– ५ करोड ७४ लाख
काठमाडौं– पूर्वगृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध २४ करोड ७५ लाख रुपैयाँ बिगो मागदाबी भएको छ । काठमाडौं, चितवन, कास्की, रुपन्देही र पर्सा जिल्लाका एक–एकवटा सहकारी ठगीमा लामिछानेविरुद्ध उक्त बिगो मागदाबी भएको हो ।
गोरखा मिडिया नेकवर्कको प्रबन्ध निर्देशकको हैसियतमा ग्यालेक्सी टेलिभिजनमा गितेन्द्रबाबु (जिबी) राई, पूर्वडिआइजी छविलाल जोशी, कुमार रम्तेललगायतसँग मिलेर ती सहकारीहरूबाट गैरकानुनी रूपमा बचत ल्याएर अपचलन गरेको प्रकरणमा लामिछानेलाई पनि जिम्मेवार मानिएको छ । सोही कारण उनीविरुद्ध मात्रै झण्डै २५ करोड रुपैयाँ बिगो मागदाबी भएको हो ।
आइतबार पर्साको वीरगञ्जस्थित सानो पाइला सहकारीमा भएको ठगी प्रकरणको अनुसन्धानपछि जिल्ला सरकारी वकिल कार्यालयले जिल्ला अदालतमा मुद्दा दायर गरेको छ । उक्त सहकारी ठगीमा लामिछानेविरुद्ध पाँच करोड ७४ लाख ३० हजार रुपैयाँ बिगो मागदाबी गरिएको छ । लामिछानेसहित २९ जनालाई प्रतिवादी बनाइएको छ । उक्त सहकारीको एक अर्ब ३२ करोड ४६ लाख १२ हजार रुपैयाँ अपचलन भएको दाबी गर्दै मुद्दा दायर भएको हो ।
लामिछाने भने यतिबेला रुपन्देहीको सुप्रिम सहकारी ठगी प्रकरणमा पुर्पक्षका लागि भैरहवा कारागारमा छन् । उनलाई काठमाडौंको डिल्लीबजार कारागारमा ल्याउने चर्चा थियो । तर, गृहमन्त्री रमेश लेखक भिजिट भिसा प्रकरणमा मुछिँदा रास्वपाले चर्को विरोध गरेसँगै उनको काठमाडौं जेल सरुवा रोकिएको बताइन्छ । यहीबेला उनीविरुद्ध अन्तिम जिल्ला पर्सामा पनि बिगो मागदाबीसहितको मुद्दा आइतबार दायर भएको हो । यसअघि २१ पुसमा काठमाडौंको कालिमाटीस्थित स्वर्णलक्ष्मी बहुउद्देश्यीय सहकारी संस्थामा बचतकर्ताले राखेको रकम अपचलन भएको प्रकरणमा लामिछानेसहित ३९ जनाविरुद्ध मुद्दा दर्ता भएको थियो ।
उक्त सहकारीमा एक अर्ब १९ करोड ९५ लाख रुपैयाँ अपचलन भएको भन्दै जिल्ला अदालत काठमाडौंमा मुद्दा दर्ता छ । रविविरुद्ध त्यहाँ पाँच करोड आठ लाख ६९ हजार रुपैयाँ बिगो मागदाबी गरिएको छ । उनका व्यावसायिक साझेदार जिबी राईविरुद्ध पनि समान बिगो मागदाबी गरिएको छ । अर्का साझेदार छविलाल जोशीको हकमा मात्रै पाँच करोड ७८ लाख ९६ हजार रुपैयाँ बिगो माग भएको छ ।
गत वर्षको ८ पुसमा सरकारी वकिलको कार्यालय कास्कीले लामिछानेले सूर्यदर्शन सहकारीको तीन करोड ३७ लाख ६५ हजार रुपैयाँ अपचलन गरेको भन्दै उनीविरुद्ध सोही रकमबराबर बिगो मागदाबी गरिएको थियो । सोही अदालतमा उनीविरुद्ध सम्पत्ति शुद्धीकरण मुद्दा पनि दर्ता छ । २७ करोड ८९ लाख ४४ हजार रुपैयाँ गैरकानुनीरूपमा आर्जन गरेको दाबीसहित दर्ता मुद्दामा रविकी पत्नी नीकिता पौडेल पनि प्रतिवादी छिन् ।
सूर्यदर्शन सहकारी ठगीमा भने लामिछानेसहित ४४ जना प्रतिवादी छन् । लामिछानेका पूर्वव्यावसायिक साझेदार जोशीविरुद्ध त्यहाँ पनि पाँच करोड २६ लाख ६५ हजार र पूर्वउपराष्ट्रपति नन्दकिशोर पुनका छोरा दीपेशविरुद्ध दुई करोड १४ लाख आठ हजार रुपैयाँ बिगो दाबी गरिएको छ । त्यहाँ सबै प्रतिवादीसँग गरी एक अर्ब ५१ करोड ४० लाख १९ हजार रुपैयाँ बिगो दाबी गरिएको छ । त्यसमा लामिछानेविरुद्ध मात्रै तीन करोड रुपैयाँभन्दा बढी बिगो माग गरिएको हो ।
गत वर्षको ६ माघमै रुपन्देहीको बुटवलस्थित सुप्रिम सहकारीको रकम ठगी प्रकरणमा अदालतमा मुद्दा दायर भएको थियो । त्यहाँ लामिछानेसहित ४२ जनालाई प्रतिवादी बनाइएको छ । लामिछानेविरुद्ध मात्रै व्यक्तिगत दुई करोड रुपैयाँ र सामूहिक दुई करोड रुपैयाँ गरेर चार करोड रुपैयाँभन्दा बढी बिगो मागदाबी गर्दै मुद्दा दायर भएको हो ।दुई करोड रुपैयाँ रवि लामिछानेको नाममा गएको उल्लेख भौचरसमेत बरामद भएको थियो । त्यहाँ बचतकर्ताको ८६ करोड १८ लाख २३ हजार रुपैयाँ हिनामिना गरेको दाबी गर्दै लामिछानेसहित ४२ जनाविरुद्ध मुद्दा दायर भएको थियो ।
यस्तै, गत वर्षकै २२ माघमा चितवनको साहारा बहुउद्देश्यीय सहकारी ठगीमा चितवन जिल्ला अदालतमा मुद्दा दायर भयो । त्यहाँ लामिछानेविरुद्ध पाँच करोड ७४ लाख रुपैयाँ बिगो मागदाबी भएको छ । लामिछाने गत वर्षको २ कात्तिकमा सहकारी ठगी प्रकरणमा जिम्मेवार भन्दै काठमाडौंबाट पक्राउ परेका थिए । काठमाडौं, कास्की, रुपन्देही र चितवनमा जिल्ला अदालतले मागेको धरौटी बुझाएर रिहा भएका थिए । तर, अन्ततः उच्च अदालत बुटवलले उनलाई पुर्पक्षका लागि थुनामा पठाउन आदेश दियो । उच्चको आदेशले उनी रुपन्देही कारागारमा छन् ।
