- बालेनले हटाएका प्रमुख प्रशासकीय अधिकृत गुरागाईं कार्यालय प्रवेश
- बहुसंख्यक वडाध्यक्ष, कार्यापालिका सदस्य र कर्मचारीको घेराबीच गुरागाईं बालेनको निर्देशनमा लगाइएको ताला फुटाउँदै कार्यकक्ष गएर हाजिर गरे
- बालेनप्रति उपप्रमुख सुनिता आक्रोशित
काठमाडौं– काठमाडौं टावरमा अनियमित नक्सा स्वीकृतिको आरोपमा काठमाडौं महानगरपालिकाका प्रमुख बालेन्द्र (बालेन) शाहले हटाएका प्रमुख प्रशासकीय अधिकृत सरोज गुरागाईं बिहीबार फिल्मी शैलीमा कार्यालय प्रवेश गरेका छन् । मेयर बालेन उनलाई रोक्न चाहन्थे ।
त्यसका लागि ठूलो सङ्ख्यामा नगर प्रहरी तैनाथ गराएका थिए । राजु पाँडेले तैनाथ प्रहरीको कमान्ड गरेका थिए । उनकै नेतृत्वमा नगर प्रहरीले प्रमुख प्रशासकीय अधिकृत गुरागाईंको कार्यकक्षमा ताला लगाइदिएका थिए ।
जबकि, स्थानीय सरकार सञ्चालन ऐनको परिच्छेद–२ को महानगर प्रहरी सेवा गठन, रेखदेख र नियन्त्रणसम्बन्धी प्रावधानमा प्रमुख प्रशासकीय अधिकृतले नै महानगर प्रहरीको परिचालन, रेखदेख, नियन्त्रण र निर्देशन दिने अधिकार राख्ने उल्लेख छ । तर, बिहीबार बालेनको निर्देशनमा प्रमुख प्रशासकीय अधिकृत गुरागाईंलाई कार्यालय प्रवेशमा रोक लगाउन नगर प्रहरीले कार्यकक्षमा ताला लगाइदिएको थियो । कार्यालय प्रवेशमै रोक लगाउन परिचालित भएका थिए ।
यद्यपि, महानगरका कर्मचारी, वडाध्यक्ष र कार्यपालिका सदस्यहरूको ठूलो भीडसामु बालेनको सीप चलेन ।
गुरागाईंलाई रोक्न तैनाथ राजु पाँडे नेतृत्वको नगर प्रहरी बलले सकेन । महिनौँपछि गुरागाईंको कार्यकक्षमा प्रवेश भयो । नगर प्रहरीहरू उनको पछिपछि लागे । कर्मचारी र वडाध्यक्षले नै गुरागाईंलाई कार्यकक्षसम्मै डोहो¥याएर लगे । कार्यकक्षमा बालेनको समूहले सचिवालयले ताला लगाएको थियो । ताला फुटाउने प्रयासमा केहीबेर धकेलाधकेल भयो । यसक्रममा बैठक कक्षको फल सिलिङ भित्ता नै भत्किएको थियो र छेउको कोठाको सिसा फुटेको थियो ।
त्यसपछि प्रमुख प्रशासकीय अधिकृत गुरागाईंको कार्यकक्षछेउकै बैठक कक्षमा वडाध्यक्ष, कार्यपालिका सदस्यहरू भेला भए । एकछिनपछि त्यहाँ उपप्रमुख सुनिता डंगोल पुगिन् । बैठकमा सहभागी एक वडाध्यक्षका अनुसार, बैठकमा कार्यपालिकाका ४१ सदस्यहरू उपस्थित थिए । त्यहाँ उपप्रमुख डंगोल प्रमुख बालेनप्रति निकै आक्रोशित भइन् । प्रमुख प्रशासकीयको कक्षमा लगाइएको तालाबारे नगर प्रहरी बलका प्रमुख राजु पाण्डेसँग सोधखोज गरिन् । त्यसक्रममा पाँडेले माथिको आदेशकै आधारमा ताला लगाएको बताए ।
