- दुई जिसस प्रमुखका लागि तीन जनाको उम्मेदवारी दर्ता
- गाउँपालिका अध्यक्ष र उपाध्यक्ष तथा नगरपालिका प्रमुख र उपप्रमुखमा रिक्त आठ पदका लागि ८४ जना उम्मेदवार
- वडाध्यक्षको रिक्त ३४ पदका लागि ३२३ जनाको उम्मेदवारी मनोनयन
- उम्मेदवारको मनोनयनपत्र दर्ता भएकामध्ये सबैभन्दा धेरै धनुषाको धनुषाधाम नगरपालिका वडा नं. १ को वडाध्यक्ष पदमा २१ जना
काठमाडौं– आसन्न स्थानीय निर्वाचनको कार्यतालिका अन्तर्गत आइतबार उम्मेदवारको मनोनयन दर्ता गरिएको छ । दुई जिसस प्रमुखसहित विभिन्न ४४ पदका लागि हुने उपनिर्वाचनमा ४१० जनाको उम्मेदवारी परेको छ । निर्वाचन आयोगले यसलाई ‘उत्साहजनक’ भएको जनाएको छ । उपनिर्वाचन यही १६ मंसिरमा हुँदै छ ।
आयोगले उपनिर्वाचनका लागि आइतबार बिहान १० देखि अपराह्न ५ बजेसम्म सम्बन्धित स्थानीय तहमा स्थापना भएका निर्वाचन अधिकृतको कार्यालयमा उम्मेदवारी दर्ताको समय दिएको थियो । उक्त अवधिमा नेपाली कांग्रेस, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी (रास्वपा), राष्ट्रिय स्वतन्त्र पार्टी (राप्रपा), नेकपा एकीकृत समाजवादीलगायत दलले उम्मेदवारी दर्ता गरेका छन् । स्वतन्त्ररूपमा पनि उम्मेदवारी परेको आयोगकी प्रवक्ता नीता पोखरेल अर्यालले जानकारी दिइन् ।
उनका अनुसार कीर्तिपुर नगरपालिकाको प्रमुखमा २० जनाको उम्मेदवारी परेको छ । कांग्रेसबाट कृष्णमान डंगोल, एमालेबाट डा. सुरेन्द्र मानन्धर, माओवादी केन्द्रबाट प्रा.डा. शिवशरण महर्जन र राप्रपाबाट धु्रव महर्जन उम्मेदवार छन् । जसपा नेपालबाट दीपक महर्जन, एकीकृत समाजवादीबाट भानु रिजाल, नेपाल समाजवादी पार्टीबाट दिलकुमार महर्जन, नेपाल मजदुर किसान पार्टीबाट श्रीकृष्ण महर्जन, जनमतबाट केशव श्रेष्ठ तथा स्वतन्त्रबाट राजमान महर्जनले उम्मेदवारी दर्ता गराएका छन् । यहाँ रास्वपाले उम्मेदवार बनाएन । अन्य १० जनाको स्वतन्त्र उम्मेदवारी परेको छ । उनीहरू नवरथकुमार बानियाँ, रामकृष्ण महर्जन, मिम महर्जन, प्रेमबहादुर महर्जन, दिनेशकुमार अधिकारी, नरेश श्रेष्ठ, धर्मरत्न मानन्धनर, कविकुमार महर्जन, नरेशराज पाण्डे र आनन्द महर्जन हुन् ।
