काठमाडौं– विवाहेत्तर सम्बन्धले हत्याजस्तो गम्भीर प्रकृतिको फौजदारी अपराध बढाएको छ । पछिल्ला महिनामा त्यस्तो सम्बन्धले बढाएको हत्या घटनाको ग्राफ पनि उच्च देखिएको छ । जसले पारिवारिक सुरक्षामा समेत चुनौती थपिदिएको छ ।
बुधबारमात्रै काठमाडौंको सीतापाइलास्थित भैरवटोलमा श्रीमतीसहित तीन जनाको हत्यापछि श्रीमानले आत्महत्या गरे । घटनाको अनुसन्धानमा संलग्न प्रहरी अधिकारीले उक्त घटनाको कारण विवाहेत्तर सम्बन्ध रहेको प्रारम्भिक निष्कर्ष निकालेका छन् ।
घटनामा ३८ वर्षीया श्रीमती ईश्वरी भनिने प्रेमकुमारी श्रेष्ठ, ८ वर्षीया छोरी अनिशा र २८ महिने नातिनी शिवानी श्रेष्ठ मारिएका थिए । हत्यामा संलग्न भनिएका काजी भनिने राजु विश्वकर्मा आत्महत्या गरेको अवस्थामा फेला परे । अर्थात् विवाहेत्तर सम्बन्धको आशंकाले एकै परिवारका चार सदस्य मासिए ।
काठमाडौं प्रहरी परिसरका प्रमुख (एसएसपी) भूपेन्द्र खत्रीका अनुसार नाबालक छोरा अनिशको मोबाइलमा राजुले खिचाएको भिडियो सन्देशले श्रीमती ईश्वरीको विवाहेत्तर सम्बन्ध नै घटनाको कारक रहेको खुलाउँछ ।
भिडियोमा हत्या आरोपी राजुले भनेका छन्, ‘...मैले बाँचेर गरी खाने ठाउँ भएन । आज पो राम्रो होला कि, भोलि पो राम्रो होला कि भनेर हेरें । कहिल्यै पनि राम्रो भएन । त्यही भएर मैले यस्तो निर्णय गरेको छु । तिमीहरू मिलेर गरिखानू । मिलेर बस्नू । ममीजस्तो भएर नहिँड्नू । त्यही हो मेरो भनाइ । माफ गरिदे मलाई ।’
स्थानीय एक अर्धबैंशे पुरुषसँग ईश्वरी सम्बन्धमा रहेको र अन्ततः ईश्वरीले राजुको दबाबमा ती पुरुषविरुद्ध बलात्कारसम्बन्धी मुद्दा दायर गरेकी थिइन् । तर, पनि पाँच लाख धरौटीमा गत साता ती पुरुष छुटेको र ईश्वरीले भेट्ने क्रम जारी राखेपछि राजु क्रुद्ध बनेका थिए । चितवनका अर्का एक जना पुरुषसँग पनि ईश्वरी सम्बन्धमा रहेको बताइएको छ । परिणामतः बुधबार श्रीमतीसहित तीन जनाको हत्या गरेर आत्महत्या गरेको निष्कर्ष प्रहरीको छ ।
यसअघि २७ माघमा काठमाडौंकै गौशलाको एक होटलमा महिला मृत फेला परेकी थिइन् । घटनाको अनुसन्धान गर्दै जाँदा प्रहरीले मृत महिला रामेछापको लिखु–६ की २८ वर्षीया प्रमिला दमाई रहेको पत्ता लगायो । विवाहित उनी दोलखाको बैतेश्वर– ७ का कुमार श्रेष्ठ (विवाहित)सँग विवाहेत्तर सम्बन्धमा रहेको प्रहरीले अनुसन्धानपछि पत्ता लगायो र घटनाको कारण विवाहेत्तर सम्बन्धमा खटपट रहेको निष्कर्ष निकाल्यो ।
गत ७ माघमा काठमाडौंको स्वयम्भूस्थित शोभाभगवतीमा रहेको एक घरमा ५१ वर्षीया सफिना मियाँको शरीर सडिएको अवस्थामा फेला प¥यो । घटना तीन महिना पहिलेको भएको प्रहरीले निष्कर्ष निकाल्यो । टाउकोमा गम्भीर चोट लागेको देखिएका सफिनाको हत्या आरोपमा प्रहरीले प्रेमी भारतको विहारका इकरामुल हक अन्सारीलाई पक्राउ ग¥यो । अनुसन्धानको क्रममा विवाहेत्तर सम्बन्धमा उनी सफिनासँग रहेको र सम्बन्धमा खटपट भएपछि हत्या गरेको बयान दिएको प्रहरीले जनायो ।
मृतक मिया तनहुँको भीमदत्त नगरपालिका– १ की रहेको खुलेको छ । अन्सारीसँग प्रेममा परेर लिभिङ टुगेदरमा रहेका बेला घटना भएको हो । गत २६ पुसमा पाँचथरको आरुबोटेमा माइतीघरमै गोमा फियाकको हत्या भयो । हत्या आरोपमा प्रहरीले पति नरध्वज कुरुम्बाङलाई पक्राउ ग¥यो । प्रहरीले घटनाको अनुसन्धान सकेको छ र अनुसन्धान प्रतिवेदनका आधारमा सरकारी वकिल कार्यालयले जिल्ला अदालतमा कर्तव्य ज्यानसम्बन्धी मुद्दा दायर गरिसकेको छ । बयानका क्रममा नरध्वजले श्रीमती गोमाको मोबाइलमा केटा मान्छेको फोन जहिल्यै आउने गरेको र घर नै छाडेर एक महिना ती केटासँग हराएको भनेका छन् । प्रहरीले यो घटनाको कारण पनि विवाहेत्तर सम्बन्धलाई मानेको छ ।
नेपाल प्रहरीका केन्द्रीय प्रवक्ता भीमप्रसाद ढकालले पछिल्ला दिनमा विवाहेत्तर सम्बन्धले हत्या घटना निम्त्याएको बताएका छन् । उनले त्यस्ता हत्या घटना ‘आवेशप्रेरित र योजनाबद्ध’ दुवै देखिएको बताए ।उनका अनुसार सीतापाइला घटना योजनाबद्ध भएको देखिन्छ । घटनामा आरोपी राजुले मंगलबार राति नै हम्मर र कैंची लगेर राखेको र बुधबार बिहानै श्रीमतीसहित तीन जनाको हत्या गर्नुले घटना योजनाबद्ध देखिएको ढकालले बताए ।
प्रहरीको तथ्यांकअनुसार हरेक दिन कम्तीमा दुई जनाको हत्या हुन्छ । पछिल्लो साढे सात वर्षमा चार हजार तीन सय ७० जनाको हत्या भएको तथ्यांकको आधारमा दिनहुँ दुई जनाको हत्या हुने गरेको देखिएको हो ।मारिनेमा पुरुष धेरै छन् । साढे सात वर्षमा दुई हजार चार सय २९ जना पुरुष र एक हजार चार सय ८१ जना महिलाको हत्या भएको छ । तीन सय पाँच बालक एक सय ५५ बालिकाको पनि हत्या भएको छ । यसमध्ये केही पुरुष र महिलाको विवाहेत्तर सम्बन्धले निम्त्याएको दरार रहेको प्रहरीले जनाएको छ ।
