काठमाडौं– राजनीतिमार्फत गाउँको विकास र सामाजिक परिवर्तन गर्नुपर्छ भन्ने सोचका साथ राजनीतिमा होमिएका युवा हुन् रामसिंह तामाङ । वैशाख ३० मा सम्पन्न स्थानीय तह निर्वाचनमा उनी त्यही सोचलाई मुख्य एजेण्डा बनाएर प्रतिस्पर्धामा उत्रिए । र, रामसिंहको एजेण्डालाई साथ दिँदै धादिङको रुविभ्याली गाउँपालिकाका जनताले अध्यक्षमा निर्वाचित गराए ।
यसअघि २०७४ सालको स्थानीय चुनावमा पनि उनी रुविभ्याली गाउँपालिकाको अध्यक्ष पदमा उम्मेदवार बनेका थिए । तर, त्यसबेला उनले उपविजेतामै चित्त बुझाउनुपर्यो । उक्त पराजयपछि उनले आफ्ना कमजोर पक्ष पहिल्याउँदै त्यसलाई सुधार गरे, र पाँच वर्षपछि सफलता हासिल गरिछाडे ।
यसपटक रुविभ्यालीमा नेकपा माओवादी केन्द्र, नेपाली कांग्रेस र एकीकृत समाजवादी पार्टीबीच चुनावी तालमेल भएको थियो । गठबन्धनबाट अध्यक्षमा रामसिंह र उपाध्यक्षमा फेलामा तामाङ निर्वाचित भएका हुन् ।
वि.सं. २०३४ माघ ३ गते धादिङ जिल्लाको सेर्तुङ गाउँको साधारण परिवारमा उनी जन्मिएका थिए । तामाङ नेकपा माओवादी केन्द्र बागमती प्रदेश सदस्य, रुविभ्याली गाउँपालिकाका इञ्चार्ज तथा माओवादी केन्द्र जिल्ला समिति सदस्य छन् । राजनीतिसँगै उनी सामाजिक क्षेत्रमा पनि सक्रिय छन् । तामाङ स्थानीय शान्ति समितिमा सदस्य, नेपाल तामाङ घेदुङ धादिङका अध्यक्ष तथा गणेश हिमाल सामुदायिक अध्ययन केन्द्रका अध्यक्ष समेत हुन् ।
२०६२/६३ को जनआन्दोलनमार्फत् मुलुकमा आएको राजनीतिक परिवर्तनसँगै उनी तत्कालीन नेकपा माओवादी (हाल माओवादी केन्द्र) बाट राजनीतिमा सक्रिय भएका थिए । तामाङ बाल्यकालदेखि नै शालीन स्वाभावका थिए । केही नयाँ गर्नुपर्छ भन्ने अठोट लिएर अगाडि बढेका उनले छोटो समयमै यो राजनीतिक सफलता हात पारेका हुन् ।
उनी उत्तरी धादिङ रुविभ्याली मात्रै नभई समग्र धादिङको उत्पीडित जाति तथा समुदायको उत्थान, गरिबी, शिक्षा र भौतिक विकासको लागि जोड दिँदै सम्बन्धित निकायलाई दबाब दिन लागिपरेका युवा नेता हुन् ।
नवनिर्वाचित अध्यक्षतामाङ राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष बुद्धिमान तामाङका सहोदर भाञ्जा हुन् । उनलाई आफ्नो मामासँगको राजनीतिक विचारमा फरक मत राखेर अगाडि बढ्नु पक्कै सजिलो थिएन । तर, उनी आफ्नो विचार र समाज परिवर्तनका निम्ति कहिल्यै पछि नपरी अग्रसर भएर लागिरहे । र, जनतासामु आफ्ना विचार उद्देश्य प्रस्ट्याउँदै गाउँपालिका अध्यक्षमा निर्वाचित भएका छन् । यससँगै उनले रुविभ्यालीको परिवर्तनका लागि बनाएका योजना कार्यान्वयन गर्ने अवसर पाएका छन् । यो अवसर उनले आगामी पाँच वर्षमा कसरी सदुपयोग गर्छन् त्यो भने हेर्न बाँकी नै छ ।
नवनिर्वाचित अध्यक्ष तामाङले जनताबाट पाएको साथलाई सम्मान गर्दै गाउँपालिकाको विकास र सामाजिक रुपान्तरणको काममा कुनै सम्झौता नगर्ने प्रतिबद्धता जनाए । उनले आफू रुविभ्यालीका जनताको सेवक भएर काम गर्ने बताए ।