मोरङको ग्रामनाथ गाउँपालिकाको अध्यक्षमा एक जना स्वतन्त्रसहित १६ जनाको उम्मेदवारी परेको छ । त्यहाँ कांग्रेसबाट बलराम सरदार, एमालेबाट तुल्सीराम विश्वास, माओवादीबाट नमोनारायण माझी, रास्वपाबाट नवीनकुमार विश्वास खवास, राप्रपाबाट दिनेशकुमार थन्दार, एकीकृत समाजवादीबाट दिलबहादुर विश्वकर्मा र जसपा नेपालबाट सुरेशकुमार राजवंशी उम्मेदवार बनेका छन् । नागरिक उन्मुक्ति पार्टीले बुद्धिचन थारु, नेमकिपाले परशुराम विश्वास थारु, मंगोल नेशनल अर्गनाइजेसनले भरत राई, जनमतले विनोदकुमार थार, नेपाल समाजवादीले रामकुमार चौधरी, राप्रपा नेपालले राजु मुसहर, समावेशी समाजवादी पार्टीले बोधनारायण माझी र जसपा नेपालले राजवंशी र नम नारायण माझी स्वतन्त्र उम्मेदवार छन् ।
दोलखाको गौरिशंकर गाउँपालिकाको उपाध्यक्षमा पनि १६ जनाकै उम्मेदवारी परेको छ । निर्वाचन आयोगका अनुसार सातजना दल र नौ जना स्वतन्त्र उम्मेदवार छन् । कांग्रेसले पासदिकी तामाङ, एमालेले उमा शेर्पा, माओवादीले निमलेकी शेर्पा, रास्वपाले गोमा श्रेष्ठ, राप्रपाले मनकुमारी श्रेष्ठ, एकीकृत समाजवादीले रविना खड्का र जसपाले सपना कार्की खड्कालाई उम्मेदवार बनाएको छ । स्वतन्त्र उम्मेदवारहरूमा अम्बिका श्रेष्ठ, मधुरा कार्की, दिलबहादुर बस्नेत, दीपक तामाङ, शिव शम्भु तामाङ, अप्सरा विश्वकर्मा, द्धवारिका बुढाथोकी, पुष्प कार्की र सर्कीमा शेर्पा छन् ।
रुकुम पूर्वको पुथा उत्तरगंगा गाउँपालिकाको उपाध्यक्षमा कांग्रेस र एमालेबीच चुनावी तालमेल भएको छ । यहाँ कांग्रेसकी केशकुमारी तुलाचनलाई एमालेले समर्थन गरेको छ । माओवादी केन्द्रले नरपुरा बुढा र एकीकृत समाजवादीले सुनिता बुढा मगरलाई उम्मेदवार बनाएको निर्वाचन आयोगले जनाएको छ । अन्य दलबाट यहाँ उम्मेदवारी परेको छैन । बरु, स्वतन्त्र उम्मेदवार कोपिला पुन बुढा, मोहनभक्त बुढा, भीमकुमारी पुन र श्रीदेवी सुनार छन् ।
यहाँ एकीकृत समाजवादीले उम्मेदवारी फिर्ता लिने र माओवादी उम्मेदवारलाई समर्थन गर्ने माओवादी नेता लिलामणि पोखरेलले बताए । पोखरेलले भनेजसरी एकीकृत समाजवादीले उम्मेदवारी फिर्ता लिए कांग्रेसकी तुलाचन र माओवादीका बुढाबीच मुख्यतः चुनावी प्रतिस्पर्धा हुने छ । हुम्लाको सर्केगाड गाउँपालिकाको उपाध्यक्षका लागि सात जनाको उम्मेदवारी परेको छ । कांग्रेसले सविता बुढा, एमालेले जाना शाही, माओवादीले देवकी तिमल्सिना, रास्वपाले बाँचा बुढा, राप्रपाले संगीता शाही र स्वतन्त्र रूपमा रामसरा खड्का र नरेश शाहीको उम्मेदवारी परेको छ ।
