बुधबार अधिवक्ता दिनेश त्रिपाठी काठमाडौं जिल्ला अदालतमा नियमित बहसमा सहभागी भएर फर्कंदै थिए । सोहीक्रममा उनीमाथि एक समूहले आक्रमण गर्यो । धन्न त्यसबेला त्यहाँ प्रहरी थियो र उनी जोगिए । नभए त्रिपाठीमाथि सांघातिक हमला हुने थियो ।
त्रिपाठी राष्ट्रिय स्वतन्त्र पार्टीका सभापति रवि लामिछानेमाथि कारबाही हुनुपर्ने भन्दै सरकारी पक्षबाट बहस गर्न सहभागी वकिल हुन् । उनले पोखरासम्म पुगेर पनि लामिछानेविरुद्ध बहस गरेका थिए । रविको विपक्षमा उनीमात्र बहसमा उत्रिएका छैनन् अरु अधिवक्ता पनि छन्, यद्यपि त्रिपाठी भने तारो बने ।
यसको मुख्य कारण उनलाई कांग्रेसनिकट अधिवक्ता मानिन्छ । यसैगरी विभिन्न टेलिभिजन कार्यक्रममा त्रिपाठीले लामिछानेविरुद्ध अभिव्यक्ति पनि दिएको देखिन्छ । जसका कारण रास्वपाका कार्यकर्ता उनीमाथि आक्रोशित हुनु स्वाभाविक हो । तर, अदालतमा वकालत गरेकै कारण उनीमाथि आक्रमण हुनु स्वाभाविक हैन । अदालतमा जोसुकै आरोपी पुगे पनि पक्षधर र विपक्षीको बहस पैरवी हुन्छ । अधिवक्ताको यो कर्म हो धर्म हो ।
अदालत हुनु भनेकै विधिको शासन हो । कानुन व्यवसायीको पेसागत धर्म पनि हो, मुद्दामा पैरवी गर्नु । सहकारीको विषयमा लिएर अहिले देशभर मानिस विभाजित छ । यो विषयमा सहकारीमा रकम राखेका वचतकर्ताको रकम फिर्ता प्रमुख मुद्दा हो । यस विषयमा सरकारले, अदालतले पनि विशेष ध्यान दिनैपर्छ ।
सर्वसाधारण र आक्रोशितले बुझ्नुपर्ने कुरा, देशका शीर्ष नेता तल्लोस्तरमै उत्रेर गालीगलौचमा उत्रन्छन् । सरकार कुहिएर झर्नेसम्मको अभिव्यक्ति विपक्षी दलका नेताले दिँदा प्रधानमन्त्री हाँसेर टार्छन् । सत्ता उनीहरुले घुमाइरहेका छन् । कहिल्यै हातपात र आक्रमणमा उत्रँदैनन् । तर सर्वसाधारण भने आफ्नो आइडलमाथि आरोप लाग्यो भनेर बित्थामा आक्रोशित भएर निन्दनीय कार्यमा उत्रन्छन् ।
अधिवक्ता त्रिपाठीमाथि भएको घटना यसकै उदाहरण हो । यसले त्रिपाठीलाई शारीरिक चोट लाग्ला तर उदाउँदै गरेको दललाई भने गम्भीर असर पुग्छ नै । विधिको शासन भन्दै पाठ पढाउँदै प्रश्न गर्दै हुर्किरहेको पार्टीकै कार्यकर्ताबाट यस्तो कार्य हुँदा नयाँले कस्तो शासन खोजेको हो भनी प्रश्न उठ्छ । कुनैबेला यस्ता अराजक घटना हुँदा श्रव्यदृश्य छायांकन हुने व्यवस्था थिएन । अहिले हरेक घटनाको प्रमाण छायांकन हुन्छ । भोलि यस्तै घटनाले पिरोल्न सक्छ । त्यसैले संयमित बनौं ।
