- भौतिक पूर्वाधारमन्त्री प्रकाश ज्वालालाई तत्काल बर्खास्त गर्न विपक्षी दलहरूको दबाब
- प्रतिवेदन अध्ययन गरेपछि दोषीमाथि कारबाही गर्ने प्रधानमन्त्रीको भनाइ
प्रतिवेदन पढ्न पाएको छैन । मिडियाले केही लेखेको कुरा आएको हो । मेरो दोष छैन ।
प्रकाश ज्वाला
मन्त्री, भौतिक पूर्वाधार
काठमाडौं– भौतिक पूर्वाधार तथा यातायातमन्त्री प्रकाश ज्वालालाई पदबाट बर्खास्त गर्न प्रधानमन्त्री पुष्पकमल दाहालमाथि दबाब बढेको छ । १३ पुसमा ललितपुरको बालकुमारीमा दुईजना युवकको ज्यान जाने गरी भएको घटनामा मुख्य दोषी ठहर भएपछि ज्वालालाई मन्त्री पदबाट बर्खास्त गर्न विपक्षी दलहरूले माग गरे ।
आइतबार बसेको संसद् बैठकमा एमाले सचेतक महेश बर्तौलाले मन्त्री ज्वालालाई तत्काल बर्खास्त गर्न सभामुख देवराज घिमिरेमार्फत प्रधानमन्त्री दाहालको ध्यानाकर्षण गराए । उनले मन्त्री ज्वालालाई जोगाएको भन्दै आक्रोश पनि पोखे । घटनामा गृहमन्त्री नारायणकाजी श्रेष्ठ पनि जोगिएको र उनलाई पनि प्रधानमन्त्रीले हटाउनुपर्ने बताए ।
‘सिपाहीलाई डण्डा, मन्त्रीलाई झण्डा ? जनतालाई ऐन, ठूला मन्त्रीहरूलाई चैन ? यो कुन खालको विधिको शासन हो ? सरकारको सुशासन यही हो ? यो गम्भीर प्रश्न गर्न चाहन्छु,’ सचेतक बर्तौलाले भने, ‘त्यसकारण तत्काल घटनासँग जोडिएका मन्त्री र ंिसगो गृह प्रशासन नेतृत्व गर्ने गृहमन्त्री पनि यसमा जोडिने अवस्था छ । घटनामा जोडिएका सम्बन्धित मन्त्रीहरूलाई अविलम्व जिम्मेवारीबाट हटाइयोस् । बर्खास्ती गरियोस् ।’
स्वास्थ्य तथा जनसंख्यामन्त्री मोहनबहादुर बस्नेतलाई पनि बर्खास्त गर्न बर्तौलाले माग गरे । संसद् बैठकमा विशेष समय लिएर बोल्दै उनले अख्तियार दुरुपयोग अनुसन्धान आयोगले बयान लिएका मन्त्री बस्नेतलाई पनि पदमा बहाल राख्न नहुने बताए । मन्त्री बस्नेत टेरामक्स प्रकरणमा मुछिएका छन् ।
संसद् बैठकमा राष्ट्रिय स्वतन्त्र पार्टीका सभापति रवि लामिछानेले प्रधानमन्त्री पुष्पकमल दाहाललाई बालकुमारी घटनामा दोषी देखिएका बहालवाला मन्त्री प्रकाश ज्वालालाई के गर्ने भनेर सोधे ? उनले यो प्रकरणमा प्रधानमन्त्रीको परीक्षा हुने पनि बताए ।
‘प्रधानमन्त्रीको आज जाँच हुन्छ । दोषी ठहरिएका मन्त्रीलाई के गर्ने हो ?,’ संसद् बैठकमा लामिछानेले भने । जाँचबुझ आयोगले दोषी ठहर गर्दा पनि मन्त्री ज्वालाले नैतिकता नदेखाएको भन्दै लामिछानेले रोष प्रकट गरे ।
‘अहिलेसम्म मन्त्रीले न नैतिकताको प्रदर्शन गरेका छन्, न प्रधानमन्त्रीले छनक देखाउनुभएको छ,’ उनले भने, ‘छानबिन आयोगले दोषी ठह¥याउँदा पनि चुइँक्क नबोली भाषण गर्दै हिँड्नेसँग नैतिकता हुन्छ ?’
