कालिकोट- रास्कोट नगरपालिकाले सडक निर्माणको काममा ठेकदारले गरेको ढिलासुस्ति प्रति गम्भीर चासो व्यक्त गर्दै विहिबार सार्वजनिक अपिल जारी गरेको छ।
कालिकोट जिल्लाको सान्नीघाट-सिपखाना कालोपत्रे निर्माण कार्यमा भएको ढिलाइका कारण स्थानियवासीले दैनिक भाेग्नुपरेकाे जोखिमपूर्ण यात्राप्रति गम्भीर चासो व्यक्त गर्दै रास्कोट पालिकाले ध्यानाकषार्ण गर्दै विहिबार सार्वजनिक अपिल जारी गरेको हाे ।
नगर प्रमुख धर्मराज शाहीद्वारा जारी अपिलमा भौतिक पूर्वाधार तथा सहरी विकास मन्त्रालय अन्तर्गत पूर्वाधार विकास कार्यालय, कालिकोट मार्फत केएस शान्तिदेव जेभीसँग भएको ठेक्का सम्झौताको अवधि सकिदा सम्म पनि सडक कालोपत्रे हुन नसकेपछि सार्वजनिक अपिल जारि गर्नुपरेको नगर प्रमुख शाहीले बताए ।
उन भने, 'निर्माण कार्यमा भएको ढिलाइका कारण स्थानिय वासीले धुलो, हिलो, जोखिमपूर्ण यात्रा, यातायात सञ्चालनमा कठिनाइ तथा शिक्षा, स्वास्थ्य, कृषि, व्यापार–व्यवसायलगायत दैनिक जनजीवनमा निरन्तर समस्या भोग्नुपरेको छ। '
केएस शान्तिदेव जेभीसँग भएको ठेक्का सम्झौताको पहिलो चरणमा काम समपन्न गर्न नसकेपछि पुन एक वर्षको लागि म्याथ थप गरेकोले उक्त सडक निर्माण कार्य समयमै सम्पन्न गराउन नगरपालिकाले सम्बन्धित निकाय र निर्माण व्यवसायीसँग पटक-पटक मौखिक तथा लिखित रूपमा समन्वय, ध्यानाकर्षण र आवश्यक पहल गर्दै आए पनि अपेक्षित प्रगति हुन नसकेको नगरपालिकाको भनाइ छ।
कम्पनिले रनिंग विलको आधारमा करिव ५२.८७ प्रतिशत विल भुक्तानी लगिसकेको भएतापनि सडक निमार्णकार्य सन्तोषजनक हुन नसकि ठेकदारको गैर जिम्मेवारी र ठुलो लापरर्वाही रहेको नगर उप प्रमुख मनिराज बरालले बताए । उनले भने उक्त सडक निमार्णमा आवस्यक सम्पुर्ण सहयोग नगरपालिका गर्न तयार रहदा पनि निमार्णकार्य सुस्त गतीमा रहेको बताए ।
नगरपालिकाको प्रकाशित सार्बजनिक अपिलमा भनियको छ, आगामी आर्थिक वर्ष २०८३/०८४ को सुरुवातसँगै निर्माण व्यवसायीलाई पूर्ण रूपमा निर्माणस्थलमा परिचालन भई सडक निर्माण कार्यलाई तीव्रता दिन आग्रह गरेको छ। यदि अझै पनि सम्झौताअनुसार काम सम्पन्न गर्न बेवास्ता गरिए प्रचलित सार्वजनिक खरिद ऐन, नियमावली तथा ठेक्का सम्झौताअनुसार ठेक्का तोड्नेसम्मका कानुनी प्रक्रिया अघि बढाउन सम्बन्धित निकायसमक्ष औपचारिक अनुरोध गरिने चेतावनी समेत दिइएको छ।
रास्कोट नगरपालिकाले नागरिकलाई सहज, सुरक्षित र गुणस्तरीय सडक पहुँच उपलब्ध गराउनु आफ्नो प्रमुख प्राथमिकता भएको उल्लेख गर्दै सडक निर्माण कार्य समयमै सम्पन्न गराउन आवश्यक समन्वय, सहजीकरण र पहललाई निरन्तरता दिने प्रतिबद्धता व्यक्त गरेको छ।
