काठमाडौं– नेपाली कांग्रेसका सहमहामन्त्री महेन्द्र यादवमाथि बुधबार धारिलो हतियार प्रहार भएपछि सार्वजनिकस्थलमा नेताहरूको सुरक्षाबारे फेरि प्रश्न उठेको छ । यसअघि पनि सार्वजनिकस्थलमा नेताहरूमाथि आक्रमणका घटना थुप्रै भएका थिए । आक्रमणकारीले धारिलो हतियार नै चाहिँ प्रहार गरेका थिएनन् । जुत्ता र कुर्सी प्रहार गरेका थिए । केही नेतालाई थप्पड हानेका थिए ।
बुधबार भने कांग्रेस सहमहामन्त्री यादवको टाउकोमा धारिलो हतियार प्रहार भयो । घाइते उनको अहिले ट्रमा सेन्टरमा उपचार भइरहेको छ । नेपाल प्रहरीका केन्द्रीय प्रवक्ता कुबेर कडायतका अनुसार घाइते यादवको अवस्था खतरामुक्त छ ।
‘उहाँ (महेन्द्र यादव)लाई ज्यान मार्ने मनसायबाट धारिलो हतियार प्रहार भएको देखिएको छ । घटनालगत्तै आक्रमणकारीलाई नियन्त्रणमा लिएका छौं,’ प्रवक्ता कडायतले प्रभावसँग भने, ‘अहिले घाइतेको अवस्था सामान्य छ ।’
कार्यक्रम सकेर बाहिर निस्किँदै थियौं । एक जना आएर महेन्द्रजीलाई खुकुरीले हाने । म अलिक पछि थिएँ । दुईचोटी खुकुरीले हाने ।
डा. धवलशमशेर राणा
महामन्त्री, राप्रपा
यादवमाथि भएको सांघातिक आक्रमण गरेको आरोपमा श्यामबाबु सापकोटा पक्राउ परेका छन् । उनी राजावादी अभियन्ता भनेर चिनिन्छन् । रिपोटर्स क्लबमा आयोजित साक्षात्कार कार्यक्रममा उनले सहमहामन्त्री यादवको भाषण पनि सुनेका थिए । कार्यक्रम सकिएर बाहिरिँदै गर्दा नुवाकोटको विदुर–८ घर भएका सापकोटाले यादवलाई आक्रमण गरेको प्रत्यक्षदर्शीसमेत रहेका राप्रपा महामन्त्री डा. धवलशमशेर राणाले बताए ।
‘सरकारको काम, सुन तस्करी, चिनियाँ राजदूतले बोलेको विषयदेखि समसामयिक विषयमा अन्तरक्रिया थियो एक बजे,’ राणाले भने, ‘कार्यक्रम सकेर बाहिर निस्किँदै थियौं । एक जना आएर महेन्द्रजीलाई खुकुरीले हाने । म अलिक पछि थिएँ । दुईचोटी खुकुरीले हाने ।’
यादवमाथि भएको आक्रमणको कारण भने खुल्न बाँकी छ । यसबारे काठमाडौं प्रहरी परिसर टेकुले अनुसन्धान गरिरहेको छ प्रवक्ता कडायतले बताए । यादवझैं सार्वजनिकस्थलमै आक्रमणमा पर्नेमा पर्छन्–प्रधानमन्त्री पुष्पकमल दाहाल पनि । उनीमाथि १८ फागुन २०७६ मा राष्ट्रिय सभागृहमा आयोजित एक कार्यक्रममा जुत्ता प्रहार भएको थियो । उनलाई जुत्ता प्रहार गर्ने जुम्लाका तत्कालीन नेकपा समर्थित रतन तिरुवा थिए । त्यसबेला उनले देश बर्बादीमा लगेको भन्दै दाहालमाथि आक्रोशस्वरुप जुत्ता प्रहार गरेको बताएका थिए ।
दाहालमाथि त्यसअघि पनि आक्रमणको प्रयास भएको थियो । १ चैत २०७२ मा संविधानसभा सदस्यको हैसियतमा तत्कालीन जिल्ला विकास समिति सिरहाको २३औं जिल्ला परिषद् उद्घाटन गर्ने क्रममा कार्यक्रमस्थलमै कुर्सी प्रहारको प्रयास भएको थियो । ठूलो संख्यामा रहेका सुरक्षाकर्मीहरूले घेरा हालेर दाहाललाई त्यसबेला जोगाएका थिए । उनी त्यसबेला सिरहा–५ का सभासद थिए ।
उहाँ (महेन्द्र यादव)लाई ज्यान मार्ने मनसायबाट धारिलो हतियार प्रहार भएको देखिएको छ । घटनालगत्तै आक्रमणकारीलाई नियन्त्रणमा लिएका छौं । अहिले घाइतेको अवस्था सामान्य छ ।
कुबेर कडायत
केन्द्रीय प्रहरी प्रवक्ता, नेपाल प्रहरी
