- पक्राउ परेका ६ जनामाथि थप अनुसन्धानका लागि अदालतको अनुमति
- सुनसँगै यी दुई कम्पनीबाट हुण्डी र क्रिप्टोको पनि कारोबार भएको खुलासा
- सुन तस्करीमा संलग्न रहेका आरोपीहरूको करिब तीन अर्ब रुपैयाँको कारोबार
- राष्ट्र बैंकले रोक्का गर्यो दुवै कम्पनीका बैंक खाता
काठमाडौं– बहुचर्चित ६१ किलो तस्करीको सुनबारे दोस्रो चरणको अनुसन्धान गर्ने क्रममा ‘पे वेल’ र ‘सजिलो पे’बाट रकम भुक्तानी भएको खुलेपछि पक्राउ परेका छ जनामाथि थप अनुसन्धानका लागि अदालतले अनुमति दिएको छ ।
‘पे वेल’ र ‘सजिलो पे’ दुवै डिजिटल भुक्तानी प्रदायक कम्पनी हुन् । यी कम्पनीहरूमार्फत तस्करहरूले रकम भुक्तानी गरेको नेपाल प्रहरीको केन्द्रीय अनुसन्धान ब्युरो (सिआइबी)ले तथ्य फेला पारेपछि शुक्रबार भीमप्रसाद तिमिल्सना, प्रज्वल आचार्य, सुरज जबरा, सुशील बञ्जारा, काश्यव मानन्धर र अथुकछाक खम्पालाई पक्राउ गरेको थियो । पक्राउ परेकामध्ये खम्पा स्वास्थ्यमा समस्या देखिएपछि मेट्रो अस्पतालमा भर्ना भएका छन् । बाँकी न्यायिक हिरासतमा छन् । उनीहरू यी दुई कम्पनीमा कार्यरत हुन् ।
तस्करहरूले ६१ किलो सुन खरिदका लागि यी कम्पनीहरूको दुरुपयोग गरेको पाइएको सिआइबी प्रमुख श्यामलाल ज्ञवालीले बताए । ‘पहिलो चरणको अनुसन्धान पहिल्यै सकेर बुझाएको प्रतिवेदनका आधारमा सरकारी वकिल कार्यालयले जिल्ला अदालत काठमाडौंबाट मुद्दा दर्ता गरेर अघि बढिसक्यो र दोस्रो चरणको अनुसन्धानमा हामी छौं,’ उनले प्रभावसँग भने, ‘यही क्रममा दुईवटा डिजिटल कम्पनीको पनि ६१ किलो सुन तस्करीसँग कनेक्सन भएको पाइयो । जसबारे अनुसन्धान जारी छ ।’
सुनसँगै यी दुई कम्पनीबाट अवैध हुण्डी र क्रिप्टोको कारोबार पनि भएको पाइएको सिआइबीले जनाएको छ । सिआइबीका अनुसार यी दुई कम्पनीमा सुन तस्करीमा संलग्न रहेका आरोपीहरूको करिब तीन अर्ब रुपैयाँको कारोबार देखिएको छ । कमिसन लिएर सुन तस्करीको काम गर्नेहरूलाई यी दुई कम्पनीमार्फत गिरोहले भुक्तानी दिने गरेको खुलेको पनि ज्ञवालीले बताए ।
यसक्रममा सिआइबीले थप अनुसन्धानका लागि राष्ट्र बैंकको सहयोग लिएको छ । राष्ट्र बैंकले यी कम्पनीमा रहेका खाता अनिश्चितकालका लागि यही २१ जेठमा रोक्का राखेको छ । अनुसन्धान पनि अगाडि बढाएको छ । कम्पनीबाट भएका कारोबारहरू नियामकीय अनुपालनसम्बन्धी छानबिनको क्रममा रहेको राष्ट्र बैंकले जनाएको छ । यी दुई कम्पनीबाट बैंकिङ प्रणालीमा रकम जाने गरेको देखिएको छ ।
गत वर्षको ३ साउनमा चिनियाँ गिरोहले हङकङबाट मोटरसाइकलको ब्रेकप्याड (ब्रेक सु) मा लुकाएर ल्याएको ६० किलो ७०० ग्राम सुन राजस्व अनुसन्धान विभागले बरामद गरेको थियो । प्रारम्भिक अनुसन्धान विभागबाटै भएको थियो । पछि भने विभागले अनुसन्धानका लागि सहयोग आवश्यक परेको भन्दै सिआइबीलाई अनुसन्धानको जिम्मा दिएको थियो । जतिबेला सिआइबी प्रमुख किरण बज्राचार्य थिइन् ।