त्यसपछि सुनिताले सोधिन्, ‘लिखित आदेश छ ?’ पाँडेले मौखिक आदेश आएको बताए । झनै आक्रोशित सुनिएकी उनले ताला खोल्न निर्देशन दिँदै बालेनले कोठामा बसेर निर्देशन दिइरहेको भन्दै गुनासो गरिन् ।अनि, प्रमुख प्रशासकीय अधिकृत गुरागाईंले हाजिर गरे । उनलाई कार्यालय प्रवेश गराएका कर्मचारीहरू खुसी भए । बालेन भने देखिएनन् । महानगर क्षेत्रमा करिब दुई घण्टासम्म तनावपूर्ण स्थिति भएको थियो । महानगरका प्रवक्ता नवीन मानन्धर भन्छन्, ‘अब महानगरको डेडलक खुल्यो ।’
गुरागाईंमाथि बालेनले काठमाडौं टावर निर्माण प्रक्रियामा अनियमित नक्सा स्वीकृतिको आरोप लगाएका थिए । आरोपपछि गुरागाईंलाई बिदामा बस्न बालेनले भनेका थिए । कार्यालय आउन दिएका थिएनन् । त्यहीबीच सामान्य प्रशासन मन्त्रालयसमक्ष अर्को प्रमुख प्रशासकीय अधिकृत पठाउन मागसहित राय पठाएको थियो ।
मन्त्रालयले अस्वीकार ग¥यो । अर्थात् गुरागाईंलाई नै प्रमुख प्रशासकीय अधिकृतका रूपमा बहाल गर्ने निर्णय लियो । बालेन झनै रुष्ट भए ।
प्रधानमन्त्री केपी शर्मा ओलीमाथि खनिए । प्रमुख प्रशासकीय अधिकृत नहुँदा आफ्ना कर्मचारीले तलब खान नपाएको महिनौँ नपाएको भन्दै टुकुचामा गाडीदिनेसम्मको अभिव्यक्ति दिए । यो अभिव्यक्तिले उनी निकै विवादित भए । उनले गुरागाईंलाई काठमाडौं टावरको नक्सा प्रकरणमा जोड्दै छानबिनका लागि समिति नै गठन गरेका थिए । समितिले अझै प्रतिवेदन बुझाएको छैन । प्रतिवेदनमा भएको ढिलाइका कारण उनले महानगरका विभागीय प्रमुखहरूबाट राय संकलन गराएर गुरागाईंलाई हटाउन खोजेका थिए ।
गुरागाईंलाई हटाउने बालेन रणनीतिमा भने मन्त्रालय नै बाधक बन्यो । यसपछि महानगर प्रमुख प्रशासकीय अधिकृतविहीन बन्यो । झण्डै चार महिनादेखि महानगरबाट तलब खाने कर्मचारीले तलब पाएनन् । अर्बभन्दा बढी भुक्तानी रकम रोकिएको छ । क्यान्सरका बिरामीलाई दिनुपर्नेजस्ता पैसासमेत रोकिँदा स्थिति निकै जटिल बनेको प्रवक्ता मानन्धरले प्रभावसँग भने । तर, मेयर बालेन गुरागाईंलाई कुनै हालतमा कार्यालय आउन नदिने अड्डी कसेर बसेका थिए । यो कुरा उपप्रमुख सुनिता डंगोलसहित वडाध्यक्ष र कर्मचारीहरूलाई मन परेको थिएन ।
अन्ततः प्रमाणित हुन नसकेको आरोपका आधारमा प्रमुख प्रशासकीयलाई रोकेर तमाम कर्मचारीलाई अप्ठेरोमा पारेको उनीहरूको निचोड थियो । त्यसैले बिहीबार उनीहरूले आफ्नै बलमा गुरागाईंलाई कार्यकक्षमा छिराएर हाजिर गराए, जुन बालेनका लागि अनपेक्षित हो । गुरागाईंका लागि भने जित हो ।
