मंगलबार देशले एक समन्वयकारी नेतालाई गुमायो । संविधानसभा अध्यक्ष सुवासचन्द्र नेम्वाङ नेकपा एमालेका उपाध्यक्ष थिए, इलाम–२ बाट निर्वाचित सांसद थिए । तर यो भन्दा बढी उनी अहिले देशमा भएको संविधानका समन्वयकर्ता थिए । वरिष्ठ अधिवक्ता हुँदै उनी नेपाल बार एसोसिएसनको महासचिवसम्म भए । एमालेभित्र संसदीय राजनीतिक खेलाडीकै रूपमा उनलाई हेर्ने गरिएको थियो । २०६३ को पुनःस्थापित प्रतिनिधिसभाको सभामुख भएका थिए नेम्वाङ । २०६५ र २०७० मा उनी संविधानसभा अध्यक्ष भए । दोस्रोपटकको संविधानसभाबाट संविधान जारी भयो । उनी इलामबाट पाँचपटक चुनाव जितेर सांसद भए ।
राजनीतिक वृत्तमा यो उचाइ पाउन उनले २०४८ अघिबाटै राजनीतिक यात्रा थालेका थिए । वरिष्ठ अधिवक्तासमेत रहेका नेम्वाङको संसदीय राजनीतिक यात्रा भने २०४८ बाट हो अघि बढेकोे । २०५२ सम्म राष्ट्रिय सभाको सदस्य रहेका नेम्वाङ २०५१ मै कानुन, न्याय तथा संसदीय राज्यमन्त्री बनेका थिए ।खरो कुरालाई दरोसँग घुमाउन सक्ने वाकपटुता भएका नेता नेम्वाङको जोड हुन्थ्यो वार्ता, सहमति र सहकार्य ।
प्रधानमन्त्री हुँदा दुईपटक संसद् विघटन गरेका उनकै दल एमालेका अध्यक्ष केपी शर्मा ओलीलाई नबोलेरै गलत भएको सन्देश नेम्वाङले दिने गरेका थिए । पछिल्लो समय एमालेभित्र उनले ओलीको खुलेरै पनि आलोचना गर्ने गरेका थिए । एमालेले सुन प्रकरणमा गरेको संसद् अवरोधलाई गलत भएको भन्दै ओलीको आलोचना गरेका थिए । नेम्वाङलाई ओलीले राष्ट्रपतिको निर्वाचनमा उम्मेदवार बनाए पनि उनले गठबन्धनलाई जोगाउन सकेमात्रै उम्मेदवार बन्ने अडान राखेका थिए ।
तर ओलीले राष्ट्रपतिलाई मात्र एकसूत्रीय माग बनाएपछि कांग्रेस नेता रामचन्द्र पौडेलले अवसर पाए । संविधान निर्माण र त्यसपछिका राजनीतिक घटनाक्रममा पनि नेम्वाङको भूमिका अविस्मरणीय छ । ओलीको अनुपस्थितिमा एमालेको संसदीय मोर्चा सम्हाल्ने गरेका नेम्वाङ २०७४ मै एमाले संसदीय दलको उपनेता थिए । यसपटकको निर्वाचनपछि पनि उपनेताकै भूमिकामा थिए । मृदुभाषी सुवास सबैसँग सम्पर्कमा रहन्थे । नेताहरु फोन उठाउन गाह्रो मान्छन् ।
सुवास जुनसुकै भूमिकामा पनि सहजै फोन उठाउने फर्काउने गर्थे । सूचनाको खानी नै थिए । कतिले त उनलाई ‘सूचने’ पनि भन्थे । एक त उनको नाम सुवासचन्द्र नेम्वाङको छोटो रुपमा अर्को सञ्चारकर्मीलाई सहजै सूचना दिने भएकोले पनि यो नाम जोडियो । पार्टीभित्रमात्र नभई नेम्वाङले जनताको मन जितेर संसारबाट बिदा भएका छन् । आफ्नो सुवास छरेर गएका छन् । अलबिदा समन्यवकारी नेता ।