नेपालगञ्ज/हरेक कुरामा व्यापार छ, हुँदा—हुँदा स्वास्थ्य जस्तो सम्बेदनशिल कुरामा पनि व्यापार भईरहेको छ । यस्तै स्वास्थ्यका नाममा व्यापार गर्ने एक गिरोह सोझा—सोझा नागरिकहरुलाई ठगेर फरार भएको छ ।
प्रसङ्ग धनगढीमा प्रधान कार्यालय भई बाँकेको खजुरामा सम्पर्क कार्यालय भएको कर्णाली स्वास्थ्य हेल्थ फाउण्डेसनको हो । जसले हेपाटाईटिस बि को निःशुल्क रगत परीक्षणका नाममा सर्बसाधारणलाई ठगेकोछ ।
जानकारी अनुसार, उक्त संस्था सो कार्यको अनुमति माग्न जिल्ला जनस्वास्थ्य कार्यालय बाँकेमा गएको थियो । जनस्वास्थ्यले संस्थाको बिश्वसनियता नदेखेपछी अनुमति दिएन, त्यसपछि उक्त संस्था चलाउनेहरु बाँकेको बैजनाथ गाउँपालिका पूगे । स्थानीयहरुको रगत परीक्षण निःशुल्क गरिदिने भनेपछि धेरै कुरा नबुझिकनै गाउँपालिकाले उक्त संस्थालाई अनुमति प्रदान गरिदियो । त्यहि अनुमति पत्रलाई भजाउँदै उक्त संस्थाले सबैको आँखामा छारो होल्दै ठगेर भागेकोछ ।
निःशुल्क रगत परीक्षण गर्ने भनेपछि सबैको भलाई हुने हेतुले अनुमति दिएको, पछि रगत परीक्षणका नाममा रकम उठाउन थालेको गुनासो आएपछि काममा रोक लगाएको गाउँपालिकाका प्रमुख प्रशासकिय अधिकृत बिरेन्द्र माझीले बताए ।
जेष्ठको पहिलो हप्ता तिर गाउँपालिकाबाट अनुमती लिएर उक्त संस्था बिभिन्न गाउँ छिरेको थियो । गाउँमा अवस्थित स्वास्थ्यचौकीमा त्यहि गाउँपालिकाको पत्र देखाउँदै रगत संकलनको कार्यमा उक्त संस्था लागेको थियो । जानकारी अनुसार, बैजनाथ गाउँपालिकाको टिटिहिरियाका स्वास्थ्य स्वयंसेबिकाहरुलाई आफ्नो साथमा लिई रगतको नमूना संकलन गरेको उक्त संस्थाले ५ जना परिवार भएको घरबाट १ सय ५० र त्यो भन्दा बढि परिवार सदस्य भएको घरबाट २ सय सम्म उठाएको थियो ।
२०९६ घरधुरी भएको टिटिहिरियामा उक्त संस्थाले स्वयंसेबिकाहरुलाई अघि लगाई २/३ वटा टोली परिचालन गरि १ हप्ता भित्र १५ सय बढि घरबाट रगतको नमूना संकलन गरेको थियो । दिनभर हिँडाएर स्वयंसेबिकाहरुलाई दैनिक सय रुपैयाँ दिएर श्रम शोषण गर्नुका साथै त्यहि रुपैयाँ पनि नदिएर काम गराउन थालेपछि स्वयंसेबिकाहरुले सो संस्था बिरुद्ध स्वास्थ्यचौकीमा गुनासो गरे ।
निःशुल्क भनि अनुमती लिएर सुशुल्क रगत परीक्षण गर्ने, रगत परीक्षणको रिपोर्ट नदिने र स्वयंसेबिकाहरुको दुरुपयोग गरेको भन्दै टिटिहिरिया स्वास्थ्यचौकीले काममा रोक लगाएको ईञ्चार्ज चन्द्र बहादुर खड्काले बताए ।
उक्त संस्थाले टिटिहिरिया मात्र होईन आसपासका नौबस्ता लगाएतका वडाहरुमा पनि सोही प्रकारको ठगि गरेको खुलेकोछ । नौवस्ता स्वास्थ्य प्रमुख मान बहादुर नेपालीका अनुसार, ४ सय बढि घरबाट उक्त संस्थाले टिटिहिरियाकै शैलीमा रगतको नमूना संकलन गरेकोछ ।
हचुवाका भरमा रगत परीक्षण गर्न थालेको जानकारी पश्चात उक्त संस्थाका प्रमुखलाई बोलाई आफूले संस्थाको दक्षता र बैद्यता माथि कुरा उठाई काम रोक्न भनेपछि उक्त संस्थाले काम रोकेको नेपालीले बताए । नौवस्ताका स्वयंसेविकाहरुले आफुहरुलाई संस्थाले ठगेको भन्दै उक्त संस्था बिरुद्ध प्रहरीमा उजुरी गरेका छन् ।
यसरी बिभिन्न ठाउँहरुमा संस्थाको नियत र बैद्यानिकता माथि प्रश्न उठाएपछि उक्त संस्थाका ठेकेदारहरु फरार भएका छन् । यस बारेमा संस्थाका सञ्चालक सुबाश कार्की सबै आरोपहरु गलत भएको बताउँछन् । सशुल्क भनेरै गाउँपालिकाबाट अनुमती लिएकाले यसमा ठगेको भन्न नमिल्ने उनले बताए ।
