कार्यकर्ताको ताली बटुल्न ओलीले के सम्म गरेनन्, डडेल्धुरा पुगेर कांग्रेस सभापति शेरबहादुर देउवालाई ‘जय नेपाल’ भन्न भ्याए त यात्राकै क्रममा भेँडाको ऊनी स्वेटर बुन्नेदेखि किन्ने काम गरे । यतिमात्र हैन, सिन्धुपाल्चोक पुगेर ओलीले डम्फु र ढ्याङ्ग्रो बजाउनसमेत भ्याएका उनले दोलालघाट पुगेर माछा तार्न ।
काठमाडौं– नेपाली राजनीतिमा विपक्षीविरुद्ध हाँस्यपरक शैलीमा चर्को आलोचना गर्न माहिर राजनीतिज्ञ मानिन्छन्, एमाले अध्यक्ष केपी शर्मा ओली । पूर्वप्रधानमन्त्रीसमेत रहेका उनी केही दिनयता लगातार सरकारविरुद्ध चर्का अभिव्यक्ति दिँदै हिँडिरहेका छन् । कहिलेकाहीँ भने उनी देशको अन्तिम राजा ज्ञानेन्द्र शाह त कहिले विवादित मेडिकल व्यवसायी दुर्गा प्रसाईंविरुद्ध खनिन्छन् ।
१४ मंसिरमा सुरु ‘झुलाघाट–चिवाभञ्ज्याङ’ संकल्प यात्राको खास उद्देश्य मध्यपहाडी लोकमार्ग क्षेत्रमा ‘समृद्धिको आधार पहिचान गर्ने’ भन्ने हो । एक वर्षअघि भारतीय कंग्रेसले शुरु गरेको भारत जोडो यात्राको झल्को दिने गरी ओली आफैंले संकल्प यात्राको उद्घाटन झुलाघाटमा गर्दै भनेका थिए, ‘देशको समग्र विकासको खाका कोर्न यात्राले सहयोग पुग्ने छ ।’
तर, देश समृद्धिको संकल्पभन्दा पनि सरकार र अन्य विरोधी समूहविरुद्ध गाली बर्साउने ओली संकल्पभन्दा फरक नपर्ने देखिएको छ । उनी नेतृत्वको एमालेको संकल्प यात्रा विपक्षीहरूलाई हियाउन मात्रै रहेको चर्चा पनि हुन थालेको छ ।
हुन पनि उनले संकल्प यात्राको उद्घाटन गरेकै दिन अन्तिम राजा शाह र प्रसाईंलाई हियाए ।
‘उहिले राजतन्त्र थियो । अहिले सालिक बनाएर श्री ५ महाराजाधिराज लेखेर तमासा गर्ने असंवैधानिक काम भइरहेको छ’, आफ्नै गृहजिल्ला झापामा यही मंसिरको दोस्रो साता पृथ्वीनारायण शाहको शालिकमा राखिएको शिलालेखमा लेखिएको व्यहोराबारे असन्तुष्टि पोख्दै ओलीले भने ।
यात्राको क्रममा १७ मंसिरमा दैलेख पुगेर उनले फेरि राजसंस्था र हिन्दुधर्मको पक्षमा रहेका शाह र प्रसाईंलगायतविरुद्ध अभिव्यक्ति दिए । उनीहरूलाई देशद्रोहीसमेत भन्न भ्याए । उनका अनुसार लोकतन्त्र पञ्चायती व्यवस्थाभन्दा ठीक हुनै सक्दैन ।
‘कोही प्रतिगमनतिर फर्किने कुरा गर्दैछ भने त्यो देशद्रोही हो, त्यो लोकतन्त्रविरोधी हो । त्यो जनतालाई सधैं गरिब राख्न खोज्ने कुरा हो’, ओलीले आक्रोशति हुँदै भने, ‘आज लोकतान्त्रिक गणतन्त्रको कसैले विरोध गर्छ भने त्यो नेपाल र नेपालीको हितविपरीत सोचिरहेको छ ।’
१७ मंसिरमा सुर्खेत पुगेका ओलीले त्यहाँ पनि गाली गर्न भ्याए । उनकै गृह प्रदेश कोशीमा १० महिनादेखि पहिचानवादीहरू आन्दोलित रहेको तर्फ लक्षित गर्दै ओलीले देशमा विखण्डनको बीउ रोपेको आक्षेप लगाए । आन्दोलनरत पक्षको माग प्रदेशको नाम कोशी खारेजी गरेर पहिचानको आधारमा राख्नुपर्ने भन्ने छ । उनीहरू ओलीलगायत नेताहरूविरुद्ध आक्रोशित छन् । उनै पहिचानवादीहरूलाई ओलीले सत्ता गठबन्धनबाट परिचालित रहेको आक्षेप लगाए ।
