काठमाडौं– छोराको उपचारका लागि शान्ति श्रेष्ठले दुई वर्षअघि प्रकाश सुनारसँग १० हजार सापटी लिएकी थिइन् । शान्तिको कोठा पोखरा–३३ बाघमारामा थियो । त्यहाँ प्रकाशको आउजाउ बाक्लै हुन्थ्यो । ३५ वर्षे प्रकाश फलफूल ढुवानी गर्ने सवारी चालक हुन् । प्रकाशकै भनाइमा उनीहरूबीच बेलामौकामा शारीरिक सम्बन्धसमेत हुन्थ्यो ।
उनको घर काभ्रेको पाँचखाल नगरपालिका–६ मयलपानी । तर, बसाइ भने पोखराकै घारीपाटनमा । ४६ वर्षीया एकल महिला शान्ति हरेक साँझ प्रकाशलाई फोन गर्थिन् । शान्ति र प्रकाशको फोन सम्पर्कले प्रकाशकी श्रीमती रिसले चुर भइसकेकी थिइन् । अन्ततः उनीहरूको सम्बन्ध बिग्रियो पनि ।
भन्न त प्रकाशले भनेका छन्, ‘मेरो श्रीमतीसँग सम्बन्ध बिग्रने भएकाले शान्ति श्रेष्ठलाई अब मलाई फोन नगर भनेको थिएँ ।’
पैसा दिने छाँट नगरेपछि प्रकाशको नजर शान्तिको सुनमा गयो । कानमा सुनका मुन्द्राहरू लगाएकी थिइन् शान्तिले । मुन्द्रा लिएरै पैसा असुल्ने सोच प्रकाशको भयो । ‘शान्तिले मबाट सापटी लिएको रकम फिर्ता नदिएकीले उनले कानमा सुनको मुन्द्राहरु लगाएकी हुँदा यसलाई धम्क्याएर सुनका गहना लिएर पैसा उठाउने सोच बनाएँ,’ प्रकाशले भनेका छन् । त्यही भएर गत २० फागुनमा प्रकाशले शान्तिलाई फोन गरे । उनीहरूको भेट पोखराको अमरसिंह चोकमा भयो । कुराकानीका क्रममा शान्तिले तनहुँको थर्पुमा एक जनाले पैसा दिने भनेकोले भोलिपल्टै थर्पु जाने सल्लाह भयो । नभन्दै २१ फागुनमा शान्तिलाई भेट्न प्रकाश अमरसिंह चोक पुगे । तर, त्यहाँ शान्ति आइपुगिनन् ।
नभेटिएपछि बा २ ख ५१२८ नम्बरको हायसका सहचालक कृष्ण थापा मगरको मोबाइल मागेर कल गरे । र, शान्ति केहीछिनमा सोही चोकमा आइपुगिन् ।
प्रहरी अनुसन्धान प्रतिवेदनका आधारमा जिल्ला सरकारी वकिल कार्यालय तनहुँले जिल्ला अदालत तनहुँमा गरेको अभियोजनअनुसार शान्ति भने तनहुँको थर्पु जान तयार थिइनन् । उनले भनेकी थिइन्, ‘आज अँध्यारो भयो । भोलि जाउँला ।’
प्रकाशले जाउँ भन्दै ढिपी गरे । कारण, यदि पैसा दिइनन् भने सुनका मुन्द्रा लुट्ने । प्रकाशको ढिपीले शान्ति थर्पु जान तयार भइन् । दुवै जना अमरसिंह चोकबाट गाढी चढे । तनहुँको मनहरिमा ओर्लिए । त्यसबेला शान्तिले भनिन्, ‘मैले पैसा लिन जानुपर्ने मान्छेको घर भुलें । मोबाइल नम्बर पनि थाहा छैन ।’
शान्तिले झुक्याएको महसुस भयो प्रकाशलाई । प्रकाशकै शब्दमा भन्दा त्यसपछि उनलाई शारीरिक सम्बन्ध राख्ने इच्छा भयो । मनहरिकै एउटा खाली गोठमा उनीहरूबीच सम्बन्ध भयो । उक्त घटनाक्रमबारे सरकारी वकिल कार्यालयले अदालतमा शुक्रबार बुझाएको प्रतिवेदनमा छ, ‘तिमीले मलाई पैसा दिने भइनौं । सुन डिक राखेर भए पनि पैसा दिए हुने ।’
शान्ति चित्त दुखाउँदै झर्किइन्, ‘तिमीले भनेको बेला मैले शारीरिक सम्बन्ध राख्न दिनुपर्ने । अनि, जाबो १० हजार रुपैयाँका लागि मेरो गहनामा आँखा लगाउँछौं ?’