जाजरकोटको नलगाड उपप्रमुखका लागि हुने उपचुनावमा छ जनाको उम्मेदवारी परेको छ । छ जना नै महिला हुन् । कांग्रेसले इन्द्राचन्द्र सिंह, एमालेले सुनिता बोहोरा, माओवादीले देवका लामिछाने, रास्वपाले पार्वती पुन, राप्रपाले सुनिता पुन रावल र नेपाल समाजवादी पार्टीले पवित्रा जैसीलाई उम्मेदवार बनाएको छ । दैलेखको महाबु गाउँपालिकाको अध्यक्षका लागि सात जनाको उम्मेदवारी परेको छ । यहाँ सबै दलबाट मात्रै उम्मेदवार छन् । कांग्रेसले झलकबहादुर भण्डारी, एमालेले जंगबहादुर शाही, माओवादीले जंगबहादुर बराल मगर, रास्वपाले प्रकाशकुमार बुढा, राप्रपाले सुर्जे रावत र नेमकिपाले दुर्गाबहादुर मगरलाई उम्मेदवार बनाएका छन् ।
बाजुराको स्वामीकार्तिक खापर गाउँपालिकाको उपाध्यक्षका लागि पनि सबै जना दलीय र महिला उम्मेदवार छन् । कांग्रेसले पुल्तीसरा शाही, एमालेले सुलोचना कुमारी भण्डारी, माओवादीले राजुकुमारी विक, राप्रपाले सुना देवी थापा भोटे र एकीकृत समाजवादीले जवा शाहीलाई उम्मेदवार बनाएको छ । उपचुनाव हुने अन्य वडाहरूमा पनि उम्मेदवारी दर्ता भएको छ । आयोगकी प्रवक्ता पोखरेलले आज बिहान १० देखि अपराह्न ३ बजेसम्म उम्मेदवारको विरोधमा उजुरी दिने समय तोकिएको बताइन् । त्यसपछि मनोनयनपत्र र उजुरीमाथि जाँचबुझ एवं निर्णय गरी मंसिर ४ गते साँझ ५ देखि ६ बजेसम्म उम्मेदवारको नामावली प्रकाशन गर्ने निर्वाचन कार्यतालिका छ ।
मंसिर ५ गते बिहान ९ देखि अपराह्न १ बजेसम्म उम्मेदवारले नाम फिर्ता लिन सक्ने छन् । सोही दिन दिउँसो १ देखि ३ बजेसम्म अन्तिम नामावली प्रकाशन गरी दिउँसो ३ देखि ५ बजेसम्म उम्मेदवारलाई निर्वाचन चिह्न प्रदान गरिने छ । मंसिर १६ गते बिहान ७ देखि अपराह्न ५ बजेसम्म मतदान हुने छ ।
सो दिन विभिन्न कारणले स्थानीय तहमा रिक्त जिल्ला समन्वय समितिका प्रमुख दुई, गाउँपालिका अध्यक्ष दुई, उपाध्यक्ष चार, नगरपालिका प्रमुख र उपप्रमुख एक÷एक र वडाध्यक्ष ३४ गरी ४४ रिक्त पदमा निर्वाचन हुँदै छ ।
ओखलढुंगा जिसस प्रमुख निर्विरोध
जिल्ला समन्वय समिति ओखलढुंगाको प्रमुखमा कांग्रेस उम्मेदवार निर्विरोध निर्वाचित भएका छन् । निर्वाचित हुनेमा टेकराज भट्टराई रहेका छन् । पालिका प्रमुख, उपप्रमुख वा अध्यक्ष र उपाध्यक्ष मतदाता हुने भएको र ओखलढुंगामा कांग्रेस एक्लैको बहुमत पुग्ने भएकाले अन्य दलले उम्मेदवार तय गरेनन् । सोही कारण भट्टराई निर्विरोध निर्वाचित भएको निर्वाचन आयोगले जनाएको छ ।
आफ्ना उम्मेदवारलाई निर्विरोध निर्वाचित गराउन सहयोग गरेको भन्दै कांग्रेसले अन्य राजनीतिक दल एवं सम्पूर्ण जनप्रतिनिधिलाई धन्यवाद दिएको छ । यद्यपि, निर्वाचन आयोगले उनी निर्विरोध भएको औपचारिकरूपमा घोषणा गरिसकेको छैन ।
