घटनाहरुको अनुसन्धान गर्दा सामूहिक बलात्कारमा चिनेजानेकाहरु हुन्छन् । आफन्त, घरपरिवारका सदस्य हुँदैनन् । केही घटनामा नचिनेका मान्छे पनि देखिएका छन् ।
कुबेर कडायत
प्रवक्ता नेपाल प्रहरी
काठमाडौं– पछिल्ला दिनहरुमा एकपछि अर्को सामूहिक बलात्कारका घटना सार्वजनिक भएका छन् । मुगुमा आइतबार एक बालिकामाथि सरकारी कर्मचारीदेखि प्रहरीसमेत गरी नौ जनाले सामूहिक बलात्कार गरेको सार्वजनिक भयो । मुगुको घटना सेलाउन नपाउँदै मंगलबार काभ्रेमा पनि त्यस्तै घटना भएको सार्वजनिक भयो । उक्त घटना २७ पुसमा भएको खुलेको छ ।
काभ्रेको पाँचखाल नगरपालिका वडा नम्बर ७ शिखरपुरको झाडीमा एक युवतीलाई सामूहिक बलात्कार भएको जिल्ला प्रहरी कार्यालय काभ्रेले जनाएको छ । १९ वर्षीया ती युवतीलाई बलात्कार गरेको आरोपमा सोही ठाउँमा डेरा गरी बस्ने चारजना युवालाई प्रहरीले नियन्त्रणमा लिएको छ ।
काभ्रे प्रहरीका प्रमुख भाग्यन्द्र पुरुष ढकालले प्रभावलाई दिएको जानकारीअनुसार पीडित युवतीले दिएको किटानी जाहेरीका आधारमा उनीहरु पक्राउ परेका हुन् । पक्राउ पर्नेमा उदयपुरको ताप्ली गाउँपालिका–८ का २८ वर्षीय धिरज हमाल, भोजपुरको षडानन्द गाउँपालिका वडा–८ का घनश्याम श्रेष्ठ, धनकुटाको महालक्ष्मी नगरपालिका–४ का १९ वर्षका अमर विक र सोही स्थानमा काम गरी बस्ने १७ वर्षीय किशोर छन् ।
बलात्कारपछि विक्षिप्त युवतीले आत्महत्या प्रयाससमेत गरेको खुलेको छ । स्थानीयको सहयोगमा उनलाई पाँचखाल प्रहरी चौकीले उद्धार गरेको र त्यसपछि युवतीले आफू बलात्कारमा परेको घटना सार्वजनिक गरेकी थिइन् । पक्राउ परेकाहरुविरुद्ध प्रहरीले सात दिनको म्याद थपेर अनुसन्धान गरिरहेको छ ।
सोमबार मुगुमा १४ वर्षीया एक बालिका बलात्कृत भएको घटना बाहिरिएको थियो । जिल्ला प्रहरी कार्यालयमा पीडित बालिकाले आफूमाथि छ बालक र तीन युवक गरी नौ जनाले बलात्कार गरेको किटानी जाहेरी दर्ता गराएपछि घटना बाहिरिएको हो ।
बालिकाले दर्ता गराएको जाहेरीमा प्रहरीदेखि सरकारी कर्मचारीसम्मले आफूमाथि सामूहिक बलात्कार गरेको आरोप लगाएकी छन् । जाहेरीपछि मुगु प्रहरीले छायाँनाथ रारा नगरपालिकामा कार्यरत नगर प्रहरी छायानाथ नगरपालिका–५, कार्कीवाडाका ३० वर्षीय वसन्तबहादुर कार्की, कृषि विकास कार्यालय गमगढीका कार्यालय सहयोगी २२ वर्षीय वसन्त रोकाया र तीन बालक गरी पाँचजनालाई पक्राउ गरेर अनुसन्धान अगाडि बढाएको छ ।
बलात्कार घटनामा संलग्न भनिएका कृषि विकास कार्यालय गमगढीकै सवारीचालक जुम्लाको चन्दननाथ नगरपालिका–७ का ३० वर्षीय पदमबहादुर कठायतसहित तीनजना बालक फरार रहेको मुगुका प्रहरी प्रमुख प्रहरी नायब उपरीक्षक वीरेन्द्र थापाले बताए ।
बालिकाका आफन्तकाअनुसार मुगुको छायानाथ रारा नगरपालिकाकी बालिका सदरमुकाम गमगढीस्थित डेरामा बसेर कक्षा ७ मा पढ्दै आएकी थिइन् । पीडित बालिकाले आफूमाथि फरक–फरक समय गरी दुईपटक सामूहिक बलात्कार भएको भन्दै प्रहरीसमक्ष दुईवटा छुट्टा–छुट्टै जाहेरी दर्ता गराएकी छन् ।