रिसाएका प्रकाश शान्तिको फोन खोसेर गोठदेखि केही तलको पानी ट्यांकीतिर गए । त्यसबेला रातको करिब ८ः५० भएको थियो । शान्तिले झन् रिसाउँदै भनिन्, ‘मेरो फोन दे । नत्र तँलाई करणीको केस लगाइदिन्छु ।’
प्रकाश पनि के कम ! ‘मेरै पैसा लाने अनि मलाई नै करणीमा केस लगाउने ?’ आवेगमा आइहाले । नजिकै ट्यांकीको ढकनमा रहेको प्लास्टिकलाई थिचेको इँटा लिएर शान्तिको टाउकोमा ढ्याम्मै हाने । चार पटकको प्रहारपछि शान्ति रन्थनिँदै भुइँमा ढलिन् ।
घटनास्थलमै उनको मृत्यु भयो । शान्तिको कानमा रहेको सुनको एक जोर रिङ, सुनका पाँच जोर मुन्द्रा र ब्यागमा रहेको दुई हजार २०० रुपैयाँ झिके । त्यसपछि शवलाई पानीको ट्यांकीमा फालिदिए । यो घटना गत २१ फागुनको हो । घटनाको चार दिनपछि भने पहिले पनि कर्तव्य ज्यान मुद्दामा कारागारमा रहँदा चिनजान भएका पोखराकै रविकुमार गहतराजको दोकान गए । त्यहाँ ६० हजार रुपैयाँमा सुन बिक्री गरे । जेठानी दिदी मीनाकुमारी नेपालीलाई दिन बाँकी २० हजार रुपैयाँ फिर्ता गरे ।
जब पानी गन्हायो...
मनहरिमा दुई लाख २५ हजार क्षमताको खानेपानीको ट्यांकी छ । स्थानीय ऋषिनारायण कायस्थका अनुसार यही ट्यांकीमा जम्मा भएको पानी गाउँका १३८ घरपरिवारले खान्छन् ।
गत ९ चैततिरदेखि पानी अलिअलि गन्हायो । १० र ११ गते अझै गन्हायो । १२ गते गाउँलेहरू पानी ट्यांकी पुगे । ढकन खोलेर हेर्दा सडेगलेको अवस्थामा महिलाको शव फेला प¥यो । शवमा कीरा परेको देखियो । त्यसपछि गाउँलेले प्रहरीलाई जानकारी दिए ।प्रहरीले घटनाको अनुसन्धान थाल्यो । १३ चैतमा शान्तिका २० वर्षीय छोरा मनिषले प्रकाशविरुद्ध कर्तव्य ज्यान मुद्दामा किटानी जाहेरी दिए ।
सोही जाहेरीका आधारमा प्रकाश १५ चैतमा तनहुँको थप्रेकबाट पक्राउ परे । जिल्ला न्यायाधिवक्ता गोविन्द उपाध्यायले जिल्ला अदालत तनहुँमा प्रहरीको अनुसन्धान प्रतिवेदनका आधारमा गरेको अभियोजनमा प्रकाशले घटना आफैंले गरेको स्वीकारेका छन् । उनीविरुद्ध कर्तव्य ज्यान, लुटपाट र पानी दूषित गरेको अभियोगमा मुद्दा अदालतमा दर्ता भएको छ ।
