काठमाडौं - श्रम, रोजगार तथा सामाजिक सुरक्षामन्त्री शरतसिंह भण्डारीले वैदेशिक रोजगारीबाट फर्किएर नेपालमै उद्यम तथा रोजगारी सिर्जना गर्ने उद्यमीहरु ‘रोल मोडल’ भएको बताएका छन् । उनले वैदेशिक रोजगारीबाट फर्केर नेपालमा उद्यम गरिरहेका उद्यमीलाई शुक्रबार मन्त्रालयमा राष्ट्रिय सम्मान पुरस्कार वितरण गर्ने क्रममा उक्त कुरा बताएका हुन् ।
मन्त्री भण्डारीले विदेशबाट फर्किएका नेपालीले उद्योग तथा आन्तरिक रोजगारी सिर्जना गर्नु देशकै लागि प्रेरणाको स्रोत भएको बताए । ‘वैदेशिक रोजगारी अहिलेलाई बाध्यात्मकजस्तै भए पनि यसले नेपालमा सीप, पुँजी र अनुभव भित्र्याउन सफल भएको छ,’ उनले भने, ‘वैदेशिक रोजगार रोकेर रोकिने कुरा होइन, यसले हामीलाई स्वदेशमा नै उद्यमशीलता प्रवद्र्धन गर्न सहयोग पु¥याउँछ, सम्मानित हुनेहरु साँच्चिकै रोल मोडल हुनुहुन्छ ।’
वैदेशिक रोजगारीबाट फर्किएर उद्यम गरिरहेकाहरुबाट स्वदेशमा नै केही गर्न सकिन्छ भन्ने सन्देश पुरस्कृत उद्यमीहरुले दिएको मन्त्री भण्डारीले बताए ।
सरकारले विदेशबाट फर्किएकाहरुलाई उद्यमशीलता प्रवद्र्धन र समाजमा पुनःस्थापित गराउन पुनःएकीकरण कार्यक्रम सञ्चालनमा ल्याएको उनको भनाइ छ । ‘सबै स्थानीय तहका रोजगार सेवा केन्द्रबाट वैदेशिक रोजगारीमा जानेहरुलाई सेवा आरम्भ गरिसकेका छौं,’ मन्त्री भण्डारीले भने, ‘सेवा केन्द्रबाट वैदेशिक रोजगारीमा मात्र नभई स्वदेशमा हुने आन्तरिक रोजगारीका लागि पनि समन्वय हुन्छ र सोही सेवा केन्द्रमार्फत नै विभिन्न स्थानीय तहमा अहिले पुनःएकीकरण कार्यक्रम सञ्चालन भइरहेको छ ।’
उनले सरकार र राजनीतिको मात्र नभई यसरी वैदेशिक रोजगारीबाट फर्किएर स्वदेशमा नै उद्यम र रोजगारी सिर्जना गरिरहेका नेपालीहरुको सफतालाई पनि उजागर गर्न सञ्चारकर्मीसँग आग्रह गरे ।श्रमसचिव एकनारायण अर्यालले वैदेशिक रोजगारीबाट फर्किएर स्वदेशमा उद्यम तथा रोजगारी सिर्जना गर्नेहरुलाई प्रोत्साहन गर्ने नीति लिइएको बताए । पुरस्कृत तथा सम्मानित हुने सबै उद्यमी आ–आफ्नो क्षेत्रमा सफल देखिएको भन्दै उनीहरुको सहजीकरणका लागि सरकारले सदैव सहयोगी भूमिका निर्वाह गर्ने बताए ।
श्रम मन्त्रालय भन्नेबित्तिकै रोजगारी दिने मन्त्रालय हो भन्ने बुझ्ने आमबुझाइ रहेको भन्दै सचिव अर्यालले श्रम मन्त्रालयको भूमिका भनेको रोजगारी दिने नभई रोजगारीका लागि समन्वय गरिदिने भएको बताए । विदेशबाट फर्किएर उद्यम गरिरहेका युवाहरुलाई उनले बधाई तथा शुभकामना दिँदै उनीहरुलाई ब्राण्ड एम्बेस्डरको रुपमा सरकारले प्रस्तुत गर्ने बताए ।
शुक्रबार मन्त्रालयले एक कार्यक्रम आयोजना गरी वैदेशिक रोजगारबाट फर्केर स्वदेशमै व्यवसाय गर्दै आएका युवा उद्यमीहरुलाई पुरस्कृत गरेको हो । चालु आर्थिक वर्ष २०७९÷८० को उत्कृष्ट उद्यमी राष्ट्रिय पुरस्कारबाट बारा निजगढका सरोज कोइराला सम्मानित भए । उनले एक लाख ५० हजार नगद राशिको उक्त पुरस्कार हात पारेका हुन् । वैदेशिक रोजगारीका क्रममा लामो समय युएई बसेर फर्केका उनले सन् २००९ बाट निजगढमा कुशल व्यवसाय परामर्श तथा तालिम केन्द्र सञ्चालन गर्दै आएका छन् ।
यस्तै अन्य छ जनाले ७५ हजार राशिको उद्यमी राष्ट्रिय पुरस्कार पाए । साथै, तीन जनाले संयुक्तरुपमा ७५ हजार राशिकै पुरस्कार प्राप्त गरे । यसरी सम्मानित हुनेमा म्याग्दीको एकता एग्रो रिसर्च एण्ड रिसोर्ट सञ्चालक महेन्द्र बानियाँ, रुपन्देहीको छिन्गु मल्टी पर्पोज कम्पनीका सञ्चालक सुवर्ण पोखरेल र महोत्तरीको एमएस कृषि तथा पशुपालन फर्मका सञ्चालक मनोज राई रहेका छन् ।
यस्तै भक्तपुरको रसिलो एग्रिकल्चर नेपाल प्रालिका सञ्चालक त्रय मनोज ढकाल, नीलराज फुयाल र जितेन्द्र बानियाँ, सुनसरीको किराँत एग्रिकल्चर एण्ड लाइभ स्टक फार्मका सञ्चालक नवीनकुमार राई, नवलपरासीको कन्सुलर एक्सन प्लान अफ रेस्पोन्सिबल डेभलपमेन्ट सोसाइटी (कार्ट्स)का सञ्चालक मोहनबहादुर कार्की र कञ्चनपुरको वेदकोट बेस्लरी उद्योगका सञ्चालक धनबहादुर धानुक उद्यमी राष्ट्रिय पुरस्कार सम्मानबाट सम्मानित भए । सम्मानित हुनेहरु मलेसिया, खाडी मुलुक र दक्षिण कोरियामा रोजगारी गरेर फर्किएकाहरु रहेको मन्त्रालयले जनाएको छ ।
सरकारले २०७६ सालदेखि पुरस्कार प्रदान गर्दै आएको छ । मन्त्रालयले यस बर्ष पुरस्कारका लागि ३५० भन्दा बढी उद्यमीले आवेदन दिए पनि मापदण्डमा परेकाहरुलाई पुरस्कृत गरिएको जनाएको छ । मापदण्डअनुसार पुरस्कारको लागि वैदेशिक रोजगारमा न्यूनतम एक वर्ष काम गरेको र नेपाल फर्किएर व्यवसाय सञ्चालन गरेको कम्तीमा एक वर्ष पूरा हुनुपर्नेछ ।
