नेपालगञ्ज-
आउँदै गरेका महान चाडपर्बहरुमा सामाजिक सद्भाव कायम गर्न बाँकेको राप्तीपारी नरैनापुरका सरोकारवालाहरु सहमत भएका छन् ।
युएनडिपिको सहयोगमा बास नेपालगञ्जले राप्तीपारी क्षेत्रमा सञ्चालन गरिरहेको सामाजिक सद्भाव तथा सामुदायिक सुरक्षा सवलिकरण परियोजना अन्र्तगत असोज ४ गते सम्पन्न सदभावका लागि प्रहरी र नागरिक बिचको अन्तरसम्बाद कार्यक्रममा उपस्थित सरोकारवालाहरु उक्त कुरामा सहमत भएका हुन् ।
कार्यक्रमका प्रमुख अतिथी संघिय प्रहरी ईकाई कार्यालयका प्रमुख बरिष्ठ प्रहरी उपरिक्षक महेश बिक्रम शाहले आउँदै गरेका चाडपर्बहरु उल्लासका साथ मनाउन आग्रह गर्दै भने– चाडपर्बहरु बिथाल्ने तत्वहरुका बिरुद्ध सबै मिलेर लागौं । उनले समाजमा केही सिमित व्यक्तिहरुले सामाजिक सद्भाव भड्काउने गरेको उल्लेख गर्दै त्यस्ता तत्वहरुलाई परास्त गर्न प्रहरी र नागरिक बिचको सहकार्य हुनुपर्ने
बताए । सबै भन्दा पहिले आम नागरिक नेपाली भएको उल्लेख गर्दै सबै मिलेर एकअर्काको अस्तित्व स्विकार्न उनले सबैलाई आग्रह गरे । सदियौं देखि मिलेर बसिरहेको समाजलाई भताभुंग पार्ने तत्व बिरुद्ध प्रहरी सतर्क भएको बताए ।
कार्यक्रमका अतिथी नरैनापुर गाउँपालिकाका अध्यक्ष ईस्तियाक अहमद साहले बिगतका कुराहरु भुलेर कुनै पनि घटना हुन नदिन आम नागरिकहरुलाई आग्रह गरे । जातियता र धार्मिकतालाई भन्दा मानबतालाई बुझि सबै सचेत हुन आग्रह उनले गरे । आउनेपर्बहरुमा घटना घटाउने कोही, कसैलाई नछाड्ने उनले बताए ।
ईस्लाम धर्मका मौलाना याकुव खाँले सबै धर्मावलम्विहरुले आआफ्ना चाडपर्बहरुमा सबैलाई बोलाई धार्मिक सहिष्णुता कायम गर्नुपर्ने
बताए । मानबताको भावनाले सबै सामाजिक सद्भावका लागि लाग्नु पर्ने उनले बताए । शान्ति र सद्भावलेनैं समाजलाई समृद्ध बनाउँछ–मौलानाले भने ।
स्थानीय हाजि मुजिमुद्धिन खाँले सामाजिक सद्भावका लागि नेतृत्वपंति जिम्मेवार भएर लाग्नुपर्ने बताए । महेन्द्र मा.बि. मटेहियाका प्राचार्य पेशकार सिंहले सदभावका लागि काँधमा काँध मिलाई अघि बढ्न सबैलाई आग्रह गरे ।
बासका परियोजना संयोजक शम्भु शाही र मटेहिया उपशाखाका अध्यक्ष मकबुल अहमद मुकेरीले सहजिकरण गरेको कार्यक्रममा बासका कार्यकारी निर्देशक नमस्कार शाहले स्वागत तथा कार्यक्रमको उद्धेश्य माथि प्रकाश पारेका थिए । कार्यक्रममा २०० बढिको सहभागिता रहेको थियो । परियोजना अन्र्तगत बासले राप्तीपारीका ८ वटा साविकका गाविसहरुमा सामाजिक सदभाव कायम राख्न प्रहरी र नागरिक बिच अन्तरसम्बाद कार्यक्रम सञ्चालन गरिरहेको छ ।
यसैगरि बासले आजै नरैनापुर गाउँपालिकाको मटेहियाका बाढीप्रभावितहरुलाई राहत स्वरुप झुल, चाउचाउ, लत्ता कपडा र भाँडाबर्तन बितरण गरेको छ ।
२७५ जना बाढी पीडितहरुलाई उक्त राहत सामाग्रि बितरण गरिएको हो । प्रभाबितहरुलाई संघिय प्रहरी ईकाई कार्यालयका प्रमुख बरिष्ठ प्रहरी उपरिक्षक महेश बिक्रम शाह र मटेहियाका वडाध्यक्ष कृष्णचन्द्र मौर्यले राहत सामाग्रि हस्तान्तरण गरेका थिए । कार्यक्रममा बासका अध्यक्ष मन भण्डारी, कार्यकारी निर्देशक नमस्कार शाह लगाएतको सहभागिता रहेको
थियो ।
