- नौ किलो सुनकाण्डमा पूर्वसभामुख कृष्णबहादुर महराका छोरा राहुल पक्राउ
- ६० किलोभन्दा बढी सुनकाण्डका मुख्य योजनाकार दावा छिरिङका सहयोगी किशोर बस्नेत दिल्लीबाट र विमानस्थल भन्सारका अधिकृत गणेश पौडेल पक्राउ
- सुनकाण्डमा पक्राउ पर्नेको संख्या २६ पुग्यो
काठमाडौं– बहुचर्चित सुनकाण्डमा प्रधानमन्त्री पुष्पकमल दाहाल नेतृत्वको दल नेकपा माओवादी केन्द्रका नेताहरूलाई केन्द्रीय अनुसन्धान ब्युरो (सिआइबी)ले अनुसन्धानको दायरामा तान्न थालेको छ । प्रधानमन्त्री दाहालले आफ्ना दलका नेताहरूलाई ‘मुछिनुभयो भने तपाईंहरू पनि जेल जान तयार हुनुस्’ भनेको र सरकारी वकिल कार्यालय काठमाडौंले निर्देशन दिएको केही दिनपछि नै माओवादी उपाध्यक्ष कृष्णबहादुर महराका छोरा राहुल बुधबार पक्राउ परेका छन् ।
भेप (विद्युतीय चुरोट)मा राखेर ल्याइएको तस्करीको नौ किलो सुन प्रकरणमा राहुलको संलग्नता देखिएको सिआइबीको प्रतिवेदनमा उल्लेख छ ।
प्रतिवेदनमा राहुलको संलग्नता उल्लेख भए पनि उनलाई यसअघि पक्राउ गरिएको थिएन । सामान्य सोधपुछका लागिसमेत नियन्त्रणमा लिइएको थिएन । उनलाई सरकारको दबाबमा जोगाइएको भन्दै सिआइबीको आलोचनासमेत भएको थियो । प्रधानमन्त्री दाहाल पनि आलोचित थिए । जो भ्रष्टाचार, तस्करी, ठगीजस्ता आपराधिक गतिविधिको विरुद्धमा सुशासन अभियानको नेतृत्व गरिरहेका छन् ।
तर, उनलाई नै गिज्याउने गरी सुनकाण्डमा संलग्नता खुल्दासमेत महरालाई पक्राउ गरिएको थिएन । विपक्षी दलका सांसदहरूले ‘आफ्नालाई जोगाएको, अरुलाई फसाएको’ भन्दै टिप्पणी गरेका थिए । यहीबीच सरकारी वकिल कार्यालयको निर्देशनले दबाबमा परेको सिआइबीले राहुललाई पक्राउ गरेको हो ।
उनलाई हिरासतमा राखेर थप अनुसन्धान गर्न सिआइबीले जिल्ला अदालत काठमाडौंबाट पाँच दिनको अनुमति बुधबार नै पाएको सिआइबी प्रवक्ता नवराज अधिकारीले जानकारी दिएका छन् । ‘अदालतले हिरासतमा राखेर अनुसन्धान गर्न हामीलाई पाँच दिनको म्याद थप गरेको छ । यस अवधिमा अनुसन्धान सक्ने प्रयास हुन्छ,’ उनले प्रभावसँग भने, ‘नसकिए फेरि म्याद थपको अनुमति माग्छौं ।’
पक्राउ परेपछि राहुलले भने आफूमाथि हिलो छ्याप्ने प्रयास भएको तर पनि सिआइबीलाई अनुसन्धानमा सहयोग गर्ने प्रतिक्रिया दिएका छन् ।
पूर्वसभामुखसमेत रहेका उनका बुबा कृष्णबहादुर भने पक्राउ परेका छैनन् । भन्न त उनले सुनकाण्डमा कुनै संलग्नता नरहेको दाबी गर्दै आएका छन् । सार्वजनिक भइसकेका अडियोहरूले भने उनको दाबी खण्डित गर्छन् । नौ किलो सुनकाण्डमा कतै न कतैबाट संलग्नता रहेको देखाउने प्रमाणहरू रहेको यही ५ भदौमा सरकारी वकिल कार्यालयमा सिआइबीले बुझाएको अनुसन्धान प्रतिवेदनमा उल्लेख छ ।
