- सुनिलपछि विकल पौडेल पनि जेल चलान
- पदमा रहँदा विकल र सुनिलको भ्रष्टाचार साम्राज्य विदेशसम्मै
- विकलको ६२ करोड १९ लाख रुपैयाँ र सुनिलको २३ करोड ७५ लाख रुपैयाँ गैरकानुनी सम्पत्ति
काठमाडौं– अस्थिर राजनीतिको फाइदा उठाउँदै भ्रष्टाचारको साम्राज्य फैलाएका नेपाल टेलिकमका निलम्बित प्रबन्ध निर्देशक सुनिल पौडेलपछि सुरक्षण मुद्रण केन्द्रका तत्कालीन कार्यकारी निर्देशक विकल पौडेल पनि थुनामा पुगेका छन् । पदको दुरुपयोग गर्दै सूचना प्रविधिसँग जोडिएका विभिन्न कम्पनीसँग ठेक्काको क्रममा घूस माग्नेदेखि अन्य भ्रष्टाचारजन्य कार्य गरेको देखिएपछि थप अनुसन्धान गर्नुपर्ने भएका कारण विशेष अदालतले उनीहरूलाई थुनामा पठाएको हो ।
सुनिललाई अदालतका न्यायाधीशहरू खुसीप्रसाद थारू, तेजनारायण सिंह राई र मुरारीबाबु श्रेष्ठको इजलासले थुनामा राखी मुद्दाको प्रक्रिया अघि बढाउन बुधबार आदेश दिएको हो । अदालतको आदेशपछि विकल डिल्लीबजार कारागार चलान भएका छन् । उनी गत १० माघ २०८० मा पक्राउ परेका थिए । उनलाई अख्तियार दुरुपयोग अनुसन्धान आयोगले हिरासतमा लिएको थियो ।
विशेष अदालतबाट उनी सुरक्षण मुद्रण केन्द्रको भ्रष्टाचार र झूठो विवरण बुझाएर नियुक्ति लिएको छुट्टा–छुट्टै दुई भ्रष्टाचार मुद्दामा दोषी ठहर भइसकेका छन् । उनीविरुद्ध अझै दुईवटा छुट्टा–छुट्टै मुद्दा विचाराधीन छ । सुनिल भने गत १२ वैशाखमै डिल्लीबजार कारागार चलान भइसकेका छन् । न्यायाधीश तेजनारायणसिंह राई, रामबहादुर थापा र रितेन्द्र थापाको इजलासले गैरकानुनी सम्पत्ति आर्जनमा उनलाई पुर्पक्षका लागि थुनामा पठाउने आदेश दिएको थियो ।
उनीविरुद्ध अख्तियारले ९ वैशाखमा गैरकानुनी सम्पत्ति आर्जनको मुद्दा दायर गरेको थियो । सरकारी सेवामा रहेको अवधिमा उनले आर्जन गरेको सम्पत्तिमध्ये २३ करोड ७५ लाखको स्रोत नखुलेको अख्तियारको दाबी थियो । नेसनल पेमेन्ट गेटवेको प्रणाली खरिदमा पनि विशेष अदालतले दोषी ठहर गरेको थियो ।पौडेलद्वय दाजुभाइ हुन् । भ्रष्टाचारजन्य कसूरमा दुवैको संलग्नता देखिएको छ । थप अनुसन्धान गर्नुपर्ने भएपछि उनीहरूलाई एकपछि गरी विशेष अदालतले थुनामा पठाएको अदालतका प्रवक्ता धनबहादुर कार्कीले बताए ।
अख्तियारले पछिल्लो पाँच वर्षमा पौडेलद्वयले सूचना प्रविधि क्षेत्रबाट एक अर्ब रुपैयाँ घूस संकलन गरेको दाबी गरेको छ । जुन भ्रष्टाचारबापत संकलन भएको जनाएको छ । सोहीअनुसार अख्तियारले सुरक्षण मुद्रण केन्द्रको कार्यकारी निर्देशक पदबाट बर्खास्तीमा परेका विकलमाथि ६२ करोड १९ लाख रुपैयाँ गैरकानुनी रूपमा सम्पत्ति आर्जन गरेको अभियोग छ । सुनिलमाथि भने २३ करोड ७५ लाख रुपैयाँ गैरकानुनी रूपमा जोडेको अख्तियारको दाबी छ ।