गत १८ जेठमा पूर्वप्रधानमन्त्रीसमेत रहेका नेकपा एकीकृत समाजवादीका सम्मानित नेता झलनाथ खनालमाथि अनामनगरमा आक्रमणको प्रयास भएको थियो । उनलाई आक्रमणबाट जोगाउन सुरक्षाकर्मीलाई हम्मेहम्मे परेको थियो । त्यसबेला एक जना युवकले मञ्च कब्जा गरेर पूर्वराजा ज्ञानेन्द्रको पक्षमा नारावाजी गरेका थिए ।
खनाललाई एमाले अध्यक्ष रहेकै बेला ६ माघ २०६७ मा सुनसरीको भरौल–१ का देवीप्रसाद रेग्मीले सार्वजनिकस्थलमै गालामा चड्कन हानेका थिए । आमालाई ठूला नेतालाई चड्कन हान्ने मन भएको भन्दा आमाले नपत्याएपछि त्यसको छ महिनामै खनाललाई चड्कन हानेको उनले पत्रकारहरूसँग बताएका थिए ।
सार्वजनिकस्थलमा आक्रमणमा पर्ने नेतामध्येमै पर्छन्, हाल राप्रपाका प्रमुख सचेतक रहेका ज्ञानेन्द्र शाही । उनलाई ७ वैशाख २०७९ मा गृहजिल्ला जुम्लामा आयोजित एक कार्यक्रममा दर्शकदीर्घाबाट मोबाइल प्रहार भएको थियो । त्यसअघि २८ जेठ २०७८ को राति सुर्खेतको करेखोलामा कुटपिट नै भएको थियो ।
नेपाल प्रहरीका पूर्वप्रहरी अतिरिक्त महानिरीक्षक (एआइजी) वसन्तकुमार लामा नेताहरूमाथि आक्रमण हुनुको अनेक कारण हुने बताउँछन् । कसैले व्यवस्था मन नपराएको र व्यवस्थाविरुद्धको आक्रोश स्वरुप नेताहरूमाथि आक्रमण गर्ने गरेको उनको ठम्याइ छ । कसैले भने भ्रष्टाचार नियन्त्रण नहुनु, देशमा बेरोजगार समस्या बढ्दै जानु, महँगीले जनताको ढाड सेकिनुदेखि अव्यवस्थाजन्य गतिविधि सहन नसकेर आक्रमण गर्ने लामाले बताए ।
‘आक्रमण त्यसै हुने होइन । आक्रमणको पछि केही न केही असन्तुष्टि हुन्छ,’ उनी भन्छन्, ‘अहिले त देशमा भ्रष्टाचार व्याप्त छ । तस्करी, ठगी, महंगीजस्ता समस्या छन् । कसैलाई अहिलेको व्यवस्था ठीक लागेको छैन । यसप्रतिको कुण्ठा नेताहरूमाथि कहिलेकाहीँ पोखिन्छ ।’
देशमा राजनीतिक व्यवस्था अदलबदल पटक–पटक भयो । तर, देशको समृद्धि र विकासजस्ता जनचाहना सम्बोधन हुन सकेको छैन । जसकारण नेताहरूप्रति जनता आक्रोशित रहेको मत राजनीतिक विश्लेषकहरूको छ ।
आक्रमणकारीलाई के होला ?
कांग्रेस सहमहामन्त्री महेन्द्र यादवमाथि धारिलो हतियार प्रहार गरेको आरोपमा पक्राउ परेका श्यामबाबु सापकोटाविरुद्ध काठमाडौं प्रहरीले कर्तव्य ज्यान उद्योगमा अनुसन्धान थालेको छ । धारिलो हतियार प्रहार गरेको घटनामा कर्तव्य ज्यान उद्योग आकर्षित हुने काठमाडौं प्रहरी प्रमुख भूपेन्द्र खत्रीले बताएका छन् ।
यादवको दल नेपाली कांग्रेसले आक्रमणकारी सापकोटालाई घटनाको निन्दा र भत्र्सना गरेको छ । पार्टी केन्द्रीय कार्यालयका मुख्यसचिव कृष्णप्रसाद पौडेलले विज्ञप्ति जारी गर्दै भनेका छन्, ‘...सहमहामन्त्री महेन्द्र यादवमाथि भएको सांघातिक हमलालाई नेपाली कांग्रेसले गम्भीरतापूर्वक लिएको छ । यो घटनाको नेपाली कांग्रेस घोर निन्दा र भत्र्सना गर्दछ ।’
विज्ञप्तिमा घटनामा संलग्नलाई कारबाहीकोसमेत माग गरिएको छ । कांग्रेसको दुईवटा भ्रातृ संगठन नेपाल विद्यार्थी संघ र नेपाल तरुण दलले नेता यादवमाथिको आक्रमणमा संलग्नलाई कानुनी कारबाहीको माग गरेका छन् । दुवै संगठनले गृहमन्त्री नारायणकाजी श्रेष्ठको राजीनमा समेत मागेका छन् । घाइते यादवको स्वास्थ्य स्थितिबारे जानकारी लिन सभापति शेरबहादुर देउवा बुधबार दिउँसै ट्रमा सेन्टर गएका थिए । घटनाप्रति उनले दुःख व्यक्त गरेका छन् ।
