म प्रतिपक्षको बोल्ने र माग राख्न पाउने अधिकारको सम्मान गर्छु तर माग राख्दा वा विरोध गर्दा आधारचाहिँ चाहिन्छ ।
केपी शर्मा ओली
प्रधानमन्त्री
काठमाडौं– गृहमन्त्री रमेश लेखक नेपाली युवायुवतीलाई भिजिट भिसामा पठाएर मानव तस्करी गर्ने कार्यमा संलग्न रहेको गम्भीर आरोप झेलिरहँदा प्रधानमन्त्री केपी शर्मा ओली नै उनको बचाउमा उत्रिएका छन् । उनले एक जना कर्मचारीबारे प्रश्न उठ्दैमा गृहमन्त्री लेखकको राजीनामा माग्नु अनुचित भएको बताए ।
उनका अनुसार गृहमन्त्रीको राजीनामा माग निराधार र पूरा हुन असम्भव पनि छ । विपक्षी दलहरूले विरोध गर्ने निहुँ नपाएर मात्रै राजीनामा मागेको ओलीले तर्क गरे ।जबकि, गत वर्षको १७ असारमा कांग्रेस–एमालेबीच भएको सातबुँदे सहमतिको पहिलो बुँदामै गठबन्धन सरकार गठन गर्नुको औचित्यबारे भनिएको थियो, ‘मुलुकमा सुशासन कायम गर्न ।’तर, सुशासन कायम गर्ने गृहमन्त्री लेखक नै मानव तस्करी प्रकरणमा मुछिँदा प्रधानमन्त्री ओली अस्वाभाविक बचाउमा उत्रिएका छन् । गृहमन्त्री लेखकको राजीनामा मागिएकोबारे असन्तुष्टि जनाउँदै उनले सरकारकै राजीनामा मागे पनि अस्वाभाविक मान्न नहुने बताए ।
‘म प्रतिपक्षको बोल्ने र माग राख्न पाउने अधिकारको सम्मान गर्छु तर माग राख्दा वा विरोध गर्दा आधारचाहिँ चाहिन्छ । गृह मन्त्रालयमातहत धेरै कर्मचारी छन् । एउटा कर्मचारीलाई अख्तियारले बोलायो । बयान लिएको सुनेको छैन । प्रतिपक्षलाई त यो सरकार नै मन परेको छैन, उसले माग बढाएर सरकारकै राजीनामा मागे पनि अस्वाभाविक मान्नु पर्दैन,’ शनिबार काठमाडौंमा आयोजित एक कार्यक्रममा ओलीले भने । ओलीले गृहमन्त्री लेखकमात्रै होइनन्, जगदुल्ला जलविद्युत् परियोजनामा ऊर्जामन्त्री दीपक खड्का मुछिँदा पनि बचाउ गरेका थिए । कोशी प्रदेशका तत्कालीन आन्तरिक मामिलामन्त्री लीलावल्लभ अधिकारी मानव तस्करी प्रकरणमा आरोपी हुँदा ओली बचाउमा उत्रिएका थिए ।
ओली आफूलाई सुशासनको पक्षधर सत्ता नेतृत्वको रूपमा चिनाउँछन् । उनी दोस्रोपटक प्रधानमन्त्री बन्दा एउटा चर्चित नारा सरकारी कार्यालयहरूमा देखिन्थ्यो– म भ्रष्टाचार गर्दिनँ, अरुलाई पनि भ्रष्टाचार गर्न दिन्नँ ।तर, नारा र व्यवहारमा उल्टो देखिएको छ । मानव तस्करीमा संलग्न भएको जस्तो गम्भीर आरोप लाग्दा पनि गृहमन्त्री लेखकलाई राजीनामा गराउन दबाब दिएका छैनन् । नेपाली कांग्रेसका सभापति शेरबहादुर देउवालाई गृहमन्त्री लेखकलाई फिर्ता बोलाउन भनेका छैनन्, जसले गर्दा लेखक मन्त्रीकै रूपमा बहाल छन् ।
माओवादी सांसद सुदन किरातीले भिजिट भिसाको नाममा मानव तस्करी गर्ने सरकारले विश्वसामु नेपालीको छवि धमिलो बनाएको टिप्पणी गरेका छन् । उनले गृहमन्त्री लेखकको राजीनामा जसरी पनि आउनुपर्ने मागलाई दोहो¥याए । ‘भिजिट भिसाको नाममा मानव तस्करी गर्ने सरकारले आज विश्वसामु नेपालीको छवि धमिलो बनाएको छ,’ किरातीले धनकुटाको छथर गाउँपालिका पुगेर शनिबार भने, ‘गृहमन्त्रीको राजीनामा र प्रधानमन्त्रीले संसद्मा उभिएर जवाफ नदिए हामी संसद्लाई लडाइँको मैदानमा परिणत गरिदिने छौं ।’