विकलले मुद्रण केन्द्रका विभिन्न ठेक्कापट्टामा भ्रष्टाचार गरेको र सिंगापुर र अमेरिकामा घूससमेत बुझेको अख्तियारले विशेष अदालतमा दायर गरेको आरोपपत्रमा उल्लेख छ । अख्तियार प्रवक्ता नरहरि घिमिरेका अनुसार इन्स्टासेफ कम्पनीले सिंगापुरस्थित युनाइटेड बैंकमा रहेको विकलको खातामा चार करोड ५१ लाख रुपैयाँ कमिसन दिएको देखिएको बताएका छन् । बैंकोटडकले पनि उनलाई १० करोड ७७ लाख कमिसन दिएको थियो । यस्तैयस्तै रकम राखेको विदेशस्थित खातामा २८ करोड ४५ लाख रुपैयाँ रहेको अख्तियार प्रवक्ता घिमिरे बताउँछन् । यसबाहेक वल्र्ड डिस्ट्रिब्युसन नेपाललगायत कम्पनीबाट पनि उनले कमिसन लिएका थिए ।
अख्तियारले सुरुमा करिब दुई अर्ब ९५ करोड रुपैयाँको सामान आपूर्ति गर्दा मूल्य अस्वाभाविक रूपमा बढाएको र मिलेमतो गरेको पनि जनाएको थियो ।विकलकै हकमा अख्तियारले एक महिलाका लागि एक करोड तीन लाख रुपैयाँ खर्च गरेको भन्दै अख्तियारले प्रश्न गरेको हो । जबकि बिहेमा भने तीन लाख रुपैयाँ खर्च गरेको उनले दाबी गरेका थिए । यसलाई लिएर अख्तियारले प्रश्न उठाएको हो । उनीमाथि राष्ट्रिय सूचना प्रविधि केन्द्रमा रहँदा नेपाली कम्पनीहरूलाई मिलेमतोमा ठेक्का दिएको, ती कम्पनीहरूले सिंगापुरको कम्पनीहरूसँग ठेक्का लिएको र त्यहाँबाट सुनिलले सिंगापुरमै कमिसन लिएको अख्तियारको दाबी छ ।
अख्तियार प्रवक्ता घिमिरेले प्रभावसँग भने, ‘राष्ट्रिय सूचना प्रविधि केन्द्रले पछिल्लो पाँच वर्षमा २९ वटा ठेक्कापट्टाको काम गरेको थियो । त्यो बापत तीन अर्ब २९ करोड रुपैयाँ भुक्तानी भएको छ । केन्द्रले ओम्नी बिजनेसन कर्पोरेट इन्टरनेसनल, म्याक्स इन्टरनेसनल प्रालि, वल्र्ड डिस्ट्रिब्युसन नेपाल प्रालि र नेक्स्ट जेन सोलुसनसँग काम गरेको देखिएको छ ।’
यसपछि भने ठेक्का पाएका कम्पनीहरूले सिंगापुरको बैंकोटेक प्रालि र इस्टासेफ इंक नामक कम्पनीसँग सूचना प्रविधिका उपकरण खरिद गरेर रकम सिंगापुरमा भुक्तानी गरेका थिए । ती कम्पनीहरूले सिंगापुरको युनाइटेड ओभरसिज बैंकमा रहेको सुनिलको खातामा १३ करोड ५३ लाख रुपैयाँ जम्मा भएको भेटिएको छ ।
अनुसन्धानरत निकाय पौडेलद्वयले ठेक्कापट्टा र कमिसनका लागि धन्दा चलाउँथे । अमेरिकामा रहेका दीपक आनन्द नाम गरेका व्यक्तिसँग उनीहरूले ठेक्कापट्टामा मोलमोलाई गरेको पनि बरामद गरिएका ल्यापटपबाट खुलेको थियो । उसो त केही वर्षदेखि नै सुरक्षण मुद्रण केन्द्र र राष्ट्रिय सूचना प्रविधि केन्द्रबाट भएका अधिकांश ठेक्कापट्टालाई लिएर विवाद भएको थियो । जसलाई लिएर अनुसन्धान थालेको अख्तियारले अन्ततः पौडेल दाजुभाइ भ्रष्टाचारजन्य कसूरमा संलग्न रेहको देखिएपछि मुद्दा अघि बढाएको थियो हो । विशेष अदालतबाट दुवैजनाको संलग्नता देखिएको भन्दै अन्ततः कारागार चलानको आदेश भएको हो ।