प्रतिवेदनमा महरा बाबुछोराको चिनियाँ सुन तस्कर दावा छिरिङसँग ‘घनिष्ठ सम्बन्ध’ देखिएको र पटक–पटक टेलिफोन संवाद नै भएको विवरण पनि सार्वजनिक भइसकेका छन् । राहुलले सर्वाधिक सुन तस्कर चिनियाँ मुलका बेल्जियन नागरिक दाओजिन वाङ, तस्कर समूहकै एक जना सदस्य लोकेन्द्र पौडेल, विमानस्थल भन्सारका अधिकृत मुक्तिप्रसाद श्रेष्ठसँग टेलिफोन संवाद गरेको देखिएको थियो । यता राहुलका बुबा कृष्णबहादुरसँग वाङ र लुईले पटक–पटक कल गरेको रेकर्ड सार्वजनिक भइसकेको छ । यसअघि बाबुछोरा नै जोगिएका थिए । बुधबार भने छोरा राहुल सिआइबीको नियन्त्रणमा परे । सिआइबी स्रोतका अनुसार कृष्णबहादुर महरालाई पनि चाँडै नियन्त्रणमा लिइने छ ।
सभामुख भएकै बेला संसद् सचिवालयमा कार्यरत एक जना महिलालाई यौन दुव्र्यबहार गरेको घटनामा उनी पक्राउ परिसकेका छन् । तर, उनले उक्त मुद्दामा सफाई पाए । अहिले भने उनी सुनकाण्डले अप्ठेरोमा छन् ।
सुनकाण्डकै तस्करसँग प्रधानमन्त्री दाहालको दल माओवादीकै एक जना उपमहासचिव वर्षमान पुनको पनि सम्बन्ध घनिष्ट रहेको देखिएको छ । तर, वर्षमानले सुनकाण्डमा आफ्नो संलग्नता नभएको यसअघि स्पष्टीकरण दिइसकेका छन् ।
त्रासमा भन्सार कर्मचारी
अख्तियार दुरुपयोग अनुसन्धान आयोगले ६० किलो बढी सुनकाण्डको अनुसन्धान गर्ने भएपछि त्रिभुवन विमानस्थल भन्सार कार्यालयका कर्मचारीहरूले सामूहिक सरुवा मागेका छन् । १३७ जना कर्मचारीले भन्सार विभागका महानिर्देशकलाई पत्र लेख्दै बुधबार सामूहिक सरुवा मागेका हुन् ।
सरुवा माग्नेमा भन्सार अधिकृतदेखि कार्र्यालय सहयोगीसम्म छन् । छानबिनको बहानामा दुःख पाएको उनीहरूको दाबी छ । विभागका प्रवक्ता पुण्यविक्रम खड्काले यसअघि छुट्टाछुट्टै रुपमा सरुवाको माग हुने गरेकोमा बुधबार भने एकामुष्ट सरुवाको माग भएको बताएका छन् । यसबारे के गर्ने भन्ने निर्णय लिन बाँकी रहेको उनको भनाइ छ ।
दावाका मुख्य सहयोगी पक्राउ
काठमाडौं (प्रस)– ६० किलो बढी सुनकाण्डका मुख्य योजनाकार र तस्कर भनेर किटान गरिएका बेल्जियन नागरिक दावा छिरिङका मुख्य सहयोगी किशोर बस्नेत पक्राउ परेका छन् । उनलाई सिआइबीको टोलीले भारतको दिल्लीमा पक्राउ गरेको हो ।
अनुसन्धानमा संलग्न अधिकारीहरूको दाबीअनुसार बस्नेतले दावाको निर्देशनमा हङकङबाट सुन जडित सामग्रीहरू मगाउने गर्थे । अब उनको पक्राउपछि सुनकाण्डसँग जोडिएका थप विवरण सार्वजनिक हुने नेपाल प्रहरीका केन्द्रीय प्रवक्ता कुबेर कडायतको अपेक्षा छ ।
‘हाम्रो सिआइबी टोलीले सुनकाण्डमा मुछिएका किशोर बस्नेतलाई नियन्त्रणमा लिएको छ,’ उनले भने, ‘मलाई लाग्छ कि उनीबाट सुनकाण्डबारे थप विवरण खुल्नेछ ।’
उनीभन्दा अघि बुधबार नै सिआइबी टोलीले सुनकाण्डमै मुछिएका गणेश पौडेललाई नियन्त्रणमा लिएको थियो । उनी विमानस्थल भन्सारका कर्मचारी हुन् ।