‘देश विखण्डन गर्न खोजिँदैछ । विखण्डको बीउ रोपिएको छ र देशको सामाजिक अवस्था पनि निकै डरलाग्दो भएर अघि बढ्दैछ । तर, सरकार कानमा तेल हालेर बसेको छ । यो अवस्था गठबन्धन सरकारले नै ल्याएको हो ।’
सोही दिन ओलीले अछाम पुगेर सरकारविरुद्ध आक्रोश ओकले । हत्याराहरू सरकारमा रहेको टिप्पणीसमेत गरे ।
गत निर्वाचनमा अछाममा एमालेनिकट युवक विनोद शाहीको हत्या भएको प्रसंग कोट्याउँदै ओलीले यसो भनेका हुन् । उनले भने, ‘एउटा मान्छे मारेर चुनाव जित्ने संस्कृति भनेको घिनलाग्दो हो । म विनोद शाहीलाई शहीद घोषणा गर्दछु । अहिले चुनाव जित्न मान्छे मार्नेहरू सरकारमा छन् ।’ सरकारविरुद्धको ओलीको गालीमा कार्यकर्ताबाट बेजोड ताली पाउँछन् ।
कार्यकर्ताको ताली बटुल्न ओलीले के सम्म गरेनन्, डडेल्धुरा पुगेर कांग्रेस सभापति शेरबहादुर देउवालाई ‘जय नेपाल’ भन्न भ्याए त यात्राकै क्रममा भेँडाको ऊनी स्वेटर बुन्नेदेखि किन्ने काम गरे । यतिमात्र हैन, सिन्धुपाल्चोक पुगेर ओलीले डम्फु र ढ्याङ्ग्रो बजाउनसमेत भ्याएका उनले दोलालघाट पुगेर माछा तार्न ।
संकल्प अभियानअन्तर्गत ओली र अन्य नेताहरू आज उदयपुरको घुर्मी पुग्दैछन् । यो कोशी प्रदेशमा पर्छ । ओली नेतृत्वको अभियानलाई त्यहाँ पहिचानवादीहरूले प्रतिरोध गर्ने चेतावनी दिइरहेका छन् । एक जना पहिचानवादी नेता गोपाल किरातीले त घुर्मीमा चिहान खनिएको जस्ता हिंसात्मक अभिव्यक्ति दिइसकेका छन् ।
यस्तो बेला ओलीले पहिचानवादीहरूलाई लक्षित गर्दै कोशी कसैको बिर्ता नभएको बताए ।
‘कसैको बिर्ता होइन कुनै भूभाग नेपालको । प्रवेश गर्न दिन्न, तोडफोड गर्छु, आक्रमण गर्छु, मारपिट गर्छु भन्नेखालका आतंककारी कुराहरू हामीले धेरै देखेका छौँ’, रिसाउँदै ओलीले भने, ‘यस्तो फुर्ती नलगाए हुन्छ । हामीले सामना गर्न नपरोस् ।’
संकल्प अभियानका क्रममा ओली जहाँ जहाँ पुगे, उनी त्यहाँ विरोधीहरूको उछितो काडिरहेका छन् । जसले गर्दा मध्यपहाडी लोकमार्ग क्षेत्रको समृद्धिको संकल्प छायाँमा परेको छ । जबकि, यसबेला देशको अर्थतन्त्र संकटग्रस्त नै छ । अर्कातिर, भूकम्प प्रभावित जाजरकोट र रुकुमपूर्वका स्थानीय १५ जना वृद्धवद्धाले चिसोकै कारण मृत्युवरण गरिसके । बाँचेकाहरू त्रिपालमुनि बसेर जाडो छल्दै छन् । यस्तो परिस्थितिमा एमाले भने सरकार, पहिचानवादी, दुर्गा प्रसाईंको समूह र देशका अन्तिम राजा ज्ञानेन्द्रविरुद्ध अभिव्यक्तिमार्फत् होच्याइरहेका छन् । प्रचण्ड नेतृत्वको वर्तमान सरकारबारे ओली भन्छन्, ‘सरकार गरैजिम्मेवार भएर इमान नभएर बसेको छ । नत्र राजीनामा दिएर हिँड्नुपर्ने हो । यो सरकारमा बसिरहन लाज नलागेर कसरी बसेको छ ? अचम्म लागेको छ ।’
ओलीले वर्तमान सरकारले छिमेकसँगको सम्बन्ध पनि बिगारेको आरोप लगाएका छन् । अहिलेको सरकारले चीनको सहयोग लिन डराएको ओलीको अर्को आरोप छ ।