घटना भने साढे चार महिनाअघिको भएको खुलेको छ । पेट दुख्ने समस्या देखापरेपछि ती बालिका स्थानीय स्वास्थ्य संस्थामा गएको र त्यहाँ उनको गर्भमा १८ हप्ताको बच्चा रहेको पाइएको थियो । त्यसपछि जिल्ला प्रहरी कार्यालयमा दर्ता गराएको उजुरीमा उल्लिखित परिवर्तित नाम छायानाथ (ढ) ६० ले १६ भदौ बेलुका अन्दाजी ९ बजे कोठामा बोलाएपछि आफू पुगेको बताएकी छन् । त्यहाँ बोलाउने ती बालकसहित छ जनाले पालैपालो बलात्कार गरेको र त्यसैबेला पेटमा गर्भ बसेको दाबी बालिकाले गरेको प्रहरीको भनाइ छ ।
यो घटनापछि १० असोजमा अर्को समूहले आफूलाई सामूहिक करणी गरेको बालिकाको उजुरीमा छ । ३० वर्षीय वसन्तबहादुर कार्कीले आफू बस्ने कोठामा आएर फकाएर एकछिन काम छ भनेर बाहिर बोलाइ अन्ततः तीनजनाले पालैपालो बलात्कार गरेको उजुरीमा उल्लेख छ । हाल बालिकालाई थप उपचारका लागि सुर्खेत पठाइएको छ । उनको स्वास्थ्य अवस्था सामान्य रहेको जनाइएको छ ।
त्यसअघि गत २५ पुसमा उदयपुरमा २० वर्षीया किशोरीलाई तीनजना युवकले बलात्कार गरेको घटना सार्वजनिक भएको थियो । ती तीनैजना पक्राउ परिसकेका छन् । जिल्ला प्रहरी कार्यालय उदयपुरका अनुसार पक्राउ पर्नेमा चौदण्डीगढी नगरपालिका ८ हिलेखोला बस्ने ३० वर्षीय गणेश राई, २७ वर्षीय उमेश मगर र २७ वर्षीय खड्ग मगर रहेका छन् । उनीहरूले ती किशोरीलाई ललाइफकाई सोही ठाउँस्थित जंगलमा लगेर बलात्कार गरेको भन्ने उजुरीको आधारमा इलाका प्रहरी कार्यालय बेल्टारबाट खटिएको प्रहरीले उनीहरुलाई पक्राउ गरेको हो ।
नेपाल प्रहरीका प्रवक्ता कुबेर कडायतका अनुसार सामूहिक बलात्कारका घटनामा अधिकांश चिनेजानेकाहरु संलग्न हुन्छन् । ‘घटनाहरुको अनुसन्धान गर्दा सामूहिक बलात्कारमा चिनेजानेकाहरु हुन्छन् । आफन्त, घरपरिवारका सदस्य हुँदैनन् । केही घटनामा नचिनेका मान्छे पनि देखिएका छन्,’ उनले प्रभावसँग भने ।प्रहरीको तथ्यांकले हरेक दिन बलात्कार घटनामा कम्तीमा पाँचजना आरोपी पक्राउ पर्छन् । पछिल्ला पाँच वर्षमा १० हजारभन्दा बढी बलात्कारकै आरोपमा पक्राउ परेको प्रहरीको तथ्यांक छ । बलात्कृत हुनेमा नाबालिकादेखि वृद्धासम्म छन् । बलात्कार आरोपमा चालु आर्थिक वर्ष २०८०÷८१ को हालसम्म एक हजार ८०० भन्दा बढीमाथि मुद्दा चलाइएको छ । एक हजार ८५३ जना बलात्कारको आरोपमा पक्राउ परिसकेका छन् ।
तीन महिनासम्म बलात्कार !
सुर्खेतकी एक बालिकालाई जरुरी काम छ भनेर बोलाई उनलाई २८ वर्षीय नगेन्द्रबहादुर रावलले तीन महिनासम्म बलात्कार गरेको घटना आरोपमा एउटा मुद्दा जिल्ला अदालत सुर्खेतमा मंगलबार दायर भएको छ । जिल्ला सरकारी वकिल कार्यालय सुर्खेतले दायर गरेको मुद्दामा ती युवकले मोटरसाइकलमा लगेर डरत्रास देखाएर बलात्कार गरेको बालिकाको बयान छ ।
तर, आरोपी रावलले भने ती बालिका र आफूबीच प्रेम सम्बन्ध रहँदा आपसी सहमतिमा यौनसम्बन्ध राखेको बताएका छन् । उनले बलात्कार गरेको भने बयानमा अस्वीकार गरेका छन् । सहमतिमै तीन दिन यौनसम्बन्ध राखेको दाबी गरेका छन् ।
जिल्ला सहायक न्यायाधिवक्ता मीराकुमारी गौतमले भने बलात्कार घटनामा रावललाई १० देखि १२ वर्षसम्मको कैद सजायसहितको मागदाबी गरेकी छन् । रावललाई पाँच लाख रुपैयाँ जरिवाना गराएर उक्त रकम पीडितलाई दिलाउन पनि माग गरेकी छन् ।