संसद्को अर्को विपक्षी दल राष्ट्रिय प्रजातन्त्र पार्टी (राप्रपा)का सांसद दीपक सिंहले पनि मन्त्री ज्वालालाई छिटो पदबाट बर्खास्त गर्न माग गरे । बालकुमारी घटनामा दोषी देखिँदा पनि प्रधानमन्त्रीले ज्वालालाई जोगाइ राखेको भन्दै सिंहले शंका गरे । उनका अनुसार राप्रपाले बालकुमारी घटनामा दोषी देखिएका मन्त्रीलाई जोगाउनु हुँदैन । आइतबारको संसद् बैठकको शून्य समयमा बोल्दै उनले भने, ‘छानबिन समितिले दोषी ठहर गरेको छ । मन्त्री ज्वालालाई हटाउन राप्रपा माग गर्दछ ।’
इपिएस भाषा परीक्षामा सहभागिताको विषयलाई लिएर गत १३ पुसको दिन पनि युवाहरू बालकुमारी क्षेत्रमा आन्दोलित थिए । त्यहीबेला मन्त्री ज्वाला आन्दोलन भइरहेको क्षेत्र हुँदै हिँडेको र त्यहीबेला युवाहरू थप उत्तेजित हुनेगरी अभिव्यक्ति दिएको पाइएको जाँचबुझ समितिको निष्कर्ष छ । त्यही भएर अन्ततः बालकुमारी घटना हुन पुगेको समितिले जनाएको छ । घटनामा अछामका वीरेन्द्र शाह र दैलेखका सुजन राउतको मृत्यु भएको थियो । यही घटनामा मन्त्री ज्वाला जाँचबुझ आयोगबाट दोषी ठहर भइसकेका छन् । तर, उनलाई हटाउन न प्रधानमन्त्रीले कदम थाले, न त पूर्वप्रधानमन्त्रीसमेत रहेका नेकपा एसका अध्यक्ष खनालले फिर्ता बोलाए । यसले गर्दा पनि विपक्षी दलहरूले संशय प्रकट गरेका हुन् ।
कारबाही हुन्छ : प्रधानमन्त्री
माधवकुमार नेपाल नेतृत्वको नेकपा एकीकृत समाजवादीबाट ज्वाला भौतिक पूर्वाधार तथा यातायातमन्त्री भएका हुन् । अध्यक्ष नेपालले पार्टी संसदीय दलको बैठक बोलाएर मन्त्री ज्वालालाई फिर्ता बोलाउने निर्णय गरेकै छैन । यसले गर्दा प्रधानमन्त्री दाहाल अप्ठेरोमा परेका छन् । तर, उनलाई विपक्षी दलहरूको दबाब थेगिसक्नु छैन । आइतबारको संसद् बैठकमा सबै विपक्षी दलहरूले तत्काल बर्खास्त गर्न माग गरेपछि प्रधानमन्त्री दाहालले बालकुमारी घटनाको प्रतिवेदन अध्ययन गरेपछि दोषीलाई कारबाही गर्ने बताए । उनले प्रतिवेदन आफूले पाउन बाँकी रहेको पनि बताए ।
‘छानबिन समितिको प्रतिवेदन आएको छ । समितिले गृह मन्त्रालयलाई बुझाएको छ र आज (आइतबार) मेरोमा आउँछ । प्रतिवेदन अध्ययन गरेपछि दोषीमाथि कारबाही गरिन्छ,’ दाहालले संसद्मा भने । उनले घटनाको तथ्यलाई बंग्याएको भन्दै विपक्षी दलहरूको आलोचना गरे । घटनाप्रति गम्भीर भएरै तत्काल छानबिन समिति बनाइएको र घटनामा संलग्नलाई निलम्बन गरिएको उनको भनाइ छ । ‘छानबिन समिति प्रतिपक्षीले बनाएको हो र ? होइन । मेरै प्रस्तावमा बनेको हो,’ प्रधानमन्त्री दाहालले भने ।
मेरो दोष छैन : मन्त्री ज्वाला
जाँचबुझ समितिले बालकुमारी घटनामा मुख्य दोषी ठहर गरेको अवस्थामा पनि भौतिक पूर्वाधार तथा यातायातमन्त्री प्रकाश ज्वालाले भने आफ्नो दोष नभएको बताएका छन् । संसद् बैठकमा उठेको प्रश्नको जवाफ दिँदै उनले भने, ‘मेरो कुनै दोष छैन ।’
उनले आयोगले गृहमन्त्री नारायणकाजी श्रेष्ठलाई बुझाएको प्रतिवेदन अध्ययन गर्न पनि बाँकी रहेको बताए । त्यसपछि के गर्ने भन्ने टुंगोमा पुगिने उनको भनाइ छ । उनले भने, ‘प्रतिवेदन पढ्न पाएको छैन । मिडियाले केही लेखेको कुरा आएको हो ।’
जाँचबुझ समितिको अध्यक्ष उच्च अदालतका पूर्वन्यायाधीश शेखरप्रसाद पौडेल थिए । आयोगका सदस्यहरू पूर्वअतिरिक्त प्रहरी महानिरीक्षक अरुणकुमार बिसी र गृह मन्त्रालयका सहसचिव नारायणप्रसाद भट्टराई थिए । आयोगले पुस २० देखि काम सुरु गरेर १५ दिन समय थप गरी ४४ दिनमा प्रतिवेदन बुझाएको थियो ।
आयोगले घटनास्थलको निरीक्षण गरेको, प्रत्यक्षदर्शी, सञ्चारकर्मी, पीडित परिवार, घटनाका घाइते, विशेषज्ञ डाक्टर तथा घटनासँग सम्बन्धित अन्यसहित १६ जनाको बयान अभिलेख गरेको र घटनासँग सम्बन्धित सुरक्षा निकायका पदाधिकारी एवं अन्यसमेत गरी २९ जनाको बयान लिएको थियो ।