विपक्षी दलहरू नेकपा माओवादी केन्द्र र रास्वपाले संसद् बैठक चल्न नदिने चेतावनी दिइसकेका छन् । यी दुई दलले गृहमन्त्री लेखकको राजीनामा र भिजिट भिसा प्रकरणको छानबिनका लागि उच्चस्तरीय समिति गठनलाई ‘बटमलाइन’ बनाएका छन् । लेखकको संलग्नता खुल्नेगरी विवरणहरू यसअघि नै सार्वजनिक भइसकेका छन् । उनले आफू मुछिएको प्रकरणको अनुसन्धानलाई प्रभावित पार्ने गरी अध्यागमन कार्यालयका महानिर्देशक युवराज भट्टराई मात्रै होइन, अन्य कर्मचारीको सुटुक्क सरुवा गरेका थिए ।
उनले अनुसन्धानलाई प्रभावित पार्नेगरी अख्तियार दुरुपयोग अनुसन्धान आयोगमा कार्यरत प्रहरी नायव महानिरीक्षक (डिआइजी) हिमालय श्रेष्ठलाई त्यहाँबाट उपत्यका प्रहरी कार्यालय, रानीपोखरी सरुवा गरेका थिए । रानीपोखरीमा कार्यरत अर्का डिआइजी ध्रुवराज राउत अनिवार्य अवकाशमा गएको कारण देखाइ श्रेष्ठको सरुवा भएको थियो । प्रहरीले सार्वजनिक गरेको सूचनाअनुसार गत मंगलबार नै गृहमन्त्रीस्तरीय निर्णयबाट डिआइजी श्रेष्ठको सरुवा भएको थियो । तर, विरोध भएपछि श्रेष्ठको सरुवा रोकिएको छ । श्रेष्ठकै नेतृत्वमा अख्तियारले अहिले भिजिट भिसा प्रकरणबारे छानबिन गरिरहेको छ । यस्तोबेला गृहमन्त्री लेखकले उनको सरुवा गरेर अनुसन्धान प्रभावित पार्न खोजेको आरोप लागेको छ ।
सुस्त अनुसन्धान, हिरासतबाहिरै आरोपीहरू
गृहमन्त्री रमेश लेखकले राजीनामा नदिएपछि उनीसमेत मुछिएको भिजिट भिसा प्रकरणको अनुसन्धान सुस्त भएको छ । यस प्रकरणको अनुसन्धान अख्तियारले गरिरहेको छ । अनुसन्धानलाई प्रभावित पार्ने खेलमा गृह मन्त्रालयका सहसचिव तीर्थराज भट्टराई देखिएका छन् । उनी यही ७ जेठमा पक्राउ परेका थिए । तर, हिरासतमा उनलाई राखिएको छैन । त्यसो हुँदा अनुसन्धानलाई प्रभावित पार्ने खेलमा उनी रहेको स्रोतले जनाएको छ । स्रोतको दाबीमा त्यही भएर अख्तियारको अनुसन्धान सुस्त भएको हो ।
भट्टराईलाई अख्तियारले पक्राउकै दिन हाजिर जमानीमा छाडेको थियो । भोलिपल्ट ८ गते र १२ गते उनी बयानका लागि अख्तियार गएका थिए । अब उनलाई आज पनि अख्तियारले बयानका लागि बोलाएको छ । यस्तै, यो प्रकरणमा आयोगले बिचौलियाद्वय कविता पौडेल र भरत सुवेदी तथा एक ट्राभल एजेन्सी सञ्चालक बालकृष्ण खड्कालाई पक्राउ गरेको थियो । तर, उनीहरू पनि हिरासतमा छैनन् । जबकि, प्रारम्भिक अनुसन्धानमै भिजिट भिसाको मानव तस्करीको घटना संगठित र संस्थागत देखिएको छ ।
सेटिङको कनेक्सन अध्यागमन विभाग र गृह मन्त्रालयसम्म देखिएको दाबी अख्तियारका अधिकारीहरूको थियो । तर, अनुसन्धान नै प्रभावित हुनेगरी गृहमन्त्री लेखकले कर्मचारी सरुवा गरे र जसकारण अनुसन्धान सुस्त भएको भन्दै आलोचना भइरहेको छ ।
