नेपालगन्ज। भाद्र ६ गते । बाँकेको जानकी गाँउपालिकाले आफ्ना सबै वडा कार्यालयहरुमा दुई हप्ता भित्र सूचना अधिकारी र गुनासो सुन्ने अधिकारी तोकी सार्वजनिक गर्नेे प्रतिबद्धता गरेको छ ।
ट्रान्सपरेन्सी इन्टरनेशनल नेपालको सहयोगमा बास नेपालगन्जले भाद्र ६ गते जानकी गाँउपालिकामा गरेको समन्वय बैठकमा सो प्रतिबद्धता गरिएको हो । बैठकमा छलफल पश्चात गरिएका अन्य प्रतिबद्धताहरुमा गाँउपालिका तथा वडा कार्यालयहरुले प्रवाह गर्ने सेवा तथा सुविधाका बारेमा नागरिक वडापत्र तयार गर्ने, गाँउपालिकाले प्रवाह गर्ने सेवा तथा सुविधाको प्रभावकारिता मापन गर्न बर्षमा २ पटक सार्वजनिक सुनुवाई गर्ने, योजनाहरुको सार्वजनिक परिक्षण गर्ने, कार्यालयमा सेवाग्राहीहरुसँग सेवाग्राही मैत्री ब्यवहार गर्ने प्रतिबद्धता गरिएको छ ।
बैठकमा बोल्दै जानकी गाँउपालिकाका अध्यक्ष राम निवास यादवले सेवाग्राहीहरुले महशुस गर्ने गरि सेवा प्रवाह गर्न वडा अध्यक्ष र कर्मचारीहरुलाई अनुरोध गरे । कार्यालयमा आउने सेवाग्राहीहरुलाई सेवाग्राही मैत्री ब्यवहार गर्नु पर्नेमा उनको जोड थियो । आम नागरिकको अपेक्षा जनप्रतिनिधिहरुसँग धेरै भएको भन्दै पारदर्शि ढंगले काम गर्ने र गराउने उनले प्रतिबद्धता गरे । कार्यक्रममा बोल्दै गाँउपालिकाका कार्यकारी अधिकृत पित्री भत्त गिरीले गाँउपालिकाले सूचना अधिकारी र गुनासो सुन्ने अधिकारी तोकि काम गरिरहेको बताए । गाँउपालिकाको कामलाई प्रभावकारि बनाउन जवाफदेहिताका औजारहरुको प्रयोगमा कन्जुस्याई नगर्ने उनको भनाई थियो । यसैगरी वडा नं. ५ का वडा अध्यक्ष रमेस कुमार बर्माले सबै सुचना पारदर्शि गर्नुपर्नेमा जोड दिएका थिए । बैठकमा बोल्दै वडा नं. ६ का वडा सचिब नबराज शाहले सरकारी कर्मचारीलाई सेवाग्राहीहरुले हेर्ने दृष्टीकोण सकारात्मक नभएको भन्दै विधि र ऐन नियम भित्र रही स्वार्थ विना काम गर्नुपर्ने बिचार ब्यक्त गरे । सबैले नैतिकवान भई काम गरेमा सुशासन कायम शाहले बताए । बैठकका अर्का सहभागि किशोर थापाले सूचनाको हकलाई सुनिश्चित गर्न तर्फ सबै गम्भिर भएर लाग्नु पर्नेमा जोड दिए । गाँउपालिकाबाट सम्पादन हुने हरेक क्रियाकलापमा पारदर्शि र जवाफदेहि ढंगले काम सबैले प्रतिबद्धता गरे ।
बैठकमा छलफल पूर्व नेपालमा राष्ट्रिय सदाचार निर्माण परियोजना अन्तरगत भईरहेका क्रियाकलापको बारेमा जानकारी र गाँउपालिकाले सुशासन तथा पारदर्शिताका लागि गर्न सक्ने कामहरुका बारेमा बासका कार्यक्रम अधिकृत हेमराज भट्टले जानकारी गराएका थिए । बासका अध्यक्ष मन भण्डारीले सहजिकरण गरेको बैठकमा अध्यक्ष राम निवास यादव, उपाध्यक्ष भुमिसरा धिताल, कार्यकारी अधिकृत पित्री भक्त गिरी, वडा अध्यक्षहरु, सचिबहरु लगायत पदाधिकारीहरुको सहभागिता रहेका थियो ।
