हामी पाँच दलबीच हाम्रै नेतृत्वमा सरकार गठन गर्ने सहमति भइसक्यो । सोहीअनुसार हाम्रो सरकार बन्छ ।
डा. चन्दन सिंह
महासचिव, जनमत पार्टी
काठमाडौं– मधेस प्रदेशको सत्ता नेतृत्व वैकल्पिक शक्तिको रुपमा उदाएको दल जनमत पार्टीले गर्ने निश्चित भएको छ । सत्ता गठबन्धनका दलहरू नेकपा एमाले, नेकपा माओवादी केन्द्र र नेकपा एकीकृत समाजवादीसँगै विपक्षी दल लोकतान्त्रिक समाजवादी पार्टी (लोसपा)ले पनि समर्थन गर्ने भएपछि जनमतको सत्ता नेतृत्व मधेसमा निश्चित भएको हो ।
मधेसमा सत्ता नेतृत्वका लागि १० पुस २०७९ मा पनि जनमतले दाबी गरेको थियो । तर, त्यसबेला उपेन्द्र यादव नेतृत्वको दल जनता समाजवादी (जसपा)ले पायो । जनमत रुष्ट भयो । यद्यपि, सरकारमा भने सामेल भयो । सत्ता सहयात्री भएकै बेला जसपाका मुख्यमन्त्री सरोजकुमार यादवसँग जनमतबाट मन्त्री भएकाहरूको टकराव भयो । अन्ततः ९ माघ २०८० मा यादवलाई दिएको समर्थन फिर्ता लिँदै सरकारबाट बाहिरियो । विपक्षी दलको हैसियतमा पुग्यो ।
अब भने सोही दल जनमत मधेसको सत्ता नेतृत्व गर्ने अवस्थामा पुगेको छ । जनमतका महासचिव डा. चन्दन सिंहले केही दिनमै मधेसमा सरकार गठन हुने बताएका छन् । ‘हामी पाँच दलबीच हाम्रै नेतृत्वमा सरकार गठन गर्ने सहमति भइसक्यो । सोहीअनुसार हाम्रो सरकार बन्छ,’ उनले प्रभावसँग भने ।
बिहीबार पाँच दल (एमाले, माओवादी केन्द्र, जनमत, एकीकृत समाजवादी र लोसपा)बीच मधेसमा सरकार जनमतकै नेतृत्वमा गठन गर्ने सहमति भएको छ । त्यसअघि बुधबार भने कांग्रेस सभापति शेरबहादुर देउवानिवास बूढानीलकण्ठमा एकीकृत समाजवादी र लोसपा जसपाकै नेतृत्वको वर्तमान सरकारलाई निरन्तरता दिन सहमत भएका थिए । त्यसको भोलिपल्टै यी दुई दल पूर्ववत् निर्णयबाट पछि हटे । यसलाई कांग्रेसले भने धोका भनेको छ । कांग्रेसले यी दुई दललाई आफ्नो कित्तामा ल्याएर मधेसबाट सत्ता गठबन्धन फुटाउने रणनीति बनाएको थियो । जुन एकदिन टिकेन । यससँगै मधेसमा जसपाको अल्पमतको सरकार ढल्ने भएको छ ।
त्यहाँ जसपाका सरोजकुमार यादव मुख्यमन्त्री छन् । उनलाई दिएको समर्थन माओवादीले गत ३० वैशाखमा फिर्ता लियो । सरकारबाट पनि बाहिरियो । एमाले पनि यही १ जेठमा समर्थन फिर्ता लिँदै सरकारबाट बाहिरियो । अशोक राईको नेतृत्वमा गत २३ वैशाखमा जसपा विभाजन भएपछि मधेसमा राजनीतिक उथलपुथल भएको हो । यसले गर्दा अब यही २३ जेठसम्ममा विश्वासको मत लिनुपर्ने बाध्यतामा मुख्यमन्त्री यादव छन् । तर, उनले विश्वासको मत पाउने सम्भावना अत्यन्तै न्यून छ । जसपा प्रवक्ता मनिष सुमनले भने विश्वासको मत पाएर मधेसमा जसपाकै सरकारले निरन्तरता पाउने दाबी गरे ।
‘मधेसमा दलहरूबीच सहमति गरेर हाम्रै नेतृत्वको सरकारलाई निरन्तरता दिन्छौं । मलाई लाग्छ जसपाको सरकारलाई निरन्तरता दिँदा राजनीतिक स्थिरता कायम रहन्छ,’ जसपा प्रवक्ता मनिष सुमनले भने, ‘त्यही भएर विश्वासको मत हाम्रो मुख्यमन्त्रीले पाउनुहुन्छ । सरकार टिक्छ ।’
सुमनले भनेअनुसार मुख्यमन्त्री यादवले विश्वासको मत पाउने छाँट देखिँदैन । उनले यही २३ जेठमा विश्वासको मत लिने तयारी गरेका छन् । १०७ सदस्यीय प्रदेशसभामा सरकार जोगाउन कम्तीमा ५४ मत आवश्यक हुन्छ । सत्ता नेतृत्व दल जसपा नेपालसँग १९ सांसद छन् । विभाजित जसपाको पक्षमा सांसदहरू खुलिसकेका छैनन् ।
सबैभन्दा बढी सांसद भने एमालेको २५ जना छन् । कांग्रेसका २२ जना, जनमतको १३ जना, माओवादी र लोसपाको समान नौ÷नौ जना, एकीकृत समाजवादीको सात जना, नेपाल संघीय समाजवादी पार्टी, नागरिक उन्मुक्ति पार्टी र राप्रपाको समान एक÷एक जना सांसद छन् ।
यसले गर्दा एमाले, माओवादी, जनमत, लोसपा र एकीकृत समाजवादीको सरकार मधेसमा बन्ने स्पष्ट बहुमत देखिएको छ । यी पाँच दलको सांसद संख्या ६३ पुग्छ । जबकि सरकार गठन गर्न झिनो बहुमत ५४ सांसदको हो । आवश्यकभन्दा बढी बहुमत यी पाँच दलको देखिएको छ ।
मधेसमा अघिल्लो संसद्को पूरै कार्यकाल भने जसपाले सरकारको नेतृत्व लिएको थियो । वर्तमान संसद्मा पनि हालसम्म जसपाकै नेतृत्वमा सरकार छ । तर, अब भने जनमतको काँधमा मधेसको सत्ता नेतृत्व पुग्ने भएको हो । जनमत महासचिव सिंहका अनुसार मधेससहित राष्ट्रिय राजनीतिमा भएको उथलपुथलको कारक जसपा अध्यक्ष उपेन्द्रलाई ठान्छन् ।
उनले भने, ‘सरकारमा रहेर सरकार ढाल्न वैकल्पिक गठबन्धनको खेलमा उपेन्द्र यादव लागेका होइनन् र ? सरकारमा बसेर त्यस्तो अराजनीतिक खेल खेल्न मिल्छ ? त्यसले गर्दा अहिले जे भयो र हुँदै छ, त्यसको कारक उपेन्द्र हो ।’
मधेसमा जसपा र जनमतबीच लामो समयदेखि शक्ति संघर्ष जारी छ । ४ मंसिर २०७९ मा भएको चुनावमासमेत जसपाको आधार इलाकामा जनमतको प्रभाव देखिएको थियो । चुनावमा जसपाविरोधी अभियान जनमतले चलाएको थियो । सोही दलले अब जसपालाई मधेसको सत्ताबाट विस्थापन गर्ने भएको हो ।