बज्राचार्य नेतृत्वको सिआइबीले तस्करीको ६१ किलो सुनबारे पहिलो चरणको अनुसन्धान सकेर बुझाएको प्रतिवेदनका आधारमा सरकारी वकिल कार्यालयले ३१ भदौमा जिल्ला अदालत काठमाडौंमा २९ जनाविरुद्ध अभियोगपत्र दायर गरेको थियो । आरोपीहरूमध्ये केही पुर्पक्षका लागि थुनामा छन् । केही धरौटीमा रिहा भए ।
सबै आरोपितमाथि सुन तस्करी गरेकोमा तीन अर्ब ५० करोड दुई लाख रुपैयाँ, स्कुटरको ब्रेक सुको भन्सारसमेत जोडेर थप २८ लाख ७५ हजार रुपैयाँ गरी कूल बिगो तीन अर्ब ५० करोड ३० लाख रुपैयाँ रहेको अभियोगपत्रमा उल्लेख छ । प्रहरीले आरोपितमाथि बरामद भएकोबाहेक अरू सुन पनि तस्करी गरेको आरोप लगाएको छ । आरोपपत्रअनुसार उनीहरूले ३६२ किलो ७७८ ग्राम सुन तस्करी गरेका छन् ।
आरोपीहरूविरुद्ध अवैध सुन चोरी पैठारी, संगठित अपराध, नागरिकता ऐन, राहदानी ऐन, अध्यागमन ऐनअन्तर्गतको कसुरका साथै एकसाथ यी अपराध गरेकाले एकीकृत कसुरतर्फ थप सजाय मागदाबी भएको छ । एकीकृत कसुर पुष्टि भएमा सबैभन्दा बढी सजाय हुने कसुरमा थप आधा सजायसमेत जोडिन्छ ।तर, सिआइबीको अनुसन्धानमाथि प्रश्न उठेको थियो । यसपछि सरकारले जाँचबुझ आयोग गठन गर्यो । जसले अनुसन्धानमा लापरबाही भएको भन्दै विभिन्न व्यक्तिहरूमाथि थप अनुसन्धान गर्न राय दिएको थियो । त्यसमध्येमै परिन् बज्राचार्य पनि ।
दोस्रोपटक गृहमन्त्री भएपछि रवि लामिछानेले सिआइबीमा ज्ञवालीलाई पठाएपछि अहिले तस्करीको सुनबारे दोस्रो चरणको अनुसन्धान भइरहेको हो । सोही क्रममा तस्करहरूले कमिसनका लागि ‘पे वेल’ र ‘सजिलो पे’को दुरुपयोग गरेको खुलेको हो । यसअघि नै सोही सुनकाण्डमा १० जना पक्राउ परिसकेका छन् । उनीहरू सिआइबीको हिरासतमा छन् । काभ्रेको तेमाल गाउँपालिका–४ का ४५ वर्षीय कान्छामान लामा, वीरगञ्ज महानगरपालिका–११ घर भएका ५२ वर्षीय सुरेन्द्रमान श्रेष्ठ, भारत घर भई ललितपुर बस्ने २२ वर्षीय प्रशान्त गणेश बजवलकर, भारत महाराष्ट्र घर भई न्युरोड बस्ने सिद्धनाथ अशोक गायकवाड ‘सिद्धार्थ’ र भारत नै घर भई न्युरोड बस्ने धीरज निदेश बैटे सिआइबीको हिरासतमा छन् ।
धादिङको सिद्धलेक गाउँपालिकाका प्रेमनाथ सेडाईं, भक्तपुर सूर्यविनायकका राजु खत्री, उदयपुरको त्रियुगा नगरपालिकाकी उषा खत्री निरौला, गोरखाको बारपाक सुलिकोट गाउँपालिका–५ का १८ वर्षीय सायरी विक र बौद्ध बस्ने तिब्बती नागरिक गंगा टासीलाई पनि सिआइबीले पक्राउ गरेर अनुसन्धान गरिरहेको छ । उनीहरू पहिलो चरणको अनुसन्धानबाट उम्किएका थिए । दोस्रो चरणको अनुसन्धानको क्रममा पक्राउ परेका हुन् । उनीहरूमाथि भन्सार चोरी पैठारी तथा संगठित अपराधमा अनुसन्धान गरिरहेको छ ।
